Read Runyoro - rutooro Dan 4 Bible Online

Dan 4 - Runyoro - rutooro bible

Dan 4

¹Omukama Nebbukadaneeza, akatweka obukwenda bunu habantu ab'amahanga goona, ab'enganda zoona, kandi ab'endimi zoona ez'omunsi, naagamba ati: Nimbagondeza obusinge oburukukirra hara obu mubaire nabwo!

²Kikampikirra kumanyisa ebyamahano kandi ebihuniriza, Ruhanga Rutakirwa ebi yankoliire.

³Eby'okurorraho bye kabikuru n'ebyamahano bye ka byamaani, Obukama bwe, bukama bw'ebiro byona, n'obulemi bwe, bw'ebiro byona.

⁴Nyowe Nebbukadaneeza, nkaba ndi kurungi omunju yange, ngwagwaine omu kikaali kyange.

⁵Baitu nkagenda naroota ekirooto, kyantiinisa muno; obu nkaba mbyamire omu kitabu kyange, ebiteekerezo byanyijaga omu mutwe, n'ebintu ebi nayolekerwe, byantiinisa.

⁶Nukwo kuturukya ekiragiro ninnyeta abanyamagezi boona aba Babbulooni, baije bansoborre amakuru g'ekirooto eki naroosire.

⁷Hakaija abakozi b'ebyamasano, abafumu, Abakaludaaya n'abaraguzi; nabarootorra eki naroosire, baitu batasobole kunsoborra amakuru gaakyo.

⁸Hanyuma haija Daneeri ogu ayayetwaga Beliteezasa, ibara ery'embandwa wange, kandi anyakurumu omwoyo ogw'embandwa abarukwera na uwe namugambira eki naroosire nti:

⁹Bairaba Beriteesaza, iwe omukozi w'ebyamasano omukuru habw'okuba mmanyire nkooku oina omwoyo ogw'embandwa abarukwera, kandi okenga ensita zoona nikyo ndukukugambirra ekirooto eki naroosire; onsoborre amakuru gakyo.

¹⁰Omutwe gwange ebi gwanyolekere mbyamire omu kitabu kyange, nibyo binu: obu nkaba ngwijagiire, nkarora omuti ogukaba guli hagati y'ensi nagwetegereza; gukaba guraihire muno.

¹¹Omuti ogu, gukagenda nigukura gwaraiha gwarumira kimu omwiguru, gwarorwa abakaba bali ha mpero y'ensi.

¹²Gukaba gwina ebikoora ebirungi muno kandi gukaba gwanire muno, nugwo gwaliisaaga abantu boona. Enyamaiswa ez'omu kisaka, zaahuumuraga omu kiituuru kyagwo, enyonyi ez'omu mwanya zaaraaraga omu mataagi gagwo kandi, nugwo gwaliisaaga ebyomeezi byona.

¹³“Obu nkaba mbyamire omu kitabu kyange, omuli ebi omutwe gwange ebi gwanyolekere, nkarora omulinzi, omulinzi arukwera, naasirimuka naaruga omwiguru.

¹⁴Yabaliza haiguru naagamba ati: ‘Omuti ogu guteme, ogunogorreho amataagi gaagwo, ogunogeho ebibabi byagwo kandi orarangye ebijuma byagwo, binga enyamaiswa ziruge hansi yagwo, n'enyonyi ziruge omu mataagi gagwo.

¹⁵Baitu ekikoro eky'emihama yagwo, okireke omwitaka, kiboherwe omweko ogw'ekyoma n'omulinga, kiri omu bunyansi obw'omu kisaka oburukworoba. Ojubye omuntu ogu n'orume orw'omwiguru; atungege omugabo hamu nenyamaiswa ez'omu kisaka; omuhindule omwiheho omutima ogw'omuntu, omuhe ogw'ekisoro

¹⁶Amale emyaka musanju ataina mutima gw'omuntu, baitu aina ogw'ekisoro.

¹⁷Encwamu enu erugire ha kiragiro ky'abalinzi, yagumibwa ekigambo ky'abarukwera, hoona hoona, abantu bamanye Ruhanga nuwe alema obukama bw'abantu, nuwe abuha ou agondeze, kandi ataho omuntu owa rukugaywa mali nuwe aburolerre.’

¹⁸Omukama Nebbukadaneeza akagamba ati: Kinu nikyo ekirooto naroosire, hati iwe Beriteesaza, onsoborre amakuru gakyo, habwokuba abanyamagezi boona ab'omu bukama bwange, balemerwe, baitu iwe wenka, niwe orukusobora, habwokuba oina omwoyo ogw'embandwa ezirukwera.”

¹⁹Daneeri, kandi anyakwetwa Beriteesaza obu yahuliire eki, yatiina, yaburwa n'eky'okugamba. Omukama yagamba ati: “Beriteesaza, ekirooto rundi okusoborra amakuru gakyo, bireke kukutiinisa.” Beriteesaza yagarukamu ati: “Agutamba, ekirooto nikikahikeho abo abanyakukunoba, kandi amakuru gaakyo nigakahiheho abanyanzigwa baawe!

²⁰Omuti ogu warozire, ogwakuzire gwanyeeta muno, amasonsolya gagwo gaahika haiguru, ogwarozirwe aba hampero y'ensi;

²¹ogukaba gwina amababi amarungi mali kandi gwanire muno, ogwalisaaga abantu boona; ogw'ekituuru ekyahuumurwamuga enyamaiswa ez'omu kisaka kandi ogw'amataagi agaaraarwamuga enyonyi ez'omu mwanya

²²niiwe nzaire ayakuzire waba w'amaani. Ekitiinisa kyawe kikeeyongera kyahika haiguru kandi obulemi bwawe bwahika ha mpero y'ensi.

²³Agutamba, noobu oliba waboine omulinzi, arukwera naasisimuka naaruga omwiguru, yagamba ati: ‘Tema omuti ogu ogucebacebe, baitu ekikoro kyagwo eky'emihama okireke omwitaka, kiboherwe omweko ogw'ekyoma n'omulinga, omu bunyansi obw'ejubwa obw'omu kisaka; kandi omulinzi ogu omujubye n'orume orw'omwiguru; kandi atunge omugabo n'ebisoro eby'omu kisaka, okumara emyaka musanju’;

²⁴Wamara, amakuru g'ekirooto eki nugo ganu: Eki kiragiro kya Ruhanga, amanyisize ekirikuhikaho;

²⁵nikigamba kiti: olibingwa omu bantu kandi oraikaraga n'enyamaiswa ez'omu iswa; olihambirizibwa kulya obunyansi nk'ente, kandi olimara emyaka musanju nootoonyerwa orume orw'omwiguru, okuhika obu olikamanya Ruhanga Rutakirwa nkooku nuwe alema obukama bw'abantu, kandi nkooku abuha ou agondeze.

²⁶Ekiragiro ekirukugamba ngu: oleke ekikoro eky'emihama y'omuti, eki nikimanyisa ngu, obukama bwaawe nibwija kukulindirwa, okuhika obu olimanya Ruhanga nkooku nuwe alema ensi yoona.

²⁷Habweki iwe omukama, oikirize ebi ndukukugambira; ofuuhye ebibi okole ebirungi, ogirre abanaku embabazi, obu nubwo olihangaara kandi ogwagwane.”

²⁸Ebi byona bikahikaho omukama Nebbukadaneeza.

²⁹Obu haahingwireho ameezi ikumi n'abiri, akaba naarubatarubata eruguru y'ekikaali ekya Babbulooni,

³⁰yagamba ati: “Enu tiniyo Babbulooni ey'ekitiinisa ei nayombekeseze amaani n'obusobozi bwange ebe kaaruziika y'omukama, habw'ekitiinisa kyange?”

³¹Omukama obwakaba nakyagamba ebigambo ebi, haahulirwa iraka niriruga omwiguru lyagamba liti: “Iwe omukama Nebbukadaneeza, otege amatu ohurre ebi ndukukugambira: obukama bukurugireho,

³²noija kubingwa omu bantu oikale n'ebisoro eby'omu iswa; noija kuhambirizibwa kulya obunyansi nk'ente, okumara emyaka musanju, okuhika obu olikamanya Ruhanga nkooku nuwe alema obukama bw'abantu, kandi nkooku abuha ou agondeze.”

³³Ekigambo ekyagambiirwe Nebbukadaneeza, kikahikirra bwango. Akabingwa omu bantu, yatandika kulya obunyansi nk'ente, yaikaraga naatonyerwa orume orwarugaga omwiguru, okuhika isoke rye obu lyakuzire lyaingana ebyoya by'isamba, enono ze zaingana nk'ez'enyonyi.

³⁴Emyaka musanju obu yahingwire, nyowe Nebbukadaneeza, nkaimukya amaiso nararamira iguru amagezi gangarukamu, nasiima Ruhanga nahaisaniza kandi nakugiza ogu anyakwomeera ebiro byona; habwokuba obulemi bwe bw'ebiro byoona, kandi obukama bwe bwikaraho ebiro byona;

³⁵Abantu boona ab'omunsi abarora nk'amasa; baamalaika ab'omwiguru n'abantu ab'omunsi, boona nuwe abalema; busaho n'omu asobora kwanga eki arukugonza, rundi kumukaguza ngu: nookora ki?

³⁶Omu kasumi ako konyini, amagezi gange gangarukamu; obu namazire kugarukwamu amagezi, okukugizibwa kwange, obukuru bwange, n'ekitiinisa eky'obukama bwange, nabyo byangarukira. Abahabuzi bange n'abanyoro bange banjwahukirra, nkagarurwa ha ngoma yange kandi nahebwa ekitiinisa ekirukukira eky'okubanza.

³⁷Habweki nu, nyowe Nebbukadaneeza, ninyumiza, nimpaisaniza, kandi ninkugiza MUKAMA w'iguru; habw'okuba byoona ebi akora biba by'amazima kandi emihanda ye eba y'obwinganiza; kandi abo abeekuza, asobora kubabundaaza.