Read Runyoro - rutooro Yon 4 Bible Online

Yon 4 - Runyoro - rutooro bible

Yon 4

¹Baitu kikabiihiza muno Yona, kyamukwasa ekiniga.

²Nukwo kwesengereza MUKAMA naagamba ati: “MUKAMA nkakusaba, eki ntakigambe nkyali omunsi y'owaitu? Nikyo kyanyirukisize bwango Tarasiisi, habwokuba mmanyire nkooku oba Ruhanga ow'embabazi, omuganyizi, atabiihirwa bwango, omunyangonzi ezitagira rulengo, kandi anyakuganyira ebibi.

³Hati nu bairaba MUKAMA wange, nkwesengeriize ntwara, hati ekinsemeriire, nukwo kufa okukira okwomeera.”

⁴MUKAMA yamukaguza ati: “Ekikubiihiize kiraha?”

⁵Yona nubwo yaturukire yaikarra aheeru y'orubuga yayeteerayo akasiisira. Omu kasiisira ako, nuho yaikaire, ategeriize kurora ekirabaho orubuga.

⁶MUKAMA nubwo yamereze ekimera, eruguru y'akasiisira ka Yona, kimuswekerre, nukwo abe kurungi okukira nkooku akaba ali. Ekimera eki kyasemereza muno Yona.

⁷Baitu ha kiro ekyakurasireho, emamba obu ekaba neesara yaragira ekihuka kyaruma ekimera kiri, ekimera kyahotoka.

⁸Izooba obulyaturukire, Ruhanga yaleeta omuyaga ogurukwokya ogwa Burugaizooba, gwayokya Yona omutwe, gwamunaga ensazi;

⁹Ruhanga yakaguza Yona ati: “Kuhotoka kw'ekimera, nakwo kukubiihiize” Yona yagarukamu ati: “Mbiihiirwe muno muno, ekiniga kiraaliire kunyita.”

¹⁰MUKAMA yamugarukamu ati: “Nooganyira ekimera eki otaratuntukiire, eki otaratalibaniire, ekyaamezire omu kiro kimu, kyafa ha kiro ekyakurasireho.

¹¹Tikinsemeriire kuganyira Nineve orubuga orukooto ruli; orunyakurumu abantu akasiiriira kamu n'emitwaro ebiri abataina eki barukumanya, n'ente enyingi ziri?”