Read Runyoro - rutooro Amos 1 Bible Online

Amos 1 - Runyoro - rutooro bible

Amos 1

¹Binu nibyo ebigambo ebyagambirwe Amosi, omu ha baliisa ab'omu rubuga Tekowa. Omu businge bwa Uziya omukama wa Yuda, n'omu bwa Yerobbowamu mutabani wa Yowaasi omukama wa Isirairi, Ruhanga ebi yamusuukuliire byona ebirukukwataho Isirairi, emyaka ebiri omusisa gutakabaireho.

²Amosi akagamba ati: “MUKAMA naaburugutira Siyoni naabbarukira Yerusaalemu; amaliisizo g'abaliisa geenuubire nigaganya, akatwetwe k'orusozi Karumeeri kahotokere.”

³MUKAMA naagamba ati: “Habw'ensobi isatu rundi ina Damasiko ezi yakozire tindukwija kugibuzaaho kifubiro; habwokuba, bakahuura muno abantu ba Giryadi n'ebihuuzo eby'ebyoma.

⁴Habweki, ekikaali ekyombekerwe Omukama Hazeeri, ninyija kukinagaho omurro, gucwekereze ebigo by'Omukama Bbeni-hadadi.

⁵MUKAMA naagamba ati: Ndicwacwana ebihongozo by'amalembo ga Damasiko, mmaleho enzaarwa ez'omu kihanga Aveni, n'ogu anyakukwasire omwigo gw'obukama ow'arukuruga omunju ya Bbesi-edeni; kandi abantu ba Siriya, balizaahisibwa batwarwe Kiri.”

⁶MUKAMA naagamba ati: “Habw'ensobi isatu rundi ina, Gaza ezi yakozire, tindukwija kugibuzaaho kifubiro, habwokuba, bakazaahya ihanga lyona, baliha Edomu.

⁷Habweki nu, nanyowe, ekisiika ky'orubuga Gaza ninyija kukinagaho omurro. Guhwerekereze ebigo byarwo byoona.

⁸MUKAMA naagamba ati: Ndihwerekereza abantu b'Asidoodi, n'ogu arukwiha Asikeloni omwigo gw'obukama; ndifubira orubuga Ekurrooni, Abafirisiti boona abaliba basigaireho, nukwo bahwerekerre.”

⁹MUKAMA naagamba ati: “Habw'ensobi isatu rundi ina Taaya ezi yakozire tindukwija kugibuzaaho kifubiro, habwokuba ihanga lyona bakaliha Edomu, baalema kwijuka endagaano ey'obunyaruganda.

¹⁰Habweki nu, nanyowe, ekisiika ky'orubuga Taaya ninyija kukinagaho omurro, gusiiriize ebigo byarwo.”

¹¹MUKAMA naagamba ati: “Habw'ensobi isatu rundi ina Edomu ezi yakozire, tindukwija kugibuzaaho kifubiro, habwokuba ekahambya owanyinayo ekwasire empirima yayangira kimu kumugirra embabazi, ekiniga kyayo kyaikara nikyeyongera, yaikara neeswakira buli na buli.

¹²Habweki nanyowe, Temani ninyija kuginagaho omurro, gusiiriize ebigo bya Bbozira.”

¹³MUKAMA naagamba ati: “Habw'ensobi isatu rundi ina Abamooni ezi baakozire, tindibabuzaaho kifubiro, habwokuba, abakazi aba Giryadi abakaba baina enda, bakababaagamu abaana, nukwo bairize omumaiso omutaano gwabo.

¹⁴Habweki nu, nanyowe, ekisiika kya Rabba, ninyija kukicumika omurro, gucwekereze ebigo byayo, ha kiro eky'obulemu nukwo habeyo obwogo, ha kiro eky'akairiringwa, nukwo habeyo ihunga;

¹⁵Omukama wabo alizaahisibwa, uwe n'abanyoro be balikwata omuhanda gumu.”