Read Runyoro - rutooro Yon 1 Bible Online

Yon 1 - Runyoro - rutooro bible

Yon 1

¹Kiro kimu, MUKAMA akagambira Yona mutabani w'Amitai ati:

²“Imuka ogende Nineve orubuga orukooto ruli ogambire abaayo oti: Nyetegeriize obubi bwanyu”

³Baitu Yona yacwamu kwehugura MUKAMA eki yamuragiire, nukwo kugenda Tarasiisi. Nukwo kutoma ogwa Yopa nambere yasangire emeeri erukugenda Tarasiisi; atasiibyemu yasasura sente ez'orugendo, yatemba agende n'abandi Tarasiisi, ngu airuke MUKAMA.

⁴Baitu MUKAMA yaimukya ha nyanja omuyaga ogutakabonwaga, haimuka ihunga eritagambwa, emeeri yasisana nkeracwekacweka.

⁵Abalimba nukwo kutiina muno, buli omu yatandika kuterra omucwezi we enduuru amukoonyere; ebintu ebikaba biri omu meeri, baabinaga omu nyanja, emeeri nukwo ebanguhire. Omu kasumi ako, Yona akaba asirimukire omu kicweka ekya hansi eky'ameeri, abyamire agwijagiiriire kimu.

⁶Mukuru w'emeeri nubwo yamuhikireho naagamba ati: “Iwe engwijagizi, obu ogwijagiire ota? Imuka oyesengereze Ruhanga wawe! Taikara kutugirra embabazi akatujuna.”

⁷Abalimba nubwo baagambiragaine bati: “Hati nu, tuteere akaruuru, nukwo tumanye anyakutuleeteriize akabi kanu.” Akaruuru baakateera, kaakwata Yona.

⁸Nubwo baamukagwize bati: “Nooha atuleeteriize akabi kanu? Iwe okora mulimo ki? Nooruga ha? Oli w'ihanga ki? Abantu oikara nabo nibaha?”

⁹Yabagarukamu ati: “Ndi Muheebburaayo, kandi ntiina MUKAMA Ruhanga ow'iguru ayahangire ensi n'iguru.”

¹⁰Abasaija obu baahuliire ebi, baatiina muno, nukwo kumukaguza bati: “Obu eki, okozire ki?” Habwokuba bakamanya nkooku akaba naayehugura MUKAMA, Habwokuba akaba abagambiire.

¹¹Baamukaguza bati: “Hati tukukole ki enyanja nukwo ereke kutuleetera akabi?” Dora ihunga nkooku lirukugenda niryeyongera.

¹²Yona yabagarukamu ati: “Munkwate munnage omu nyanja, nukwo eteeke; habwokuba mmanyire ihunga erirukusisa liti, lireetereziibwe nyowe.”

¹³Abalimba bakeeheerayo kimu kugoya meeri kugihikya ha bwerre, baitu baalemwa; ihunga likagenda niryeyongera, tibasobora kulirabamu.

¹⁴Nubwo baateeriire MUKAMA omuranga nibagamba bati “Ai MUKAMA tukwesengeriize, otatuhwerekereza habw'omuntu onu, kandi otatujunaana esagama etaina musango; habwokuba iwe MUKAMA niiwe okozire eki ogondeze.”

¹⁵Nubwo baakwata Yona baamunaga omu nyanja; ahonaaho enyanja yateeka.

¹⁶Eki, kyaleetera abalimba kutiina muno MUKAMA, nukwo kumuhongera ekyonzira baamuraganiza kumuheereza.

¹⁷MUKAMA akaragira encu enkooto emire Yona, nukwo kyabaire, Yona yamara omunda y'encu ebiro bisatu, nyamusana n'ekiro.