Read Runyoro - rutooro Dan 3 Bible Online

Dan 3 - Runyoro - rutooro bible

Dan 3

¹Omukama Nebbukadaneeza, akakora ekisisani eky'efeeza, obura bwakyo mita abiri na musanju, obugazi mita nka isatu. Yakita omu kyeya Duura, omu isaza lya Babbulooni.

²Hanyuma yatuma basorooze: abaamasaza, abalemi abakuru, abahi baamagezi, abakeeto, abacwi b'emisango abakuru n'abato, n'abanyoro boona ab'omumasaza, baije ha mutooro gw'okusoroora kutamu ekitiinisa ekisisani, omukama Nebbukadaneeza eki akaba ataireho.

³Abo boona obu baizire habw'omukoro ogu beemeriire omumaiso g'ekisisani

⁴haahulirwa omurangi ayabaliize haiguru naagamba ati: “Inywe abantu ab'amahanga goona, ab'enganda zoona n'ab'engambo zoona,

⁵obu muraahurra haagamba ikondere, engwara enyamulere, enanga, enseegu, endongo, n'ebintu byona eby'amaraka, mwiname muramye ekisisani ekya zaabbu omukama Nebbukadaneeza eki yakozire;

⁶kandi omuntu wena atainame akaramya, ogu ahonaaho araanagwa omu kyoto eky'omurro ogurukumekuka.”

⁷Habweki abantu bakarumisa kuhurra ikondere, enyamulere, engwara, enanga, enseegu, endongo, n'ebintu byona eby'amaraka byagamba boona baajuumara baaramya ekisisani ekya zaabbu, omukama Nebbukadaneeza eki akaba akozire.

⁸Omu kasumi ako, nubwo haizire Abakaludaaya abamu banyegerra Abayudaaya habwitima.

⁹Baagambira omukama Nebbukadaneeza bati: Hangiriza enzaire!

¹⁰Iwe omukama, okataho ekiragiro ekirukugamba kiti: omuntu wena araahurra ikondere, engwara, enyamulere, enanga, enseegu, endongo n'ebintu byona eby'amaraka, ajuumale aramye ekisisani ekya zaabbu,

¹¹wena ataajuumale akakiramya w'okunagwa omu kyoto eky'omurro ogurukumekuka.

¹²Haroho Abayudaaya abamu aba wakomere nubo babe n'omulimo ogw'okwetegereza engiga enkuru eza Babbulooni, nubo banu: Saduraaka, Mesaaka, n'Abedeneego, mwebingwa, abantu abo, tibarukuhurra eki waragiire; tibarukuheereza embandwa zawe kandi tibarukuramya kisisani ekya zaabbu eki wakozire.

¹³Omukama Nebbukadaneeza obu yahuliire eki, ekiniga kyayenda kumwita, nukwo kuragira bamuleetere Saduraaka, Mesaaka, n'Abadeneego, abasaija abo, baabaleeta omumaiso g'omukama.

¹⁴Yabakaguza ati: Saduraaka, Mesaaka, n'Abedeneego, mazimakwo mukanga kuheereza embandwa zange n'okuramya ekisisani ekya zaabbu eki nakozire?

¹⁵Hati nu, obu muraarumisa kuhurra haagamba ikondere, enyamulere, engwara, enanga, enseegu, endongo n'ebintu ebindi eby'amaraka, mwiname muramye ekisissani. Obu mutaakiramye, ahonaaho, muraanagwa omu kyoto ky'omurro ogurukumekuka; kandi nooha ogu arabannyiha omu ngaro?

¹⁶Saduraaka, Mesaaka, n'Abedeneego baagarukamu omukama bati: Nzaire, titwina nkooku turaakugarukamu eki otukagwize

¹⁷baitu, obu kiraaba kiri kiti, Ruhanga waitu ou tuheereza, nuwe asobora kutujuna akatwiha omu kyoto eky'omurro ogurukumekuka; kandi nuwe araakutwiha omu ngaro.

¹⁸Eki noobu otaakikole, nabwo, omanye nkooku tutaaheereze mbandwa zaawe, kandi nkooku tutaaramye ekisisani ekya zaabbu eki wakozire.

¹⁹Omukama Nebbukadaneeza ekiniga kyayenda kumwita, amaiso ge gaahinduka, yarora kubi Saduraaka, Mesaaka n'Abedeneego, nukwo kuragira ekyoto bakyongeremu omurro kituume emirundi musanju, okukira nkooku kyakatuumaga bwona.

²⁰Aho yaragira abasaija abamu ab'amaani ab'ihe rye babohe Saduraaka, Mesaaka, n'Abedeneego, babahungule omu kyoto eky'omurro ogurukumekuka.

²¹Abantu abo baababoha bajwaire ebyokujwara byabo byona: ekanzu zaabo, enkofiira, n'ebyokujwara byabo ebindi, baabanaga omu kyoto eky'omurro ogurukumekuka.

²²Habwokuba omukama akaba aragiire n'amaani bahembe omurro ekyoto kituume muno muno, endimi z'omurro ikokya abasaija bali abatwaire Saduraaka, Mesaaka n'Abedeneego.

²³Abasaija abasatu abo, Saduraaka, Mesaaka n'Abedeneego, baagwa, baboherwe omu murro ogurukumekuka.

²⁴Nubwo omukama Nebbukadaneeza yahuniriire muno, nukwo kwimuka bwango, yakaguza ati: “Abasaija abasatu bali, titubanagirege omumurro baboherwe?” Baagarukamu omukama bati: “Ego, nukwo tukozire.”

²⁵Omukama yagarukamu ati: “kandi ka nindora abasaija bbana abataboherwe, nibarubatarubata omu murro hagati, kandi tibarukutaaga; kandi enzooka ey'owa kana, neesisana omwana wa ba ruhanga.”

²⁶Nubwo Nebbukadaneeza yairiire haihi ekyoto eky'omurro ogu ogurukumekuka yayeta ati: “Saduraaka, Mesaaka, n'Abedeneego, inywe abaheereza ba Ruhanga anyakuli haiguru muno, mwerugireyo mwije hanu!” Saduraaka, Mesaaka n'Abedeneego baaruga bwango omu murro.

²⁷Abamasaza, abamyoka, abalemi, n'abahi b'amagezi baayesorooza, baarora abasaija abo omurro nkooku gutarabakozireho kantu; isoke erya ha mitwe yabo nalyo litahye, ebyokujwara byabo bitookebwe murro kandi bakaba batarukunuunka omwika.

²⁸Omukama Nebbukadaneeza nukwo kugamba ati: “Akugizibwe Ruhanga wa Saduraaka, Mesaaka, n'Abedeneego, anyakutumire malaika we yajuna abairu be abamwesigire, abaagayire ekiragiro ky'omukama, baahayo emibiri yabo, baitu baayanga kuheereza n'okuramya embandwa kwihaho Ruhanga wabo wenka.

²⁹Hati ninturukya ekiragiro ekirukugamba kiti: Abantu ab'amahanga goona, ab'enganda zoona kandi ab'engambo zoona, kakuba habaho omuntu arukubazaaho kubi Ruhanga owa Saduraaka, Mesaaka, n'Abedeneego, ogu atemwatemwe n'amaju gaabo gaseeswe; habw'okuba tiharoho embandwa erukusobora kujuna ati.”

³⁰Omukama yakuza Saduraaka, Mesaaka, n'Abedeneego omu isaza Babbulooni.