Read Runyoro - rutooro Amos 5 Bible Online

Amos 5 - Runyoro - rutooro bible

Amos 5

¹Iwe nju ya Isirairi, hurra eki ndukukubazaaho, ninteera empamo:

²“Omwisiki empikirre Isirairi agwire, kandi tali w'okugaruka kwimuka; bamweerekiire hansi aho nambere agwire, busaho muntu n'omu ow'okumwimukya.”

³Habwokuba, MUKAMA Ruhanga, enju ya Isirairi nagibazaaho ati: “Orubuga orwatwekaga abaserikale rukumi ha bulemu rulisigaza kikumi, kandi orwatweekaga kikumi, rulisigaza ikumi.”

⁴MUKAMA, kandi naabaliza enju ya Isirairi ati: “Muserre nyowe, nubwo mulyomeera.

⁵Mutanserurra Bbeseri, mutalitaaha orubuga Girigaali, kandi mutaligenda Bberi-sebba; habwokuba Girigaali niija kuzaahisibwa, kandi Bbeseri niija kuhwerekerra.”

⁶Habweki, muserre MUKAMA, nubwo mulyomeera. Obu mutaamuserre, aliimukiramu enju ya Yozefu nk'omurro, agyokye, kandi ha bantu aba Bbeseri, busaho n'omu alisobora kuguraaza.

⁷Balikibona abo abanyakwehugura obwinganiza, abanyakunyaga abantu ebyaabo!

⁸Ogu ayahangire enyunyuuzi, anyakwiiza kandi anyakukiisa obwire, anyakweta amaizi g'enyanja, akagasandaaza omunsi, Ibara lye, nuwe MUKAMA.

⁹Ogu anyakuhwerekereza ab'obusobozi n'ebigo byabo.

¹⁰Inywe abanyakunoba omuntu anyakuli hairembo, arukurwanirra obwinganiza abanyakunuga abo abanyakubaza amazima.

¹¹Habw'okurubaatirra omunaku n'okumukaturaho engano ye, amaju ag'amabaale aganyakubaizirwe, timuligaraaramu; n'emisiri ey'emizabbibbu egi ei mubyaire, amaarwa gaayo timuliganywaaho.

¹²Mmanyire emisango yanyu nkooku eri nyingi, kandi ebibi byanyu nkooku bihinguraine. Muhiiganiza abantu abahikiriire, kandi mulya enguzi, abanaku mubatangira ha irembo.

¹³Habweki nu, omukasumi ako, omuntu omwegendereza kimuhikiriire aculeere; habwokuba, akasumi ako kasumi kabi.

¹⁴Muserre oburungi, hatali obubi, nubwo mulyomeera; MUKAMA Ruhanga w'amahe nkooku murukumweta, nubwo aliikara na inywe.

¹⁵Mufuuhye obubi, mwekambire oburungi, mukole kyona eki murukusobora, omu kooti nukwo habemu obwinganiza, rundi obu, abaasigaireho ha bantu ab'enju ya Yozefu, MUKAMA Ruhanga ow'amahe, nubwo alibagirra embabazi.

¹⁶Habweki, MUKAMA Ruhanga ow'amahe, nikyo arukugambira ati: “Omu makuute goona, abantu baliteera empamo; omu nguudo zoona, baligamba bati: ‘Ai bambi! Ai bambi!’ Balyeta abalimi bateere omukungo, hamu n'abo abasasurwa habw'okuteera empamo baije baborooge.

¹⁷MUKAMA naayongera naagamba ati: Omu misiri y'emizabbibbu yoona, halibamu empamo, ebi byona biribaho, habwokuba ninyija kubafubira.”

¹⁸Mulikibona inywe abarukwegomba ekiro kya MUKAMA! Kiribaleetera karungi ki? Ekiro eki, kiriba kiro ky'omwirima, tikiriba ky'ekyererezi!

¹⁹Ekiro eki, kirisisana nk'omuntu oku yaakucwiire omu maino g'entale kandi akaitirana engagya, rundi kirisisana nk'omuntu anyakutaaha omunju ye, akakwata ha kisiika ntamanya naakwata enjoka ey'okumutema.

²⁰Obu, ekiro kya MUKAMA, nimugira, tikiriba ky'omwirima, kiriba ky'ekyerezi? Kiriba kiro ky'ekibunda ekitajweerwaaho kasana na kati.

²¹Ninnoba kandi ningaya amagenyi ganyu, kandi tindukusiima nsorrokano zanyu ez'ekitiinisa.

²²Noobu mwakumpongera ebihongwa byanyu eby'okwokya n'ebihongwa byanyu eby'ebyokulya tindukwija kubiikiriza, ebihongwa byanyu eby'enyana ezigomokere eby'okusaba obusinge, nabyo tindukubyenda.

²³Mulekere aho kunyomberra, ngu nimwezinisa ebizina ebi mucwereriire, ebi murukuteera ha nanga zanyu, tindukwija kubihuliiriza.

²⁴Omukiikaro ky'ebi byona, leka obwinganiza; n'oburungi bweyongere, busisane nk'ekisaaru ekirukubooga.

²⁵“Inywe abantu ba Isirairi, omumyaka amakumi ana ei mwamazire omwirungu, mukandeetera ebyonzira n'ebihongwa?

²⁶Hati nu, Sakoosi mukama wanyu, na Kaiwani embandwa yanyu ey'enyunyuuzi, ebisisani ebi mwayekoliire, nibyo mutwale;

²⁷MUKAMA, anyakwetwa Ruhanga ow'amahe, nikyo arukugambira ati: Ndibatwaara mbazaahize hara muno na Damasiko.”