Read Runyoro - rutooro Hos 6 Bible Online

Hos 6 - Runyoro - rutooro bible

Hos 6

¹“Mwije nu, tugaruke hali MUKAMA; habwokuba nuwe yatuhutaize nukwo atutambire; nuwe yatucumisire nukwo atukize.

²Nihaija kuhinguraho ebiro bibiri atwomeeze; ha kiro kya kasatu atwimukye twemerre, nukwo twikale omu maiso ge.

³Tumanye, kandi tweyongere kumanya MUKAMA; okwija kwe kuroho kwo nkooku emamba ebaho; alituhikaho nk'enjura, nk'enjura ey'irumbi enyakwitirra ensi.”

⁴Iwe Efuraimu, ndaakukora ki? Iwe Yuda, ndaakugira nta? Engonzi zanyu nizisisana nk'ekiho ekinyakugwa nyenkya, nizisisana nk'orume orunyakukya bwango.

⁵Nikyo nabatumiireho abarangi bange, babagambire ebigambo byange eby'okucwerwa omusango n'okuhwerekerra.

⁶Eki ndukwenda nizo engonzi zanyu ezitayuga, mutagira ninyenda ebyonzira eby'ebisoro byanyu. Eki ndukukira kugonza, abantu bange nukwo kummanya okukira okunyookeza ebihongwa.

⁷Baitu omu Adamu bakacwa endagaano naragaine nabo; oku nuho bankoliire ebitali by'obwesigwa.

⁸Giryadi nurwo orubuga orwijwire enkozi z'ebibi n'abaisi b'abantu.

⁹Nk'abanyagi oku beeserekerra omuntu na banyakatagara nukwo barukwesorooza nibaita abantu ha muhanda ogurukutwara Sekemu. Ego, nibakora ekintu ekirukwingana aho!

¹⁰Omunju ya Isirairi mboinemu ekintu ekibi ccu; omu Efuraimu nuho arukwanjukira, Isirairi nuho yasiisikaliire.

¹¹Kandi na inywe abantu ba Yuda nyina akasumi aka ntekaniize ak'okubafubirramu, habw'ebintu ebi murukukora.