Read Runyoro - rutooro Hos 2 Bible Online

Hos 2 - Runyoro - rutooro bible

Hos 2

¹Gambira bagenzi baawe oti “Bantu bange,” na banyanya ngu “Bagirirwe embabazi.”

²“Baana bange, muhane nyina inywe, habwokuba takyali mukazi wange na nyowe tinkyali iba, afuuhye obusiihani bwe oburukumuzooka ha maiso ge, acwe orwanju rwe orunyakuli hagati y'amabeere ge,

³obwataakole eki, ninyija kumujuura aikale kwonka nkooku akaba ali ha kiro eki yazaalirweho, ndimufoora nk'ensi enyakwomere etaina rwezo, mmwise iroho.

⁴Abaana be tindibagirra mbabazi, habwokuba baana b'ebitwekano.

⁵Habwokuba nyinabo akeeha obusiihani; ogu kibatwara omunda akakora ebiswaza. Habwokuba akagamba ati: ‘Ndagenda nserre enganjani zange, abanyakumpa ebyokulya n'amaizi, abanyakumpa ebyoya by'entaama, engoye eza kitaani, amagita n'amarwa.’

⁶Habweki, omuhanda gwe ninyija kuguzitiraho amahwa; mmukingire n'ekisiika aburwe nambere araaraba.

⁷Alirengaho kuhondera enganjani ze baitu talibakwata; kandi alibaserra baitu talibazoora. Nubwo aligamba ati: ‘Leka nyegarukire hali iba nyowe ow'okubanza, habwokuba obu nkaba ndi nawe, nkaba ndi kurungi okukira nkooku ndi hati.’

⁸Ebyokulya, amarwa, n'amagita, atamanye nkooku yabiheebwaga nyowe, nkooku namurundiraga efeeza na zaabbu ei baakoziremu Baali.

⁹Hati nu, engano yange, ninyija kugimwihaho omu kasumi kaayo, eviini yange ngimwiheho omu mwaka gwayo; ebyoya by'entaama n'engoye eza kitaani ezi namuhaire kujwara na byo mbimwiheho.

¹⁰Obusiihani bwe ndibwoleka, enganjani ze ziburole kandi busaho muntu n'omu alisobora kumutanga.

¹¹Byona ebikyanganura, amagenyi ge, ameezi g'emboneko, Sabbato ze, n'amagenyi ge goona agaatairweho, ndibiihiraho kimu.

¹²Emizabbibbu n'emitini ye ei yagambaga ngu ‘Enu nkagiheebwa enganzi zange habwokubaheereza’, ndigihuukya ngifoole kibira, eriibwe enyamaiswa ez'omu kisaka.

¹³MUKAMA nagamba ati: Ebiro ebikuru ebya Baali, ebi yacumiikirirrahoga obubbaani, naajwara n'empeta n'amabaale ag'omuhendo, akagenda kuserra enganzi ze; nyowe akaanyebwa, ndibimufubirra.

¹⁴Habweki ndimusoonasoona mmutwale omwirungu, mmubalize ebigambo eby'embabazi.

¹⁵Oku nuho ndimugarururra emizabbibbu ye, ekihanga ekya Akora nkifoole rwigi orw'okunihira. Oku nuho alingarukiramu nkooku yangarukamuga ali muto, nkooku yangarukamuga obw'akaba naaruga omunsi Misiri.

¹⁶MUKAMA naagamba ati: Ekiro eki obu kirihika, aliinyeta ‘iba’, taligaruka kuunyeta mbandwa ‘Baali.’

¹⁷Ndimutangira kimu kugaruka kubazaaho ibara erya Baali, ibara eri tiriryongera kubazibwaho.

¹⁸Ha kiro eki, ndikora endagaano n'ebintu byona ebinyakwekurra haitaka, bireke kukora akabi abantu bange nukwo baikale n'obusinge kandi bateekaane.

¹⁹Iwe Isirairi, ndikuswera obe mukazi wange ow'ebiro byona; ndikubeera w'amazima kandi mwesigwa; ndikwoleka engonzi n'embabazi ezitaijurruka, nkufoole wange owa buli na buli.

²⁰Ndihikiriza eki naraganiize nkufoole wange, nubwo olimanya nkooku ndi MUKAMA.

²¹Ha kiro eki, ndiha abantu bange Abaisirairi eki barukusaba, ndinaga enjura omunsi.

²²Ensi erimeza engano, emiti emizabbibbu, n'emiti eyamagita.

²³Abantu bange ndibagumya omunsi mbaikaze kurungi. Abo abaayetwaga Kinobi, ndibooleka engonzi, n'abo abaayetwaga Tibali bange, ndibagamba nti: ‘Muli bantu bange.’ Nabo balingarukamu bati: ‘Oli Ruhanga waitu.’”