Read Runyoro - rutooro Hos 1 Bible Online

Hos 1 - Runyoro - rutooro bible

Hos 1

¹Kinu nikyo ekigambo MUKAMA eki yagambiire Hoseya omu biro bya Uziya, Yosamu, Ahazi na Hezekiya abakama ba Yuda, n'omu bwa Yerobbowamu mutabani wa Yowaasi Omukama wa Isirairi, mutabani wa Beeri.

²MUKAMA obu yabandize kubaliza Isirairi naaraba omuli Hoseya, akamugambira ati: “Genda oswere omukazi ensiihani, omuzaaleho abaana ab'obusiihani, habwokuba ensi habw'okweha obusiihani, nikyo efurukiire MUKAMA.”

³Hoseya nukwo kugenda, yaswera omukazi muhara wa Diburaimu, ibara lye Gomere, omukazi yatwara enda, yazarra Hoseya omwana w'obwojo.

⁴MUKAMA akagambira Hoseya ati: “Omwana ogu omuruke ibara Yezereeri; habwokuba hasigaire akasumi kake, ninyija kufubira enju ya Yehu habw'esagama ya Yezereeri, mpwerekereze obukama obw'enju ya Isirairi.

⁵Ha kiro eki, nubwo ndicwa obuta bwa Isirairi, omu kihanga kya Yezereeri.”

⁶Omukazi yagaruka yatwara enda, yazaara omwana w'obwisiki. Yagambira Hoseya ati: “Omwisiki ogu, ibara omuruke Kinobi, habwokuba tindyongera kugirra enju ya Isirairi embabazi, tindigaruka kubaganyira n'akake.

⁷Baitu enju ya Yuda niyo ndigirra embabazi, nyowe MUKAMA Ruhanga wabo, ninyowe ndibajuna, tindibajunisa bulemu nindwana nkwasire ebitara, obuta, n'emyambi, nyina embaraasi n'abatembi b'embaraasi.”

⁸Gomere obu yacuukwire Kinobi, yagaruka yatwara enda, yazaara omwana w'obwojo ondi.

⁹MUKAMA yagambira Hoseya ati: “Ogu, omuruke ‘Tibali bange’, kandi nukwo kiri kwo, timuli bantu bange, na nyowe tindi Ruhanga wanyu.”

¹⁰Eki noobu kiraba kiri kiti, omuhendo ogw'abantu ba Isirairi gulisisana nk'omusenyi ogw'enyanja, nugwo gutasobora kulengwa rundi kubarwa; hati Ruhanga naabagamba ati: “Timuli bantu bange,” baitu ekiro kirihika eki alibagambiraho ati: “Muli baana ba Ruhanga omwomeezi!”

¹¹Abantu ba Yuda n'aba Isirairi, baligaruka bateerane beekomere omwebembezi omu, bagaruke bakule bagwagwane baikale omunsi yabo. Mazima kwo, ekiro kya Yezereeri, kiriba kiro kikuru mali!