Read Runyoro - rutooro Hos 11 Bible Online

Hos 11 - Runyoro - rutooro bible

Hos 11

¹Isirairi obw'akaba ali mwana muto, nkamugonza. Namwetaga mwana wange, nikyo kyamunyihisize Misiri.

²Baitu nkooku nayeyongeraga kubeeta, nabo nukwo baayeyongeraga kundugaho, baikara nibatambira ba Baali ebyonzira; n'okucuukiza ebisisani obubbaani,

³Noobu baliba baakozire ebi, baitu ninyowe nayegeseze Efuraimu kurubata. Nabakiikira omu mikono yange baitu batamanye nkooku nabatambiire.

⁴Nkabairiza haihi nimbooleka engonzi n'embabazi; nkabahimba nabateera ha itama; nkainama nabaliisa.

⁵Nkooku bangire kugaruka hali nyowe, baligaruka Misiri, kandi omukama w'Asiriya, nuwe aliba mukama wabo.

⁶Empirima erigambira omu mbuga zaabo, ehwerekereze ebihongozo by'amalembo gaabo, ebahwerekerereze omu mbuga zaabo.

⁷Abantu bange bacweriiremu kimu kundugaho; habweki bateekaniriziibwe ekikoligo, kandi busaho n'omu alikibaihaho.

⁸Iwe Efuraimu, nsobora kukuleka nta? Iwe Isirairi, nsobora kukuhayo nta? Nsobora nta kukukora nkooku nakozire Adama? Nsobora nta kukukorra nk'ebi nakoliire Zeboyimu? Eki tindukukisobora. Nkasaagana kukugonza.

⁹Tindukwija kukozesa ekiniga; habwokuba nyowe, ndi Ruhanga, tindi muntu, ninyowe Ogu Arukwera anyakwikara na inywe, habweki, tindukwenda kuhwerekereza.

¹⁰Balikuraatira MUKAMA, aliboiboita nk'entale; mazimakwo aliboiboita; abaana be baliruga Bugwaizooba baije nibatukumira;

¹¹baliruga Misiri baije nibatukumira nk'enyonyi, baliruga Asiriya baije nibakankana nk'amaiba, ndibagarra owabubo.

¹²MUKAMA naagamba ati: Efuraimu ambaliize ebisuba, enju ya Isirairi engambiire eby'obucwangya; baitu Yuda nakyamanywa Ruhanga, kandi mwesigwa hali ogu Arukwera.