Read Runyoro - rutooro Amos 7 Bible Online

Amos 7 - Runyoro - rutooro bible

Amos 7

¹MUKAMA Ruhanga, nukwo yaanyolekere ati: Ebyokulya by'omukama obubikaba bimazire kugeswa, omu kasumi, ebirimwa eby'omurundi ogwa kabiri, obu bikaba nibikyayaruka, nkabona omuziinga gw'enzige, enkuru mali.

²Obu zaamazire kulya obunyansi bwona obw'omunsi egi, nubwo nayesengeriize ningamba nti: “Ai MUKAMA Ruhanga nkwesengeriize, ganyira abantu ba Yakobbo abake muno bati, baraasobora bata kwomeera?”

³MUKAMA na uwe, nukwo kugaarra omutima, yagamba ati: “Eki wayolekerwe tikiribaho.”

⁴MUKAMA Ruhanga akaanyoleka n'ekindi, nikyo kinu: akaba amaliriire, abantu be kubafubiza omurro, omurro ogu, gukaba gwokeze enyanja enyakuhamire, niguraanda kukwata ensi.

⁵Nubwo nayesengeriize nti: “Ai MUKAMA Ruhanga, nkwesengeriize, eki otakikora! Abantu ba Yakobbo abake bati, basobora bata kwomeera?”

⁶MUKAMA nukwo kugarra omutima yagamba ati: “Eki na kyo, tikyaabeho.”

⁷MUKAMA akaanyoleka na kinu: Nkamurora uwe woonyini ayemeriire haihi n'ekisiika ekyalengerwe na Bbirigi, aboombeki ei balengesa, kandi akwasire bbirigi egi.

⁸Yankaguza ati: “Amosi noorora ki?” Namugarukamu nti: “Nindora Bbirigi” Yangambira ati: “Ninyekoonyeza Bbirigi enu, okwoleka abantu bange nkooku barukusisana nk'ekisiika ekinyakuramaire, lero tindukugaruka kubaganyira.

⁹Ebiikaro bya Isaaka eby'ekitiinisa, biriba bitoongo, kandi ebiikaro bya Isirairi ebirukwera galiba mahamba, ndikwata empirima, nseesire enju ya Yerobbowamu.”

¹⁰Amaziya nyakatagara wa Bbeseri, nubwo yatumireho Yerobbowamu omukama wa Isirairi, naagamba ati: “Omunju ya Isirairi, Amosi nuwe akuliiraine; abantu boona, tibarukwenda ebi arukugamba.

¹¹Binu nibyo arukugamba ngu: ‘Yerobbowamu aliitwa empirima, kandi Isirairi aliruga omunsi ye azaahisibwe.’”

¹²Amaziya nubwo yagambire Amosi ati: “Iwe murangi we, ruga aho ogende omunsi ya Yuda, nuho otunge omugaati, nuho orange, ab'oku, nubo baraakuha omukimba;

¹³baitu otagaruka okarangira Bbeseri hanu, habwokuba, kinu nikyo kiikaro ky'omukama ekirukwera, niryo iramizo ly'obukama.”

¹⁴Amosi nubwo yagarukiremu Amaziya ati: “Nyowe nkaba ntali murangi, kandi nkaba ntali w'abamu, ab'obukwatane n'abarangi nkaba ndi muliisa, kandi nanogoorraga emisikamooli.

¹⁵MUKAMA nuwe yanyihire omu kuliisa igana, yandagira ati: ‘Irooko ogende, orangire abantu bange Abaisirairi.’

¹⁶Hati nu, ohurre MUKAMA eki arukugamba: Noontanga oti: ‘Otarangirra Isirairi, ngu oteegesa hanju ya Isaaka.’

¹⁷Amaziya, MUKAMA nikyo arukukugambirra ati: ‘Mukazi waawe aliba malaaya w'omu rubuga runu, batabani baawe na bahara baawe baligwa omu bulemu, ensi yaawe erisarwasarwamu eheebwe abandi, kandi iwe wenka, oligwa omunsi ey'abakaafiiri, kandi mananu kwo abantu ba Isirairi, baliihwa omunsi yaabo bazaahisibwe.’”