Read Runyoro - rutooro Hos 9 Bible Online

Hos 9 - Runyoro - rutooro bible

Hos 9

¹Iwe Isirairi, leka kusemererwa oteesiima nk'amahanga agandi; habwokuba okanaga Ruhanga wawe, wayeha orwanju. Wagendaga nooyetunda ha mbuga zoona ez'okuhuulirwaho.

²Habwokuba, engano n'amagita nibiija kukukeehaho amarwa nago gakuhweho.

³Abantu ba Isirairi tibaliikara omunsi ya MUKAMA; balihambirizibwa kugaruka Misiri, n'okulya ebyokulya ebirukuzira, omunsi Asiriya.

⁴Tibalyongera kuhongera MUKAMA ekihongwa eky'eky'okunywa; kandi tibalyongera kumutambira byonzira, eby'alisiima. Habwokuba ebyokulya ebi, biriba by'okuliibwa abantu abarukugaragara; boona abalibiryaho balisiisikara; habwokuba ebyokulya ebi, biriba by'okuliibwa bo bonka; tibiriikirizibwa kutaaha omunju ya MUKAMA.

⁵Akasumi ak'ebiro ebikuru eby'okutamu MUKAMA ekitiinisa akaatairweho obu kalihika, abo balikora ki?

⁶Mbabo nibagenda Asiriya; Misiri nuho balyesorooleza. Memufiisi nuho baliziikwa. Nambere hakaba hali amaahurro gaabo ag'efeeza halimeramu omumya; nambere haabaga eheema zaabo, halimeramu amahwa.

⁷Ebiro eby'okufubirwa bihikire, akasumi ak'okusasura kahikire. Eki Isirairi osemeriire kukimanya. Iwe nogamba oti: omurangi onu mudoma, omusaija onu arukutembwa omwoyo muguw'iraro, eki nikirugirra ha bubi na ha nobi yawe ebitagambwa.

⁸Omurangi ogu nuwe aba mulinzi w'Efuraimu, abantu aba Ruhanga wange, baitu omutegi w'enyonyi amutegere emitego omu mihanda ye yoona kandi omunju ya Ruhanga we harumu enobi.

⁹Abantu bakasiisikarra kimu nkooku bakaba bali omu kiikaro Gibbeya; kwijuka ebibi ebi baakozire, abafubire habw'ebibi ebi.

¹⁰MUKAMA naagamba ati: Obu nabandize kurora Isirairi, nkasisana nk'arukurora emizabbibbu enyakumezire omwirungu. Obu nabandize kurora baisenkuru-inywe, nkasisana nkarukurora ebijuma by'omutini ebyanire omu mwaka gwabyo. Baitu obu baahikire Baali-Peyora, baatandika kuramya nabo nukwo kubiihira kimu nk'eki, eki baagondeze.

¹¹Ekitiinisa ky'Efuraimu, kirihweraho kimu, nk'enyonyi enyakuhurruka ekagenda hara. Tihaligaruka kuzaarwa baana, abakazi tibaligaruka kubaka, kandi tibaligaruka kutwara enda!

¹²Noobu balibooroora boona ndibabaihaho mbamaleho, tihalibaho n'omu. Haa! Obu ndibarugaho, balikibona.

¹³Nyowe nkooku ndukurora, abaana b'Efuraimu b'okwitwa; Efuraimu wenka, abaana be nuwe alibeebembera kubatwara omu ifeero.

¹⁴Ai MUKAMA, nkusabe obakole ki? Bakazi baabo obahe kwikara nibaihamu enda, kandi obabuze amata baleme kwonkya.

¹⁵MUKAMA naagamba ati: Girigaali nuho baabandiize kukora buli kibi kyona, na nyowe nuho natandikiire kubanoba. Ndibabinga omunju yange habw'ebibi ebi baakozire, ndibafuuhiza kimu; habwokuba abalemi baabo boona beemi.

¹⁶Abantu ba Isirairi, nibasisana nk'ekimera ekinyakwomere emihama, kandi ekitaana kijuma. Tibalizarra baana, kandi noobu baakubazaire, abaana abo aba bamaliizeeho muno omutima, naakubaisire.

¹⁷Ruhanga wange, alibanaga, habwokuba bakanga kumuhurra; baraikaraga nibenjeera omu mahanga.