Read Runyoro - rutooro Kubar 10 Bible Online

Kubar 10 - Runyoro - rutooro bible

Kubar 10

¹MUKAMA yagambira Musa ati:

²“Kora engwara ibiri ezinyakuheesirwe omu feeza, ozikozese habw'okwetaga ekitebe ky'abantu kandi nizo ezirabaragiraga kugenda omu rukande.

³Zombi obu ziraateerwaga ekitebe kyona kikwesorolezeehoga, ha mulyango ogw'Eheema ey'okutangatanganiramu.

⁴Baitu obu baraateeraga emu yonka, obu, abeebembezi, bakuru b'enganda eza Isirairi, nubo bakusorookanirehoga.

⁵Obu oraateeraga enduuru, abantu abanyakuli omu nsiisira eza Burugaizooba, baimukyege bagende.

⁶Obu oraateeraga enduuru omurundi gwa kabiri, abantu abanyakuli omu nsiisira ez'orubaju rw'obulyo, baimukyege. Akasumi koona obu barabaga nibaimukya kugenda, haterwege enduuru.

⁷Baitu orukurato obu ruraabaga nirusorrookana, oterege engwara, otaliteera enduuru.

⁸Baanyakatagara, batabani ba Arooni nubo bateerege engwara. Hali inywe, engwara kiragiro kyanyu ekitahwaho omu biro byanyu byona.

⁹Obu muraabaga nimuramaga muli omunsi yanyu kurwanisa omunyanzigwa arukubakora kubi, obu muraateeraga enduuru hamu n'engwara, MUKAMA Ruhanga wanyu nukwo abaijuke kandi abajune abanyanzigwa banyu.

¹⁰Kandi na ha kiro eky'okusemererwa kwanyu, na ha bugenyi bwanyu obwatairweho, ha ntandiko ey'ameezi ganyu, ha bihongwa byanyu eby'okwokya na ha byonzira byanyu eby'okusaba obusinge, muterrehoga engwara; ebi birabaijukyaga Ruhanga wanyu; ninyowe MUKAMA Ruhanga wanyu.”

¹¹Ha kiro kya makumi abiri eky'okwezi okwa kabiri, omu mwaka ogwa kabiri, ekicu kikaruga ha Heema ey'endagaano ya Ruhanga,

¹²Abantu ba Isirairi baimukya kuruga omwirungu lya Sinai baagenda bahonderaine omu nganda zaabo, ekicu kyayemerra omwirungu lya Paraani.

¹³Omurundi ogw'okubanza, bakaimukya orugendo rwabu nkoku MUKAMA yaragiire Musa.

¹⁴Ebendera ey'orukande orw'abantu ba Yuda, niyo yabandize kwimukya, abantu nibagendera omu bitebe byabo, nibaroolererwa Nahasooni, mutabani wa Aminadabbu, nuwe akaba ali mukuru w'ihe lyabo.

¹⁵Kandi Nasanairi mutabani wa Zuhara, ali mukuru ow'ihe ery'oruganda orwa Isaakara.

¹⁶Eryabu mutabani wa Heroni, ali mukuru w'ihe ery'oruganda orwa Zebburuni.

¹⁷Obu baasimbwire enju ya Ruhanga, batabani ba Geresooni na batabani ba Merali, abaahimbaga enju ya Ruhanga, baimukya.

¹⁸Ebendera ey'orukande orwa Rubbeni, yaimukya abantu bali omu bitebe byabo; Erizuura, mutabani wa Sedura nuwe akaba ali mukuru w'ihe lyabo.

¹⁹Kandi Serumyeri mutabani wa Selusadai mukuru w'ihe ery'oruganda orw'abantu aba Simyoni.

²⁰Kandi mukuru w'ihe ery'oruganda orw'abantu ba Gaadi, akaba ali Eriasafu mutabani wa Dehuli.

²¹Hanyuma, Abakohati baimukya, bahimbire ebintu ebirukwera, kandi enju ya Ruhanga ekeemerezibwa bbo batakahikire.

²²Ebendera ey'orukande orw'abantu b'Efuraimu, baimukya bali omu bitebe byabo, mukuru ow'ihe lyabo, akaba ali Erisama mutabani wa Amihudi.

²³Mukuru w'ihe ery'oruganda orw'abantu ba Manaase, akaba ali Gamalyeri, mutabani wa Pedazuura.

²⁴Kandi mukuru w'ihe ery'oruganda orw'abantu aba Benyamiini, nuwe Abidaani mutabani wa Gidyoni.

²⁵Hanyuma ebendera ey'orukande orw'abantu ba Daani abaalindaga enyuma y'enkande zoona, baimukya omu bitebe byabo; kandi mukuru ow'ihe lyabo, akaba ali Ahyezeri mutabani wa Amisadai.

²⁶Kandi mukuru w'ihe ery'oruganda orw'abantu b'Aseera, akaba ali Pajeri, mutabani wa Ocurani.

²⁷Kandi mukuru ow'ihe ery'oruganda orw'abantu ba Nafutaali, akaba ali Ahira, mutabani wa Enani.

²⁸Abantu ba Isirairi obu baimukize kurubata bali omu mahe gaabo nukwo baahonderaine bati.

²⁹Musa yagambira Hobaabu mutabani wa Rehuli Omunyamidyani isezaara ati: “Nitwimukya kugenda omu kiikaro MUKAMA eki yagambire ati: ‘Ndikibaha’; ija tugende hamu, turaakukora kurungi, habwokuba MUKAMA anihiize Isirairi ebirungi.”

³⁰Hobaabu yagarukamu Musa ati: “Tinaagende, na inywe baitu ndaagaruka omu nsi y'owaitu, kandi omu ruganda rwange.”

³¹Musa yamugira ati: “Otaturugaho, habwokuba noomanya nkooku turukwija kuteera orukande omwirungu, noija kutukonyera kuturorra haturaaruteera.

³²Kandi kakuba ogenda na itwe, ekirungi kyona MUKAMA eki araatukorra, na itwe nikyo turaakukorra.”

³³Nubwo bairrayo, baaruga ha rusozi rwa MUKAMA, orugendo rw'ebiro bisatu, Esanduuko ey'Endagaano ya MUKAMA ebebeembiire, ebaserurre ekiikaro eky'okuhuumurramu.

³⁴Kandi ekicu kya MUKAMA kyabaga haiguru yabo omubwire bwa nyamusana, akasumi koona akabaimukizaamuga kuruga omu rukande.

³⁵Buli kasumi Esanduuko y'Endagaano obu yaimukyaga, Musa yagambaga ati: “Ai MUKAMA imuka, abanyanzigwa bawe bararangibwe, kandi abo abanyakukunoba bairuke baruge omumaiso gawe.”

³⁶Kandi Esanduuko y'Endagaano obu yahuumuraga, Musa yagambaga ati: “Ai MUKAMA, garuka hali enkuyanja n'enkuyanja za Isirairi, iwe anyakugendera ha bicu.”