Read Runyoro - rutooro Dan 8 Bible Online

Dan 8 - Runyoro - rutooro bible

Dan 8

¹Omu mwaka ogwa kasatu ogw'okulema kw'omukama Berisaza, nyowe Daneeri nkagaruka nayolekwa ekintu, mmazire kwolekwa kiri eky'okubanza.

²Omu kwolekwa oku, nkarora ahonaaho ndi omu rubuga oruzitirirwe orw'omunsi Susa, orubuga orukuru orw'omwisaza Eramu; nkaba nyemeriire haihi n'ekisaaru Ulaayi.

³Obu naimukize amaiso, dora empaya y'entaama eyemeriire ha mwegeego gw'ekisaaru: Entaama egi ekaba enyina amahembe abiri; goombi garaihire, baitu erimu, likaba liraihire okukira erindi; eri niryo eryamezire hanyuma,

⁴hanyuma narora empaya egi neerumba Bugwaizooba, habukiizi obw'emoso na ha bw'obulyo; hakaba hataroho kisoro na kimu ekyasoboire kugyemerra omumaiso, kandi hataroho muntu arukusobora kugitabuka;

⁵Obu nkaba nkyahuniriire, ninyekaguza nti, kandi kinu, nikimanyisa ki haajumbuutuka empaya y'emburabuzi, yaruga Bugwaizooba, niiruka muno, ebigere byayo bitarukuhika haitaka; empaya emburabuzi egi, ekaba enyina ihembe eritali nk'amahembe goona, ligiri ha buso bwayo hagati omumaiso gaayo, ekaba inamu ihembe eritali nk'amahembe agandi.

⁶Ekaija eroleriire empaya y'entaama eri ey'amahembe abiri, ei nkaba mboine eyemeriire ha musa gw'ekisaaru yagihuruutukira egiinaho ekiniga eky'akabi.

⁷Nkagirora niirirra empaya y'entaama, ekiniga kigiri kubi, nukwo kugihuumira, amahembe gaayo abiri; entaama ekaba etarukusobora kwemerra emburabuzi omumaiso emburabuzi nukwo kugiteera hansi ekagirubaatirra; hakaba hataroho muntu n'omu arukusobora kugigijuna.

⁸Ekyarugiremu, emburabuzi yayenyumiza muno; baitu obu yagenzire neeyeyongera amaani, ihembe lyayo erikooto lyacweka, omu kiikaro kyalyo, haimukamu amahembe ana agatali nk'amahembe aga butoosa, garoleriire habukiizi obw'emiyaga ena ey'iguru.

⁹Omu ihembe erimu ha mahembe ago ana haarugamu ihembe eritoito, lyanyeeta muno, liroleriire ha bukiizi obw'obulyo, ha bukiizi obwa Burugaizooba, na ha bukiizi obw'ensi eyaraganiziibwe.

¹⁰Lyanyeeta muno, lyasobora n'okuseesira ihe ery'omwiguru, nizo enyunyuuzi zonyini, ezimu hali zo, lyaziteera hansi, lyazirubaatiirra.

¹¹Likenyumirizaaho na mukuru w'ihe eri; yaihwaho ekihongwa eky'okwokya ekya butoosa, lyaseesa ekiikaro kye ekirukwera.

¹²Ihe lyaheebwa ihembe eri hamu n'ekihongwa eky'okwokya ekya butoosa ekyahongwaga habw'ebibi; amazima gaanagwa; lyakora kyona nkooku lirukwenda.

¹³Nubwo arukwera naabaza; arukwera ondi yakagwize ogu ayabalize ati: “Ebintu binu ebi naboine omu kwolekwa ebirukukwata ha kihongwa eky'okwokya ekya butoosa, habibi ebifoora ensi matongo, na ha kuleha ekiikaro ekirukwera n'ihe bikarubaatirirwa, birimara kasumi ki?”

¹⁴Yamugarukamu ati: “Okuhika obwire obu buliira kandi bukakya emirundi enkumi ibiri omu bikumi bisatu; obu nubwo ekiikaro kirigaruka kibe nkooku kyakabaga bwona.”

¹⁵Nyowe Daneeri, obu nkaba nkyatunuliire ebintu ebi nindengaho kubyetegereza, nkarora ekintu ekirukusisana omuntu, kinyemeriire omumaiso.

¹⁶Nahurra iraka ly'omuntu niriruga hagati y'emisa y'ekisaaru Ulaayi, lyayeta liti: “Gabulyeri, soborra omuntu ogu amakuru g'ebintu”

¹⁷na uwe nukwo kunyirra haihi nambere nkaba nyemeriire; obu yaizire, natiina muno, nagwa hansi njumaire. Baitu yangambira ati: “Wetegereze, mwana w'omuntu, eky'oyolekerwe, nikimanyisa akasumi k'empero.”

¹⁸Obu akaba nakyambaliza, nagwijagira muno, nkyajumaire hansi; baitu akanyimukya yanyemereza.

¹⁹Yangambira ati: “Ninyija kukugambira ekiriruga omu kiniga kya Ruhanga habwokuba ekiniga eki, nikikwataho akasumi aka ha mpero akaatairweho.

²⁰Kandi empaya y'entaama enyakwina amahembe abiri ei waboine amahembe gaayo ago abiri nigamanyisa abakama ababiri owa Meedi na Paasa.

²¹Kandi empaya y'embuzi, egi neemanyisa omukama owa Bugiriiki ihembe erinyakuli hagati y'amaiso gaayo, eri nirimanyisa omukama ow'okubanza.

²²Kandi ihembe liri eryacwekere, omu kiikaro kyalyo haakununukamu amahembe agandi ana, eri nirimanyisa amakama ana, ihanga eri nkooku liribaganizibwamu, baitu agataliba n'obusobozi nk'obw'obukama obw'okubanza.

²³Amakama ago obu galiba gali haihi kuhwaho, abantu basiisire muno nkooku barukwenda, haliimukaho omukama ataina mbabazi, arukwetegereza ebirooto.

²⁴Aliba w'obusobozi obutagambwa, alihwerekereza muno. Kyona eki araakoraga, araakikoraga kurungi. Alihwerekereza abantu ab'obusobozi, alihwerekereza n'abantu ba Ruhanga bonyini.

²⁵Habwokuba ncwangya, kyona araakikoraga kurungi habw'obucwangya bwe. Aliba muntu w'emyehembo, kandi alihwerekereza abantu baingi atarukubahabura; baitu alihendeka, hataroho muntu n'omu amukwasireho.

²⁶Ekyayolekerwe eky'obwire kwira n'okukya ekyagambirwe, ky'amazima; kyona otalikigamba, habwokuba kiritwara omwanya mukooto kitakahikiriire.”

²⁷Nyowe Daneeri obu nahuliire eki, amagezi gampwamu, narugirwamu endwara eyammalize ebiro bingi; hanyuma nakira, natandika kukora omulimo gw'omukama; baitu eki nayolekerwe kikampuniriza muno, kyandema n'okukyetegereza.