Read Runyoro - rutooro Amos 8 Bible Online

Amos 8 - Runyoro - rutooro bible

Amos 8

¹MUKAMA akagaruka yaanyoleka ekintu ekindi: nikyo ekigega eky'ebijuma ebinyakwengere:

²Hanyuma, nubwo yankagwiize ati: “Amosi noorora ki?” Namugarukamu nti: “Nindora ekigega ekirumu ebijuma ebyengere, omu kasumi k'ekyanda.” MUKAMA yangambira ati: “Empero y'abantu bange Abaisirairi ehikire.

³Ha kiro eki, ebyakubaire bizina omunju ya MUKAMA, ziriba mpamo; ebibi ebi baakozire, tindigaruka kubiitira eriiso halifa abantu baingi muno, bahungurwe buli hantu, hataroho na kateezo.”

⁴Inywe abanyakurubaatirra abaseege, kandi abanyakuhwerekereza abanaku ab'omunsi, muhurre kinu.

⁵Inywe abanyakugamba muti: “Okwezi okuhyaka kulihwaho di nukwo tukaguza ebirimwa byaitu? Sabbato nayo erihwaho di, nukwo tukaleeta engano ey'okuguza, tukatandika kuseera nitwekoonyeza endengo ezitali z'amazima, tukakora minzaani ez'okunyagisa abanyakutuguraho ebintu,

⁶nukwo tukwate efeeza twegurre abanaku, abaseege tukabaheera omugogo gw'enkaito kandi tukaguza ebisunga by'engano?”

⁷MUKAMA akarahirra emyehembo ya Yakobbo naagamba ati: “Mananu kwo, ebikorwa byabo ebibi, tindyebwaho na kimu.

⁸Habweki, ensi erikankana, kandi weena ow'aligibamu aliba omu muhito. Ensi yoona eritengeeta; eriimuka n'egwa nk'ekisaaru Nairo, ekya Misiri.”

⁹MUKAMA Ruhanga naagamba ati: “Ha kiro eki, ndiiza obwiire omwihangwe, ensi ngisweke omwirima nyamusana tuku.

¹⁰Amagenyi gaanyu, ndigafoora maganya, kandi ebizina byanyu byona, mbifoole mpamo; inywena, ndibajwaza eguniya, buli mutwe gwona ndigucwa oruhara ndireeta amaganya, nk'amaganya aga ise mwana na nyina mwana, abarukulirirra mutabani wabo omu wenka, anyakubafiireho. Ekiro eki kyona, kiriba ky'obujune.”

¹¹MUKAMA Ruhanga naagamba ati: “Akasumi kalihika, nnage kiihe omunsi; etali kiihe ey'okuburwa ebyokulya, rundi ey'okuburwa amaizi, baitu eriba kiihe ey'okuhurra kigambo kya MUKAMA.

¹²Abantu balyenjeera okuruga ha nyanja emu, okuhika ha nyanja endi, baliruga omu mateemba, bahike Burugaizooba; balitaabaana, bateere hanu na hali, nibaserra ekigambo kya MUKAMA, baitu tibalikizoora.

¹³Ha kiro eki, abaisiki entabujwera, empikirre n'abasigazi, baliitwa ekyaaka.

¹⁴Abo abanyakurahira Asima owa Samaliya, nibagamba bati: ‘Wewe Daani, Ruhanga wawe n'akahangirize n'omu Bberisebba nibakagumeho,’ baligwa obutaimuka.”