Read Runyoro - rutooro Yow 3 Bible Online

Yow 3 - Runyoro - rutooro bible

Yow 3

¹Omu biro n'omu kasumi aka ndizaahurramu Yuda na Yerusaalemu,

²ndisorooza amahanga goona, ngatwale omu kihanga kya Yehosafaati, nuho ngacwererre omusango, ningajunaana abantu bange, kandi obugwetwa bwange, nubo Abaisirairi habwokuba bakabararangya omu mahanga, ensi yange baagibaganiza,

³abantu bange babateeriire itomo, baahayo omwojo, nukwo batunge malaaya, kandi baahayo omwisiki nukwo batunge eviini, kandi baaginywa.

⁴ MUKAMA agambire ati: “Iwe Tiiro na iwe Sidoni, n'ensi zoona eza Firisitiya, muli ki hali nyowe? Mwina eki murukumpoora enzigu? Obu muraaba nimumpoora enzigu, inywe inywenka, ninywe ndukwija kuhoora enzigu, bwango kandi ahonaaho.

⁵Habwokuba, mukanyaga efeeza n'ezaabbu yange, mwatwaara ebintu byange eby'omuhendo, omu maramizo gaanyu.

⁶Abantu ba Yuda n'aba Yerusaalemu, mukabaguza Abagiriiki, mwabaiha omu mutaano gwabo, mwabatwaara hara.

⁷Baitu nambere mwabagulize ninyija kubaihayo, eki mwabakozire, nikyo ndukwija kubakora.

⁸Batabani banyu na bahara banyu, ninyija kubaguza batabani ba Yuda, bo babaguze Sebba, ihanga erinyakuli hara muno.”

⁹Kinu, mukirangirre amahanga nimugamba muti: Muteekanize obulemu, mwete abasaija ab'amaani. Abasaija boona abarwani, bairre haihi baije.

¹⁰Enfuka zaanyu mwiheesemu empirima, kandi ebisalizo byaanyu, mubiheesemu amacumu; enceke eyebuge eti, “Ndi murwani.”

¹¹Inywe amahanga goona agaherraine, murahuke mwije, oku, nuho mwesorooleze. Ai MUKAMA, leeta abarwani baawe.

¹²“Amahanga gaimuke, gaije omu kihanga kya Yehosofaati; habwokuba oku, nuho ndiikarra, ncwere omusango amahanga goona agaherraineho.

¹³Mugire mutemu enoijoro habwokuba, igesa lihikire. Mugire muragalemu mujunge, habwokuba endeeba ijwire. Entugiro ziijwire niziibooga habwokuba, okusiisa kwabo kuhiinguraine”.

¹⁴Abantu enkuyanja n'enkuyanja, bali omu kihanga eky'okucweramu emisango! Habwokuba ekiro ekya MUKAMA kiri haihi omu kihanga eky'okucweramu emisango.

¹⁵Izooba n'okwezi, biswekerwe omwirima, kandi enyunyuuzi zizimire.

¹⁶MUKAMA alyeema Siyoni abbuukule, alibbaruka iraka lye lirihulirwa niriruga Yerusaalemu, kandi iguru n'ensi biritengeeta. Baitu MUKAMA nuwe bwirukiro bw'abantu be, nuwe bugumizo bw'abantu be Abaisirairi.

¹⁷Obu, nubwo mulimanya nkooku ninyowe ndi MUKAMA Ruhanga wanyu, anyakwikara Siyoni, orusozi rwange orurukwera. Yerusaalemu ruliba rubuga orurukwera, kandi abanyamahanga ebiro byoona tibaligaruka kururabamu.

¹⁸“Ha kiro eki, ensozi zirirugwamu eviini erukunulirra, obusozi bulijurumuka amata, ensoro z'obusaaru bwa Yuda bwona buligera amaizi; kandi ensoro erituruka omunju ya MUKAMA, itirre ekihanga kya Sitimu.

¹⁹Habw'omuhito ogu baaboneseze abantu ba Yuda, Misiri erifooka itongo kandi Edomu efooke irungu eritasobora kwikarwamu habwokuba bakasesira busa omunsi yabo esagama y'abataina musango.

²⁰Baitu Yuda eriikarwamu na Yerusaalemu eriikarwamu ebiro byona.

²¹Ndibahorra enzigu habw'esagama yabo, kandi tindibaihaho musango, habwokuba MUKAMA aikara Siyoni.”