Read Runyoro - rutooro Hos 13 Bible Online

Hos 13 - Runyoro - rutooro bible

Hos 13

¹Efuraimu obu yabazaaga, abantu baatukumiraga; yanyumizibwaga muno omu Isirairi; baitu akakora ekibi eky'okuramya embandwa Baali, aho nuho hamurugiire kufa.

²Na hati, abantu nibakyayeyongera kusiisa, bakwata efeeza bagyagya, bagyekorramu ebisisani, ebisisani ebinyakukozirwe n'amagezi omu feeza yabo, ebisisani ebi byona, bikorwa abantu. Hanyuma bagambira abantu bati: “Ebisisani binu mubitambire ebyonzira, enyana zinu muziramye!”

³Habweki abantu abo, balisisana nk'ekiho ekya nyenkya, balisisana nk'orume orunyakukya bwango, balisisana nk'omusunga ogunyakuhuuhurwa omuyaga, gukaruga ha rubuga orunyakuhuulirwaho, kandi balisisana nk'omwika ogurukuruga omu kyoto.

⁴MUKAMA naagamba ati: Ninyowe MUKAMA Ruhanga wawe ayakwihire omunsi Misiri; toina Ruhanga ondi atali nyowe, kandi okwihaho nyowe, tiharoho mujuni ondi.

⁵Obwokaba oli omwirungu omunsi enyakwomere, ninyowe nakuroleerraga.

⁶Baitu obu wataahire omunsi enu, waiguta wasemererwa ekyarugiremu, nukwo kwekuliiriza, waanyebwa.

⁷Habweki, ndibasisanira nk'entale, ninyija kubabundarra nk'engo haihi n'omuhanda.

⁸Ndibagwera nk'edubu enyakunyagirweho obwana bwayo, mbajunjuburre aho nk'entale, nk'enyamaiswa ey'omwirungu oku yaakubataagwire.

⁹Iwe Isirairi, ndikuhwerekereza; n'oha asobora kukujuna?

¹⁰Kandi bunu, Omukama wawe ow'okukujuna ali nkaha? Abanyoro bawe boona ab'okukurwanirra bali nkaha? Bali nkaha abo, aba waikaraga noosaba oti: “Mpa omukama, ompe n'abanyoro?”

¹¹Nkakuha abakama mbiihiirwe, kandi mbakwihireho ekiniga kiraaliire kunyita.

¹²Ekibi ky'Efuraimu kikahandiikwa, kyayahurwa.

¹³Ebisa nk'eby'okuzaara nibimuhikaho baitu omwojo ogu tali mwetegereza; akasumi ke ak'okuzaarwa kahikire baitu alemiire omunda.

¹⁴Obu abantu abo, mbacungule mbaihe Nyabuyonga? Mbatabule orufu? Iwe Rufu, omuhito gwawe guraha? Iwe nyabuyonga, kuhwerekereza kwawe kuli nkaha? Tinkyaina mbabazi.

¹⁵Efuraimu noobu akutintima nk'ekitugutu, haliija omuyaga ogwa Burugaizooba, nugwo omuyaga gwa MUKAMA; gulyomya ensoro ye gulisiiriiza iziba lye. Ebintu eby'omuhendo byona, eryahurro lye limarwemu.

¹⁶Obu Samaliya nubwo erifubirwa, habw'okwemera Ruhanga wayo; abantu baligwa omu bulemu baitwe ebitara, abaana baabo balihinjahinjurwa, kandi bakazi baabo abaliba baina enda, ziribaihwamu;