Read Runyoro - rutooro Hos 4 Bible Online

Hos 4 - Runyoro - rutooro bible

Hos 4

¹Inywe abantu ba Isirairi muhurre ekigambo kya MUKAMA; MUKAMA naajunaana abasi b'ensi enu. Ensi enu terumu bwesige n'embabazi, kandi temanyire Ruhanga;

²abantu nibarahira, nibabiiha ebisuba, nibaita, nibaiba kandi beehaire obusiihani; ebiragiro byona nibabicwera kimu, kandi nibaita obutalekerra.

³Eki nikyo kirukuliza ensi, kandi boona abanyakugirumu, nikyo kirukubamara amaani, otaireho n'enyamaiswa ez'omu kisaka n'enyonyi ez'omu mwanya; n'obwakubaire encu ez'omu nyanja, nazo niziija kuhwerekerra.

⁴Hatabaho omuntu ateera empaka, kandi hatabaho n'omu ajunaana, habwokuba iwe nyakatagara, niwe ndukujunaana.

⁵Oyesiitara nyamusana n'ekiro, abarangi nabo nukwo bakora; nikyo ndukwija kuhwerekerereza Isirairi nyoko.

⁶Ekirukuhwerekereza abantu bange, nubwo obutaamanya. Inywe banyakatagara nkooku mwayangire kunyikiriza kandi mwayanga n'okukwata ebigambo byange, na nyowe nukwo ndukubanga, kandi abaana banyu tindibaikiriza kuba banyakatagara bange.

⁷Nambere baagarukiire kukanya, nuho baahikize n'okunsiisira; ekitiinisa kyabo ninyija kukifoora nsoni.

⁸Ebibi abantu bange ebi bakora, bo nibyo baihamu ebyokulya, ebibalya; nukwo kugonza basiise.

⁹Ekirihikaho abantu, nikyo kirihikaho na nyakatagara; ndibafubira babw'engeso zaabo, ndibainganainganiza n'ebikorwa byabo.

¹⁰Ego balirya, baitu tibaliiguta; balyeha orwanju, baitu tibalikanya; habwokuba bakanaga MUKAMA, beeheere kimu orwanju.

¹¹Orwanju, amaarwa g'amakiira n'agomutararra bimara amagezi.

¹²Abantu bange beekaguzaaho ekintu ekyakozirwe omu muti omwigo nugwo gubagarukamu eki barukukaguza; habwokuba omwoyo ogw'obusiihani gukabahabya, nukwo kurugaho Ruhanga wabo, baayemarra ha rwanju.

¹³Ha mitwe y'ensozi nuho batambira ebyonzira, kandi ha busozi hansi y'omuti omuhomozi, hansi ya kalituusi na terebinsi, nuho bahongera ebihongwa emiti egi, ngu habwokuba ina ekiituuru ekirungi. Nikyo bahara banyu beemaliire ha rwanju, kandi bakazi banyu abagole nukwo kweha obusiihani.

¹⁴Eki noobu kiraaba kiri kiti, bahara banyu tindukwija kubafubira habw'orwanju rwabo, na bakazi banyu abagole timbafubire habw'obusiihani bwabo, kandi kunu n'abandi boona nibajeerajeera bali hamu n'abanyarwanju, nibatamba ekyonzira baina abasiihani, abantu abadoma nukwo balihwerekerra bati.

¹⁵Iwe Isirairi noobu oraaba wayehaire orwanju, Yuda, na iwe otakora oti. “Ndahiire Ruhanga omwomeezi.” Mutagenda Girigali rundi Besaveeni.

¹⁶Isirairi akozire nk'enyana eyeremere, MUKAMA asobora kumuliisa nkooku aliisa omwana gw'entaama omu iriisizo eryeyanjaire?

¹⁷Efuraimu akeekomera kuramya embandwa.

¹⁸Kitebe ky'abatamiizi, abayehaire orwanju; obuhemu nubwo bagonza, okukira ekitiinisa kyabo.

¹⁹Omuyaga gulibahuuhuura gubatwale hara, ebyonzira byabo biribakwasa ensoni.