Read Runyoro - rutooro Amos 9 Bible Online

Amos 9 - Runyoro - rutooro bible

Amos 9

¹Nkarora MUKAMA ayemeriire haihi n'itambiro, yandagira naagamba ati: “Teera emitwe ey'enyomyo ez'Enju ya MUKAMA, oteerre kimu n'amaani goona, okuhika orusu obu rurakagwa hansi. Ozicwacwane, igwe ha mitwe y'abantu abo boona, abaraasigaraho, ndibaisa empirima. Busaho n'omu aliiruka, tiharoho n'omu alitabuka.

²Noobu balirima ekiina bakagenda Nyabuyonga, omukono gwange gulibaihayo; noobu balitemba haiguru ndibahananturayo.

³Noobu balyesereka ha katwetwe k'orusozi Karumeeri, ndibaronza mbakwate; noobu balinyesereka okuzimu hansi y'enyanja, ndiragira enjoka ebatemereyo.

⁴Abanyanzigwa baabo obu balibanyaga bakabazaahya, ndiragira, oku nuho balicumitirwa empirima ndaabaikazaahoga amaiso bahikweho akabi, hatali kuhikwaho akarungi.”

⁵MUKAMA Ruhanga ow'amahe, ogu anyakukwataho ensi ekaaga, kandi boona abanyakugirumu bakateera empamo, yoona ekaimuka nk'ekisaaru Nairo, kandi ekagwa nk'ekisaaru Nairo ekya Misiri.

⁶Anyakwombeka omwiguru ebisiika bye ebya kaina abiri, anyakwegumiza ekisiika haitaka, anyakweta amaizi g'enyanja, kandi anyakugaseesa haitaka, ibara lye nuwe MUKAMA.

⁷MUKAMA naagamba ati, “Inywe abantu ba Isirairi, timurukunsisanira Abesopiya?” “Tali nyowe ayaihire Isirairi omunsi Misiri, naiha Abafirisiti Kafutooli, kandi Abasiriya nabaiha Kiiri?

⁸MUKAMA naagamba ati, Dora nu nyowe MUKAMA Ruhanga, ntaire amaiso ha bukama obu obubi, ninyija kubuhweerekereza mbumale omunsi, baitu enju ya Yakobbo, tindigihwerekerereza kimu.”

⁹“Hati nu, ninyija kuragira kandi nyunguule enju ya Isirairi omumahanga goona, omuntu nkooku akeekeeya engano n'akakeekeeyo, baitu tihalibaho kabaale akaligwa hansi.

¹⁰Abasiisi boona abarukusangwa omu bantu bange, abarukugamba bati, ‘Titulihikwaho, rundi titulibona kabi, baliitwa empirima.’

¹¹Ha kiro eki, ndiimukya orusiisira rwa Daudi, orwagwiire, nyigale ebihengeezi byarwo, n'ebikambuuro byarwo, ndwombeke buhyaaka, rube nkooku rukaba ruli ira.

¹²MUKAMA ow'alikora eki naagamba ati, nukwo batunge ekicweka ky'Edomu ekinyakusigaireho, n'amahanga goona aganyakweterwa ibara lyange.”

¹³MUKAMA naagamba ati: “Lero nu, ebiro nibiija,” “Omulimi obu aliiruka akakwata omugesi, n'omujungi w'emizabbibbu obu aliiruka akakwata omusigi; ensozi ziriiturruka eviini erukunulirra, obusozi bwona na bwo nukwo buti.

¹⁴Ndigarra abantu bange Abaisirairi abaazaahisiibwe, boombeke buhyaka embuga ezaakambwiirwe baziikalemu; babyaale engonjo z'emizabbibbu bazinywemu eviini, balime emisiri, balye ebyokulya byayo.

¹⁵MUKAMA Ruhanga waawe naagamba ati, Ndibabyara omunsi yabo, kandi ebiro byona bwona tibaligaruka kusimbuka, kuruga omunsi ei nabahaire.”