Read Runyoro - rutooro Yow 1 Bible Online

Yow 1 - Runyoro - rutooro bible

Yow 1

¹Kinu nikyo ekigambo, MUKAMA eki yagambiire Yoweri mutabani wa Pesweri:

²Inywe abagurusi, muhurre kinu, inywe inywena abasi b'ensi enu, muhunde amatu! Omu kasumi kaanyu, rundi omu kasumi ka baisenkuru-inywe, ekintu nk'eki kirabaireho?

³Mukisubirre abaana banyu, abaana banyu balikigambira abaana baabo, kandi abaana baabo, bakitebeze abantu eb'ebiro ebirukwiija.

⁴Ebyasigirwe enzige kacwacwana, omuzinga gw'enzige gubiriire. Ebyasigirwe omuzinga gw'enzige, enzige kaguruka zibiriire kandi ebyasigirwe enzige kaguruka, enzige kahwerekereza zibiriire.

⁵Mwimuke, inywe abatamiizi, murre; inywe inywena abaayehaire amaarwa, muteere omukungo, habw'okuba amaarwa ago aganyakubanurra, mugatemwire.

⁶Habwokuba, haroho ihanga erinyakuseesiire ensi yange, ihanga ery'amaani, kandi ery'abantu abatasobora kubarwa; amaino gaalyo gali nk'ag'entale, kandi, linyina ebisongezo ebyobusegu nk'eby'ebuguma y'entale.

⁷Lihwerekeriize emizabbibbu yange, lyaasayasize emikunyu yange; ligihoogereho ebisusu byayo, lyaginaga hansi; amataagi gaayo, nigeera ti.

⁸Bantu inywe, muteere empamo nk'omwisiki empikirre anyakujwaire ebitengo, arukulirirra omusigazi ow'akaba amujumbiire, yafa atakamugabwire.

⁹Ekihongwa eky'ebyokulya n'eky'ekyokunywa, tibikyagaruka kuzooka omunju ya MUKAMA. Baanyakatagara abaheereza ba MUKAMA batuntwire.

¹⁰Emisiri ehwerekereziibwe, itaka niriteera empamo; habwokuba, engano ehwerekeriire, eviini tekyaroho, amagita gakeehere.

¹¹Inywe abalimi muhwe amasiko, inywe abanyakunogorra emizabbibbu mutemu ekyoboobo, habw'engano na sayiri; habwokuba busaho ky'okugesa, omusiri gukabuuleezibwa.

¹²Emizabbibbu ehotokere, emitini eraaliire kugwa. Emikomamahanga, emikindo, ebijuma, n'emiti yoona ey'omukisaka, ehotokere; abaana b'abantu, tibakyaina kusemererwa.

¹³Inywe banyakatagara mweteege obutengo, kandi muteere empamo, inywe abaheereza ab'itambiro, muborooge. Mutaahe omunju ya MUKAMA mukiise obwire nimurra. Inywe abaheereza ba Ruhanga wange! Habwokuba, tihakyaroho ngano rundi eviini, eby'okuhongera Ruhanga wanyu.

¹⁴Muragire abantu basiibe, mubeete basorrokane! Musorooze abakuru n'abantu boona abasi b'ensi enu, mubataahye omunju ya MUKAMA Ruhanga wanyu; mumuterre omuranga.

¹⁵Ekiro eki nikikafuuhe! Ekiro eki ekya MUKAMA kiri haihi, nikiija kiri nk'okuhwerekereza okurukuruga hali ow'Obusobozi bwona.

¹⁶Ebyokulya tibihoire niturora tuti? Omunju ya Ruhanga waitu, hakyarumu omuhimbo n'okusemererwa?

¹⁷Embibo nizoomera hansi y'itaka, amaahurro tigarumu kantu; enguli zaatikire habwokuba, engano ekafa.

¹⁸Muhurre ebisoro nkooku birukusinda! Amahyo g'ente habw'okuburwa obunyansi gasobiirwe; amagana g'entaama nago, nigabonabona.

¹⁹Ai bambi MUKAMA, niiwe ndukukunga: habwokuba omurro guliire amaliisizo omwirungu, oruhiira rwokeze emiti yoona ey'omukisaka.

²⁰Ego enyamaiswa z'omukisaka nizikuliriirra habwokuba obwambu, bw'amaizi bwomere, omurro guliire amaliisizo g'omwirungu.