Read Runyoro - rutooro Hos 14 Bible Online

Hos 14 - Runyoro - rutooro bible

Hos 14

¹Iwe Isirairi, ogaruke hali MUKAMA Ruhanga wawe, habwokuba obubi bwawe nubwo bwakusiitaize.

²Ogaruke hali MUKAMA, kandi esaara enu, niyo ebe kihongwa eki olimuhongera; omugambe oti: “Otuganyire ebibi byaitu, kandi oikirize okwesengereza kwaitu, nukwo tukuhaise nkooku twaraganiize”.

³Asiriya tesobora kutujuna naakake, n'embaraasi ez'obulemu tiisobora kutulinda, ebisisani byaitu tituligaruka kubigamba tuti: niinywe Ruhanga waitu. Ai MUKAMA, niiwe ogirra embabazi abo abataina bwirukiro.

⁴MUKAMA naagamba ati: Abantu bange ndibeegarurra. Ndibagonza n'omutima gwange gwona; tinkyabainaho kiniga.

⁵Isirairi ndimutoonyera nk'orume; alyakya nk'ekimuli nk'iranga alinaga emihama nk'emiti eya Lebbanoni.

⁶Amataagi ge amato galimera; alisemera nk'emiti ey'Oliva, kandi aliboya nka siida eya Lebbanoni

⁷Baligaruka baraale omu kiituuru kyange, balitigiizira nk'ebibyarwa by'omumusiri; balyakya nk'omuzabbibbu,

⁸baliboya eviini ya Lebbanoni. Abantu ba Isirairi tibaligaruka kuramya embandwa; ndaabahaga eki barukusaba kandi ndaabarolerraga. Ndaabaaswekerraga nk'omuti ogunyakwikara gujumbire; ndaaba nsoro ey'ebirungi byabo byona.

⁹Omuntu wena anyakwina amagezi, akenge ebigambo binu; weena omwetegereza, abyetegereze; habwokuba emihanda ya MUKAMA, eba mihanda eterekeriire kandi abantu abarungi, nubo bagirabamu, baitu ababi, bagyesiitarramu.