Read Runyoro - rutooro Dan 7 Bible Online

Dan 7 - Runyoro - rutooro bible

Dan 7

¹Omu mwaka ogw'okubanza ogw'engoma ya Berisaza omukama wa Babbulooni, Daneeri akaroota ekirooto, akyagwijagiire akyali omu turo omutwe gwe gwamwoleka binu. Eki yaroosire akakihandiika omu bigambo bigufu.

²Daneeri akagamba ati: “Ekiro obu nkaba mbyamire nkarora emiyaga ena ey'omwiguru, neetabangura enyanja enkooto.

³Omu nyanja egi haarugamu ebisoro ebikooto bbina, ebitarukusisana.

⁴Eky'okubanza kikaba nikisisana entale kiina amapapa agarukusisana nk'ag'isamba. Obu nkaba nkyakitunuliire, amapapa gaakyo gaamenyukaho, kyaimuka hansi,, kyayemereza amaguru abiri nk'omuntu; kandi kyahebwa omutima nk'ogw'omuntu.

⁵Kandi dora ekisoro ekya kabiri eki naboine kikaba nikisisana edubu, kyemeriize amaguru gaakyo ag'enyuma; kiina omukanwa embaju isatu, kizikwasize amaino; haahulirwa iraka erirukuragira liti: ‘Imuka onene enyama nyingi.’

⁶Obu namazire kurora eki, narora n'ekindi ekirukusisana engo, hamugongo gwakyo, haroho amapapa ana agarukusisana nk'ag'ekinyonyi; kandi ekisoro eki kikaba kiina emitwe ena, eki kyahebwa obulemi.

⁷Hanyuma y'eki, omu bintu ebi nayolekerwe ekiro, nkarora ekisoro ekya kana, ekirukutiinisa ekirukukanga, kandi eky'amaani agahinguraine; kikaba kiina amaino g'ekyoma makooto, Ebiino byakyo eby'ekyoma ebikooto ebi, nibyo kyajunjubuzaaga kyasaasanguzaaga kirubaatirra ebisigaireho. Eki, kikaba kyahukaine ha bisoro ebindi ebyakyebembiire; kandi kikaba kiina amahembe ikumi.

⁸Obu nkaba nkyatunuliire amahembe ago, narora ihembe erindi, nirikununuka omu mahembe gali agandi, omumaiso g'eri, haamenyukamu amahembe asatu ha gali ag'okubanza, gaamenyukira kimu n'emihama yago. Kandi ihembe eri, likaba liina amaiso nk'agomuntu, liina n'akanwa akaabazaaga n'emyehembo okwenyumiza.

⁹Obu nkaba nkyatunuliire haatebwaho ebitebe by'obukama, kandi ogu ayabaireho ebiro byona yaikarra hali ekimu habitebe ebi, ebyokujwara bye bikaba nibyera tii nka pamba, isoke rye likaba nirisisana nk'ebyoya by'entaama ebirungi mali; ekitebe kye ekikaba kiikaliire ha nyamuziga ez'omurro, nakyo kikaba kiri murro ogurukumekuka.

¹⁰Amaiso ge gakaba nigaakwamu omurro ogutagambwa, akaba naaherezibwa abantu enkumi n'enkumi, kandi omumaiso ge, haayemerrahoga abantu obukaikuru; ekooti yaikarra kucwa emisango, n'ebitabu byasuukurwa.

¹¹Obu nkaba nkyahangire amaiso, nkongera kuhurra ihembe liri eritoito niryenyumiza. Omu kasumi ako, ekisoro ekya kana kiri kyaitwa, omutumbi gwakyo gwanagwa omu murro, gwahwerekerra.

¹²Ebisoro ebindi ebyasigaireho, byaihwaho obusobozi, baitu byaikirizibwa okwongera kwomeera okumara akasumi.

¹³Omu bwire bw'ekiro, nkagaruka nayolekwa na binu: Omu bicu by'iguru, hakaiziramu omuntu arukusisana omwana w'omuntu yagenda hali oli ayabaireho kara na kara, baammwiriza omu maiso.

¹⁴Ogu, nuwe yahairwe obulemi, ekitiinisa n'obukama, nukwo abantu ab'amahanga goona, ab'enganda zoona n'abendimi zoona bamuheerezeege; obulemi bwe, buliba bulemi obutalihwaho obw'ebiro byona. Kandi obukama bwe tibulihwerekerra.

¹⁵Nyowe Daneeri, omwoyo gukansarra, ebi nayolekerwe byantiinisa.

¹⁶Nukwo kwirirra omu hali abo abakaba beemeriire aho, namusaba angambire amazima ag'ebintu ebi byona. Yangambira, kandi yansoborra amakuru g'ebintu ebi.

¹⁷“Ebisoro ebi ebikooto ebbina, nibimanyisa abakama bbana abaliimuka omunsi.

¹⁸Baitu abarukwera ba Ruhanga, nubo balirya obukama, baikarre kimu nabwo ebiro byona.”

¹⁹Hanyuma nkenda kumanya amazima ha kisoro ekya kana, ekikaba kyahukaine ha bindi byona ekyatiinisaaga muno muno, ekikaba kiina ebiino eby'ekyoma n'enono ez'omulinga; ebi kyajunjubuzaaga, kandi ebi kyabberenguzaaga enyamaiswa zaakyo, kirubatiirra ebisigaireho;

²⁰kandi nkenda kumanya amazima ha mahembe ikumi agakaba gakimezire, asatu hali gali agakaba gakiri omumaiso gaakuuka, liri erikaba lina amaiso n'akanwa akaabazaaga ebintu ebikuru kandi eryakiraga gataahi gaalyo obukooto. Kandi nkenda kumanya ha mahembe ikumi agakaba gakimezire hamutwe, na ha ihembe erikaba likunuunukire hanyuma erikaba likwire amahembe asatu. Ihembe eri likaba liina amaiso n'akanwa kandi likaba niryenyumiza muno.

²¹Obu nkaba nkyaroleriire ihembe eri lyacwera abahikiriire obulemu lyabasingura.

²²Nubwo haizire ogu ayabaireho kara na kara, yacwera omusango abahikiriire ba Ruhanga baagusinga, akasumi abahikiriire akabaatungiiremu obukama kaahika.

²³Binu nibyo yansoboroliire ati: “Ekisoro ekya kana eki, nubwo obukama obwa kana, obuliba omunsi, bulyahukana ha makama agandi goona, bulihwerekereza ensi yoona, bugirubaatiirre, bugibberengule.

²⁴Kandi amahembe ikumi, nubo abakama ikumi, omu bukama obu, haliimukamu abakama ikumi, kandi haliimukaho ondi, abo batakyaroho; ogu aliba w'enyahukana hali bali kandi alibinga abakama abo abasatu.

²⁵Alibazaaho kubi Ogu anyakuli haiguru muno, alibonesa abahikiriire b'Ogu anyakuli haiguru muno, aliteekereza ha kuhingisa obusumi n'ebiragiro, kandi abahikiriire baliba omu busobozi bwe okumara emyaka esatu n'ekicweka.

²⁶Baitu ekooti eriikarra emucwere omusango aihweho obusobozi bwe, bucweke kandi buhwerekerre.

²⁷Kandi obukama, obulemi, n'ekitiinisa eky'amakama ag'omunsi yoona galihebwa abantu b'abahikiriire ba anyakuli haiguru muno; obukama bwabo buliba bw'ebiro byona, abalemi abandi boona balibaheereza kandi balibahurra.”

²⁸“Aho ebigambo ebi nuho byagarukiire nyowe Daneeri nkatiina muno, nasiihuuka erangi kunyiruka kumpwa hamaiso. Baitu ekigambo eki naikaraga ninkiteekereza kikanyikara hamutima.”