Read Runyoro - rutooro Amos 3 Bible Online

Amos 3 - Runyoro - rutooro bible

Amos 3

¹Inywe abantu ba Isirairi, muhurre ekigambo kinu MUKAMA eki ababalizeeho, inywe ihanga lyona eri yaihire omunsi Misiri.

²Omumahanga goona ag'omunsi, inywe inywenka niinywe nammanyire, kandi niinywe nagondeze. Eki nikyo ndabafubirra, habw'ebibi byanyu byona.

³Abantu ababiri obu baba bataragaine bagenda hamu?

⁴Entale obu eba etakwasire ekisoro, ebuburra omu kibira? Entale ensigazi etaina eky'ekwasire, erurumira omu bwingira?

⁵Ekinyonyi obu kiba kitategerwe mutego, kikwatwa? Omutego gutaina eki gukwasire, gubbasuka?

⁶Engwara obu egambira omurubuga, abantu tibatiina? MUKAMA obu aba ataikiriize, orubuga rugweerwa akabi?

⁷Mananu kwo, MUKAMA Ruhanga takora kintu na kimu, atakimanyisize baheereza be abarangi.

⁸Entale obu ebbuukwire, n'oha ataatiine? MUKAMA Ruhanga obu abalize, n'oha asobora kwanga kuranga?

⁹Murangirre ab'omubigo by'Asiriya, nab'omubigo ebya Misiri, nimugamba muti: “Mwesorooleze ha nsozi za Samaliya, mwerorre akajagarro akatagambwa akanyakugirumu, mwetegereze abantu nkooku barukubonabonesibwa.”

¹⁰MUKAMA naagamba ati: “Okukora eby'obwinganiza, eki tibakiroho, ebigo byabo, babiijuza ebintu ebi baihire omubuhogoozi n'omubukatuzi.”

¹¹MUKAMA Ruhanga nukwo kugamba ati: “Omunyanzigwa aligota ensi yabo, ahwerekereze amahe gaabo aganyakubalinda anyage ebigo byabo.”

¹²MUKAMA naagamba ati: “Omuliisa nkooku anagisa ebirumbu bibiri byonka rundi ekicweka ky'okutu, akabiiha omukanwa k'entale, n'abantu ba Isirairi abanyakuli Samaliya, nukwo balinagisibwa bati, bali ha bisago eby'entebe zaabo ezigomokere.”

¹³MUKAMA Ruhanga, Ruhanga ow'amahe naagamba ati: “Muhunde amatu, nukwo mube bakaiso hanju ya Yakobbo.”

¹⁴Mumugambire muti: “Ha kiro eki ndifubirraho Isirairi habw'ebibi bye, nubwo ndicwacwaana n'amatambiro ga Bbeseeri, amahembe aga buli itambiro, galicweekaho gagwe hansi.

¹⁵Amaju agaayombekiirwe kwikarwaamu omubusumi bw'embeho n'obw'ekyanda, ndigaseesa, ag'amasanga galikambuurwa, ag'emiti emifunjo, tigaligaruka kubonwa.”