Read Runyoro - rutooro Amos 4 Bible Online

Amos 4 - Runyoro - rutooro bible

Amos 4

¹“Inywe ente eza Bbasani, ezinyakwikara ha rusozi rwa Samaliya, ezinyakubonesa abanaku kandi ezinyakurubatirra abaseege, bakazi inywe abanyakuragira baiba inywe muti: ‘Mugaleete tunywe!’ Muhurre ekigambo kinu.

²MUKAMA Ruhanga arahiire obuhikiriire bwe naagamba ati: Akasumi kalibahikira, babasikise amarobo, kandi abo abarukukomerrayo hali inywe, balibakuruza engango.

³MUKAMA naagamba ati: Inywena, buli omu aliraba omu kiheengeezi eky'omu kisiika ekimuli haihi muno, babakurre okubahikiza kimu Haramoni.”

⁴MUKAMA Ruhanga naagamba ati: “Inywe abantu ba Isirairi, mugende Bbeseri mukole ebibi mugende Girigaali musiise kukiraho; bukya bukya muleetege ebyonzira byanyu, muhinguzeehoga ebiro bibiri, ha kya kasatu, muleetege ebicweka byanyu ebya ikumi.

⁵Muhongege ekyonzira eky'okusiima, eky'ekintu ekitumbiisiibwe, kandi murangirre ebihongwa byanyu ebyokwegondeza, mubimanyise abantu boona; habwokuba, eki nikyo murukwenda kukora.”

⁶MUKAMA, kandi naagamba ati: Omu mbuga zanyu zoona nikyo nabanagiriire enjara, nababuza ebyokulya omubyaro byanyu byona; baitu nabwo ebi byona bikaba bya busa, mukanga kugaruka nambere ndi.

⁷MUKAMA naagaruka naagamba ati: “Obu hakaba hasigaire ameezi asatu okuhika ha igesa, nkabaima enjura; naginagira orubuga rumu, nayanga kuginagira orundi; omusiri ogumu gwagwibwamuga enjura, ogundi ogu etaragwiremu, gukooma.

⁸Abantu ab'embuga ezimu obu baaboine iroho libali kubi nukwo kugenda omurubuga oru baanihiraga kusangamu amaizi, baitu batasangeyo maizi agarukubamara, nabwo mutagaruke nambere ndi.”

⁹MUKAMA naagamba ati: “Nkabatwekera omuyaga oguhinguraine amaani gwomeze kimu ebirimwa byanyu. Enzige ikaliira kimu emisiri yanyu yoona, emizabbibbu, emitini n'Oliva; nabwo mutagaruke nambere ndi.”

¹⁰MUKAMA naagaruka naagamba ati: “Nkabanagamu kagingo nk'eyinanagire omunsi Misiri; abasigazi banyu nkabaisa empirima; nanyaga embaraasi zanyu; nabanuunkiriza ekijunde eky'emitumbi ey'omu nsiisira zanyu. Nabwo mutagaruke nambere ndi.”

¹¹Kandi naagamba ati: “Abamu omuli inywe, nkabahwerekereza nkooku nahwerekeriize Sodomu na Gomora. Abo abaasaagireho, mukasisana nk'ekicumuro ekyajakwiirwe omumurro, nabwo mutagaruke nambere ndi.

¹²Habweki inywe abantu ba Isirairi, ninyija kubafubira. Kandi nkooku ndukwija kubafubira, mweteekanize mbacwere omusango!”

¹³Habwokuba ogu ayahangire ensozi, ogu anyakwimukya omuyaga, ogu anyakumanyisa omuntu ebiteekerezo bye, ogu anyakukiisa kandi anyakwiza obwire, anyakurubatira ha butwetwe bw'ensozi ez'omunsi, ibara lye, nuwe MUKAMA Ruhanga ow'amahe.