Read Runyoro - rutooro Hos 7 Bible Online

Hos 7 - Runyoro - rutooro bible

Hos 7

¹Obungira nti kantambire Isirairi, ndora obubi bw'Efuraimu, n'ebintu ebibi Samaliya ebi arukukora; habwokuba tibaina bwesige, abasuma nibacwa amaju, abanyagi aheeru nibanyaga.

²Tibarukuteekereza nkooku mmanyire ebibi byabo byona ebi bakora. Nibakora ebibi bingi, kandi ebi byona nimbirora.

³Obubi bwabo nubwo busemeza omukama, kandi obugobya bwabo nubwo busemeza abalemi.

⁴Boona basiihani; bali nk'ekyoma kacumbirwamu migaati, mukama wakyo alekera aho kuhembamu omurro, okuruga ha kasumi akaamarraho kutuga ensaano, okuhika ensaano obu ekatumba.

⁵Ha kiro eky'omukama waitu, abalemi barwazibwa omutarara; omukama na uwe, ayetaba n'enkozi z'ebibi ezi.

⁶Emitima yabo ikara etuumire nk'ekyoma kacumba migaati habw'obubi obu bategeka kukora; bakiisa obwire ekiniga kyabo nikijundeera; obwire obu bukya kyaka nk'omurro oku gwaka.

⁷Boona baikara batuumire nk'ekyoma, ekirugamu, nukwo kwita abalemi baabo. Bakama baabo boona nukwo baafiire bati, baitu hatabeho n'omu hali bo ayanteeriire omuranga mmukonyere.

⁸MUKAMA naagamba ati: Abantu ba Isirairi, nibasisana nk'omugaati ogutumbisiibweho ekicweka. Nibeesiga amahanga aga baherraine kandi tibarukwetegereza okwesiga abanyamahanga oku, nkooku kwabamazire amaani. Ebiro byabo basigaize bike, eki, bbo tibarukukimanya. Efuraimu naayetaba n'amahanga, Efuraimu mugaati ogutahindwirwe.

⁹Abanyamahanga nubo barukumumara amaani, eki, uwe takimanyire. Amazire enju, eki tarukukyetegereza.

¹⁰Okwekuza kwa Isirairi, nukwo kurukumusingisa omusango; eki noobu kiraaba kiri kiti, tibarukugaruka hali MUKAMA Ruhanga wabo, rundi kumuserra.

¹¹Efuraimu naasisana nk'eriiba eridoma kandi eritarukwetegereza, nikyo arukwesigira Misiri, kandi nikyo arukugendera Asiriya, ngu nuho araatunga obukoonyezi.

¹²Obu baliba nibagenda, ndibatega ekitimba, ndibateera hansi nk'enyonyi ez'omu mwanya; ndibafubira habw'ebibi ebi baakozire.

¹³Balikibona habw'Okundugaho! Balihwerekerra habw'okunjeemera.

¹⁴Tibankunga omuranga n'omutima ogw'amananu, baboroogera aho ha bitabu byabo; beehutaaza habw'engano n'amarwa.

¹⁵Noobwakubaire ninyowe nabatendekere nabafoora b'amaani bakeeteerana kundiirana.

¹⁶Nibagenda hali Baali. Bali nk'obuta oburamaire obutarukwesigwa, abalemi baabo baliitwa empirima habw'ebigambo eby'okwekuliiriza ebi babaza. Kandi Abanyamisiri, balibasekereza muno