Read Runyoro - rutooro Hos 10 Bible Online

Hos 10 - Runyoro - rutooro bible

Hos 10

¹Isirairi nugwo omuzabbibbu omukooto, ogurukwana ebijuma byagwo. Ebijuma bye nkooku birukugenda nibikanya, na uwe, nukwo arukugenda nayongera kwombeka amatambiro, ensi ye nkooku erukugenda neeyeyongera, na uwe nukwo arukugenda naayongeraho enyomyo ze.

²Abantu abo engobya, hati kibahikiriire kubonabonesibwa habw'ebibi ebi baakozire; MUKAMA amatambiro gaabo aligaseesa, enyomyo zaabo azicwacwane.

³Habwokuba obu, nubwo baligamba bati: “Titwina Mukama, habwokuba titutiina MUKAMA, kandi omukama, araatugasira ki?”

⁴Bamara gagamba ebigambo kwonka; baragaana nibataho endahiro ezi batalihikiriza; obwinganiza nikyo bufookiire kuhenderra, kwagenda nikweyongera, nk'ebinyansi ebi nyakurumu obutwa oku byeyongera omu masinde.

⁵Enzaarwa za Samaliya, balitiina kandi balirra habw'okuferwa enimi eya zaabbu eya Besaveeni. Abantu abo na banyakatagara abanyakutamu ekitiinisa ekisisani eki, balikiririrra. Obu kirirugwaho ekitiinisa kyakyo, baliteera omuranga.

⁶Ekisisani eki kyonyini, kiritwarwa Asiriya, kiri nk'omusoro ogw'omukama ow'ekitiinisa. Efuraimu alihemuka, kandi Isirairi aliswara habw'ekisisani kye.

⁷Omukama wa Samaliya alihwerekerra, asisane nk'ekibbali ky'ekiti oku kitwarwa amaizi.

⁸Ebiikaro ebikuru ebya Aveeni, Aba Isirairi ebi baramizaamu ebisisani, birihwerekerezibwa. Ha matambiro gaabo, halimeraho amahwa n'amatojo; baligamba ensozi bati: “Mutubuutikire” kandi bagambire obusozi bati: “Mutugwere”

⁹MUKAMA naagamba ati: Abantu ba Isirairi okurugirra obu baakozire ekibi omu kiikaro Gibbeya, tibakalekaga kunsobeza. Habweki nahati, Gibbeya obulemu nuho buraabasanga.

¹⁰Abantu abo entahurra ninyija kubafubira; amahanga galibeesorooleza gabafubire habw'ebibi byabo ebingi ebi baakozire.

¹¹Kara Efuraimu akaba naasisana nk'enyana enyakutendekerwe erukwenda kurubata engano ha rubuga orunyakuhuulirwaho, baitu nkaganyira ebikya byayo ebisemiire biti; Efuraimu nuwe ndukwija kutaho ekikoligo, Yuda kimuhikiriire alime, kandi Yakobbo ayeterre ebiteneke.

¹²Murwanirre obuhikiriire, mukole ebikorwa eby'embabazi ezitayuga; mwimukye amasinde ganyu, habwokuba akasumi ak'okuserra MUKAMA, nukwo aije abajune, kahikire.

¹³Mukabyara obubi, mwagesa obutahikirra, obugobya nibyo byokulya mwaliire. Habwokuba mukeesiga ebigaali byanyu, n'abaserikale banyu abaingi bati,

¹⁴habweki, obulemu nibwija kucweka omu bantu bawe, ebigo byawe byona bihwerekerezibwe, nka Salemani oku yahwerekeriizibwe Bbesaruberi, ha kiro eky'obulemu; abazaire n'abaana baabo baitirwa hamu.

¹⁵Iwe Enju ya Isirairi, habw'ekibi ekikooto eki wakozire, eki nikyo kirukwija kukukolerwa. Obulemu obu buliba nibutandika buti, omukama wa Isirairi aligenderamu obutagaruka.