Read Runyoro - rutooro Dan 9 Bible Online

Dan 9 - Runyoro - rutooro bible

Dan 9

¹Omu mwaka ogw'okubanza ogwa Daliyo mutabani w'Ahaswero enzarwa ya Meedi ow'akaba ali mukama w'Abakaludaaya.

²Omu mwaka ogw'okubanza ogw'obusinge bwe, nyowe Daneeri, nkeetegereza omu bihandiiko ebirukwera, emyaka eyerihingura orubuga Yerusaalemu rutakahwerekereziibwe, MUKAMA nkooku yagambiire Yeremiya omurangi, emyaka egi, eriba nsanju.

³Nubwo nararamiire MUKAMA Ruhanga, nimmusaba kandi nimwesengereza, ntaireho kusiiba njwaire eguniya, nyesiigire iju.

⁴Nkasaba MUKAMA Ruhanga wange ninyegarukamu, ningamba nti: Ai MUKAMA, ow'amaani kandi anyakutiinisa, Ruhanga omutaita ndagaano, kandi n'engonzi ezitayuga hali abo abanyakukugonza bakakwata ebiragiro byawe.

⁵Tukasiisa, twasobya, tukakora kubi kandi twayema, nitwecwaho ebiragiro n'ebigambo byawe;

⁶abaheereza bawe abarangi, abaabalizaaga bakama baitu, abanyoro baitu, baisiitwe, n'abantu boona ab'omunsi, tutabahulirize.

⁷Ai MUKAMA, niwe mukama ndugirro y'obuhikiriire baitu okukora ebiswaza, nukwo okwaitu, orole nka hati abantu ba Yuda, enzaarwa eza Yerusaalemu, na Isirairi yoona, abo abanyakuli haihi n'abanyakuli hara, omunsi zoona nambere waturarangizeemu, habw'obucwangya obu twakucwangiizeemu.

⁸Ai MUKAMA, ekyaitu na bakama baitu, abanyoro baitu na baisiitwe, nukwo kukora ebiswaza, habw'okuba tukakusiisira.

⁹Noobu tuliba twakusiisire baitu iwe MUKAMA Ruhanga waitu, oganyira kandi ogira embabazi.

¹⁰Ai MUKAMA Ruhanga waitu, obu waturagiire kukwata ebiragiro byawe ebi watuhaire nooraba omu baheereza bawe abarangi tutakuhurre.

¹¹Isirairi yoona ekacwa ebiragiro byawe, yayanga kuhurra ebi wagambire. Tukakusobeza, na iwe nukwo kututaho emikyeno eyahandiikirwe omu biragiro bya Musa omuheereza wawe.

¹²Okakora eki wagambire ngu: olikitukora, kandi ngu olikikora abalemi baitu, nootuleetera omuhito ogutagambwa; habwokuba omunsi yoona, tihakakorwaga kintu ekirukusisana kinu, ekinyakukozirwe Yerusaalemu.

¹³Nkooku kyahandiikirwe omu biragiro by'omuheereza wawe Musa, omuhito gunu gwona gutuhikireho, baitu nabwo, iwe MUKAMA Ruhanga waitu, titukakusabire kiganyiro nituleka ebibi byaitu, kandi nituta omutima ha mazima gawe. Ai MUKAMA Ruhanga waitu, noobu oraaba otufubiire nkooku kyahandiikirwe omu kitabu eky'ebiragiro bya Musa, baitu nabwo titukalengereho kuhinduka nitwanga ebibi byaitu, rundi nituhoondera amazima gawe.

¹⁴Ai MUKAMA Ruhanga waitu, okeeteekaniza kara kutufubira kandi watufubira kwo habwokuba butoosa okora ebihikire, baitu itwe tukanga kumuhurra.

¹⁵Ai MUKAMA Ruhanga waitu, iwe ayaihire abantu bawe omunsi Misiri n'obusobozi bwawe wayoleka oti obusobozi bwawe okuhika na hati, tukakusobyaho, tukakora kubi.

¹⁶Ai MUKAMA, okaturwanirra kuruga ira leka kubiihirirwa n'okugirra ekiniga Yerusaalemu, orusozi rwawe orurukwera; ebibi byaitu n'obubi obwa baisenkuruitwe, nibyo byatiire Yerusaalemu n'abantu bawe ekihemu, omu bantu boona abatuheriire.

¹⁷Hati nu Ruhanga waitu, ohuliirize nyowe omuheereza wawe arukukusaba kandi arukukwesengereza, ogarreho Enju yawe eyaseesirwe; gigarreho, abantu boona nukwo bamanye nkooku oli Ruhanga.

¹⁸Ai Ruhanga wange, tega okutu ohurre; imukya amaiso orole amatongo gaitu, n'orubuga orwarukirwe ibara lyawe; nitukusaba, habwokuba oba munyambabazi, baitu titurukukusaba, habw'ebirungi ebi twakozire.

¹⁹Ai MUKAMA otege okutu, Ai MUKAMA ganyira: Ai MUKAMA, taho omutima okole, otabandaara, Ai Ruhanga wange, ebi obikole ha bwawe, habwokuba orubuga rwawe n'abantu bawe bikarukwa ibara lyawe.

²⁰Obu nkaba ninkyabaza ninkyasaba, ninyatura ekibi kyange n'eky'abantu bange Abaisirairi, ninyesengereza MUKAMA Ruhanga wange habw'orusozi orurukwera orwa Ruhanga wange;

²¹omusaija Gabulyeri ou nkaba mboine omu kwolekwa okw'okubanza, yampikaho bwango omu kasumi ak'ekyonzira eky'orwiririzi.

²²Yangambira ati: “Wewe Daneeri, hati nyizire kukuha amagezi n'okwetegereza

²³obu natandikire kwesengereza, okagamba ekigambo hati nyizire kukikusoborra habwokuba oli nganzi; habweki, teekereza ekigambo, okenge eki wayolekerwe obu watandikire kwesengereza Ruhanga, akakugarukamu, habwokuba akugonza, hati nu, nyizire kukugambira eki yakugarukiremu. Lero otege amatu nkusoborre eki wayolekerwe.

²⁴“Musanju emirundi emyaka nsanju, nibyo bitairweho habw'abantu bawe n'orubuga rwawe, okumarraho kimu obubi, okufuuhya ebibi, okuleherra obubi, okuleeta oburungi obw'ebiro byona, kuta emanyiikirizo ha kintu ekyayolekerwe na ha murangi n'okuseesa amagita ha kiikaro ekirukukirra kimu kwera.

²⁵Omanye kandi oyetegereze; ha kasumi ekiragiro obu kyaturukiibwe okwombeka buhyaka, rube n'embaju ina ezirukwinganaingana n'omukura, baitu omu kasumi ak'omuhito.

²⁶Wiiki enkaaga na ibiri ezi obwirihwaho, omuseeswaho magita ogu aliihwaho, talihaabwa kintu kandi abantu ab'omunyoro ogu ow'aliba ali w'okwija, baliseesa orubuga n'ekiikaro ekirukwera. Empeero ye eriija n'okusandaara kw'amaizi kandi halicweka obulemu obulihikira kimu hampero; amatongo galibaho.

²⁷Omunyoro ogu, alikora n'abantu baingi endagaano egumire eya wiiki emu; kandi alitanga ebyonzira n'ebihongwa. Ekintu ekirukutiinisa kiriba ha rusu rw'enju ya MUKAMA orurukukira kuraiha, kiriikaraho okuhika ogu ayakitaireyo obu alikahikwaho eki yamutegekiire.”