Read Runyoro - rutooro Dan 5 Bible Online

Dan 5 - Runyoro - rutooro bible

Dan 5

¹Kiro kimu, omukama Berisaza akakorra obugenyi abanyoro be rukumi, yanywa amarwa hamu n'abanyoro be abo.

²Berisaza obu yarolezeeho amarwa, yaragira ati: Ebikwato ebya zaabbu n'efeeza, ise Nebbukadaneeza ebi akaba anyagire omunju ya MUKAMA eya Yerusaalemu, biretwe, uwe, abanyoro be, bakazi be na baamalaaya be, nibyo banyweremu.

³Ahonaaho, baaleeta ebikwato ebi ebya zaabbu n'efeeza, ebikaba binyagirwe omunju ya MUKAMA, enju ya Ruhanga eya Yerusaalemu, omukama, abanyoro be, bakazi be na baamalaaya be, nibyo banywisa.

⁴Banywa amarwa, nibahaisaniza embandwa baakozire omu zaabbu, omu feeza, omu mulinga, omu kyoma, omu biti n'omu mabaale.

⁵Ahonaaho, haarorwa omukono gw'omuntu, gwatandika kuhandiika ha kisiika ekitiirwe ekyererezi ekyarugaga ha taara nambere kyakiraga kumulika; n'omukama wenka omukono ogu akagurora niguhandiika.

⁶Nubwo omukama yahinduka ha maiso yaizirwa ebiteekerezo ebirukumutiinisa; entege zaatandika kutukumira

⁷nubwo yatiire omuranga ogurukuhulirwa naagamba ati: Muleete abafumu, Abakaludaaya, n'abaraguzi. Obu baizire yabagambira ati: “Weena ow'araasoma ebigambo ebihandiikirwe ebi akansoborra amakuru gaabyo, araajwekwa ebyokujwara ebya kahuukya, bamute omukuufu ogwa zaabbu omu bikya, kandi aliba mulemi wa kasatu omu bukama bunu.”

⁸Aho abantu b'omukama abanyamagezi boona baija, baitu batasobole kusoma ebigambo biri ebyahandiikirwe ha kisiika n'okusoborra omukama amakuru gaabyo.

⁹Omukama Berisaza nukwo kutiina muno, yahinduka ha maiso; kandi abanyoro be baasoberwa.

¹⁰Nyin'omukama obu yahuliire ebigambo by'omukama n'abanyoro be, yataaha omu kisiika ekikaba kitekaniziibwemu obugenyi; yagamba ati: “Hangiriza Agutamba! Leka kutuntura oti, n'okuhoibwaho erangi!

¹¹Omu bukama bwawe munu, harumu omusaija anyakwina omwoyo ogw'embandwa ezirukwera. Omu kasumi ka sso, ekyererezi, okwetegereza n'amagezi agarukusisana ag'abaruhanga bikazooka omu musaija onu. Omu businge bwa sso, omusaija omu akazooka nkoku aina amagezi, okumanya n'okwetegereza nk'okwembandwa. Omukama Nebbukadaneeza kikuzaara, nukwo kumufoora mukuru w'abakozi b'ebyamasano, mukuru w'abafumu, w'Abakaludaaya n'abaraguzi

¹²habwokuba n'omwoyo omurungi, okumanya, n'okwetegereza okusoborra amakuru g'ebirooto n'okwita ebikoikyo n'okumara obulemeezi, bikazooka omu musaija ogu Daneeri, omukama ou yarukire Beriteesaza. Hati nu, yeta Daneeri ogu, nuwe araakusoborra amakuru g'ebigambo ebi.”

¹³Nubwo Daneeri yaizire omumaiso g'omukama. Omukama yamukaguza ati: “Niwe Daneeri, omu ha bantu ba Yuda abaazaahisiibwe, omukama ise nyowe ou yaihire Yuda?

¹⁴Nkahurra ngu oina omwoyo ogw'embandwa ezirukwera, kandi ngu oina ekyererezi, okwetegereza, n'amagezi agahuniriza.

¹⁵Abasaija abanyamagezi n'abafumu bakaija omumaiso gange hanu, basome ebigambo ebihandiikirwe ebi, kandi bansoborre amakuru gaabyo; batasobole kubinsoborra.

¹⁶Baitu mpuliire ngu, iwe osobora kusoborra amakuru g'ebigambo ebi. Hati obu oraasobora kusoma ebigambo ebi okansoborra n'amakuru gaabyo, noija kujwekwa ebyokujwara ebya kahuukya, ojwale omukuufu ogwa zaabbu omu bikya, kandi oliba mulemi wa kasatu omu bukama bunu.”

¹⁷Daneeri ali omumaiso g'omukama yagarukamu ati: “Ebisembo byawe oikale nabyo, rundi obihe omuntu ondi, baitu nyowe ninyija kukusomera ebigambo ebi, nkusoborre n'amakuru gaabyo.

¹⁸Agutamba, Ruhanga, akaha sso Nebbukadaneeza obukama, obukuru, ekitiinisa n'obusobozi;

¹⁹habw'ekitiinisa eki yamuhaire, nikyo abantu boona, amahanga ag'engambo zoona, gaatukumirraga kandi gaatiinaga omumaiso ge; ou yagonzaaga kwita, amwita, ou yagonzaaga kukiza amukiza; ou yagonzaaga kukuza, akamukuza, ou yagondeze kugarra hansi, akamugarrayo.

²⁰Baitu omutima gwe obu gwataahiriirwe okwekuza, omwoyo gwe gwaijwamu emyehembo, akabingwa ha bukama bwe, yaihwaho ekitiinisa kye;

²¹akabingwa omu bantu, omutima gwafooka nk'ogw'ekisoro, yatandika kwikara n'enyamaiswa ez'omu kisaka yalya obunyansi nk'ente, yaikaraga naajubibwa orume orw'iguru, okuhika obu yamanyire Ruhanga nkooku nuwe alema obukama bw'abantu, kandi nuwe abuha ou agondeze.

²²Kandi iwe omutabani Berisaza, noobu wahuliire ebi byona, otebundaaze,

²³baitu okeehuulirraho MUKAMA w'iguru; baakuleetera ebikwato eby'enju ye, nibyo wanywisa amarwa, hamu n'abanyoro baawe, na bakazi baawe, n'abaranga bawe; kandi okahaisaniza embandwa abaakozirwe omu zaabbu, efeeza, omulinga, ekyoma, ebiti n'omu mabaale, embandwa abatarora, abatahurra kandi abatakenga, kandi Ruhanga anyakukwatirra obwomeezi bwawe, anyakutegeka ebyawe byona ogu otamutemu ekitiinisa.

²⁴“Nikyo yatumiire omukono, omukono ogu gwonyini, nugwo gwahandiikire ebigambo binu:

²⁵Binu nibyo ebigambo ebyahandiikirwe: Okubara, Okubara, Obulemeezi, Okubaganizamu.

²⁶Amakuru g'ebigambo ebi nganu okubara, nukwo kugamba ngu: Ruhanga abazire ebiro eby'obukama bwawe, yabumaraho;

²⁷Obulemeezi, nukwo kugamba ngu: olengerwe ha minzaani, wasangwa otarukulemeerra.

²⁸Okubaganizibwamu, nukwo kugamba ngu obukama bwawe bucwirwemu, bwaheebwa Abameedi n'Abapaasa.”

²⁹Ahonaaho, Berisaza yaragira, Daneeri yajwekwa engoye eza kahuukya, n'omukuufu ogwa zaabbu; gwamugya omu bikya yarangirirwa ngu nuwe mulemi owa kasatu omu bukama obu.

³⁰Ha kiro eki kyonyini Berisaza omukama w'Abakaludaaya yaitwa,

³¹Daliyo Omumeedi omu kasumi ako akaba naahikya emyaka nka nkaaga n'ebiri ey'obukuru, nuwe yateera engoma.