Read Runyoro - rutooro Hos 12 Bible Online

Hos 12 - Runyoro - rutooro bible

Hos 12

¹Efuraimu naaliisa omuyaga, asiiba naabinga omuyaga ogwa Burugaizooba izooba lyona; abantu nibeeyongera kubiiha ebisuba n'okukatura; nibakora endagaano n'Asiriya, amagita nigatwarwa Misiri.

²MUKAMA aina omusango ogw'arukujunaana Yuda alifubira Yakobbo naarorra ha ngeso ze, alimwingainanganiza n'ebikorwa ebi yakozire.

³ Obw'akaba akyali omunda, akakwata owanyina ekikongoijo, kandi obu yakuzire, akafukaana na Ruhanga.

⁴Akamiigana na malaika, malaika yamusingura, nukwo kurra, yamusaba omugisa. Akatangaana Ruhanga omu kiikaro Beseeri, oku, Ruhanga nuho yabaliize na uwe.

⁵MUKAMA nuwe Ruhanga ow'amahe, MUKAMA niryo ibara lye:

⁶“Habweki, Ruhanga wawe akukoonyere ogaruke, ogumire ha ngonzi na ha bwinganiza, kandi oikale otegeriize Ruhanga wawe.”

⁷Omusuubuzi anyakwina minzaani etali y'amazima ogu agonza kunyaga.

⁸Efuraimu naagamba ati: “Orole nkooku ntuungire! Nyetungiire itungo”; baitu itungo lye eri lyona, tiriryeyongera buli na buli; ayereetiire omusango.

⁹Ninyowe MUKAMA Ruhanga wawe ayakwihire omunsi Misiri ndigaruka nkuraaze omu heema, nk'omu biro eby'obugenyi obw'atairweho.

¹⁰Nkabaliza abarangi, ninyowe ayaboolekere ebintu bingi, kandi ninyowe ayaganikize enganikyo nindaba omu barangi.

¹¹Giryadi obu haraaba haliyo obubi abantu nibaija kuhwerekerra. Obu baraaba nibatamba enimi, amatambiro gaabo nigaija kuba nk'entuumo ez'amabaale aga ha mpangi z'omusiri.

¹²Yakobbo akairukira omunsi Aramu, oku Isirairi nuho yakoliire omulimo nukwo atunge omukazi, kutunga omukazi akaliisa entaama.

¹³Isirairi omunsi Misiri, MUKAMA akamwihayo naakozesa, kandi akamulinda.

¹⁴Efuraimu akabiihiza muno MUKAMA; na uwe nukwo kumalirra kumujunaana ekibi eky'okuseesa esagama, MUKAMA alimusasura byona ebi yamujumire.