Read Runyoro - rutooro Kubar 11 Bible Online

Kubar 11 - Runyoro - rutooro bible

Kubar 11

¹Abantu bakahyemera MUKAMA habw'emihito ei baaboine, MUKAMA obu yahuliire okuhyeema oku, yakwatwa ekiniga, omurro gwa MUKAMA gwabaimukiramu, gwahwerekereza ebicweka ebimu eby'orukande ebyenaganagire.

²Nubwo abantu baataagira Musa, Musa yasaba MUKAMA omurro gwaraara.

³Habweki, ekiikaro eki kyayetwa Tabera, habwokuba omurro gwa MUKAMA gukabamatukiramu.

⁴Omukasumi ako, hakaba haroho abanyamahanga abaagendaga n'Abaisirairi bakaba nibagonza muno enyama kandi aba Isirairi batandika kuhyema nibagamba bati: “Haa! Kakuba tuliire enyama!

⁵Nitwiijuka encu ezi twaliiraga busa omunsi Misiri, emyongo, ebihweeju, obutunguru n'enjagi,

⁶hati amaani gatuhoire, titukyaine kyokulya, kwihaho maanu enu yonka eya buli kiro niyo turoleriire.”

⁷Maanu ekaba neesisana nk'ensigo z'omugusa gw'enkumba

⁸abantu baagendaga bagisorooza, bagisa harubengo rundi bagihonda omu nsekuro, bagitogosa omu binaga, bagikoramu keeki, ekaba n'enura nka keeki ezinyakucumbisiibwe amagita.

⁹Ekiro orume oburwagwaga omu rukande, maanu yagweranamuga.

¹⁰Musa akahurra abantu nibateera empamo omu nganda zaabo, buli muntu ali ha mulyango ogw'Eheema ye, ekiniga kya MUKAMA kyayaka muno. Musa nukwo kubiihirwa,

¹¹yakaguza MUKAMA ati: “Kiki ekikukoleze kubi omwiru wawe? Kandi habwaki otangiriire embabazi, iwe kuntaho obulemeezi bw'abantu abo boona?

¹²Abantu abo boona, ninyowe natwaire enda yabo? Ninyowe nabazaire? Nikyo orukungambira ngu: ‘Bahimbire omu kifuba kyawe, nk'omulezi oku ahimba omwana arukwonka,’ mbahikye omunsi ei waraganiize kuha baisenkurubo?

¹³Nyowe enyama ey'okuha abantu banu boona ngiihe nkaha? Dora nibandirirra nibagamba bati: ‘Tuhe enyama tulye.’

¹⁴Nyowe omuntu omu, tindukusobora kurolerra abantu banu boona, obulemeezi bumpinguraine

¹⁵Obu oraaba noogonza, kunkora oti, hakire onyite hati, baitu obu oraaba nongirra embabazi oleke kuncanza.”

¹⁶MUKAMA yagambira Musa ati: “Omu bakuru ba Isirairi, nsorooleza abasaija nsanju iwe aba orukumanya ngu nubo bakuru b'abantu kandi balemi baabo, obaleete omu Heema ey'okutangatanganiramu, nuho beemerre na iwe.

¹⁷Ndaasirimuka mbaze na iwe, kandi ndakukeehyaho omwoyo ogurukwikara na iwe ngubahe; nabo nukwo bakukonyere ha bulemeezi bw'abantu, oleke kubwetweka wenka.

¹⁸Kandi ogambire abantu ngu: ‘Mweyeze inywenka habw'ekiro kya nyenkya, nimwija kulya enyama, habwokuba MUKAMA ahuliire nimumulirirra nimugamba muti: “N'oha araatuha enyama tukalya? Habwokuba Misiri tukaba tuli kurungi.” Nahabweki, MUKAMA araabaha enyama mulye.

¹⁹Timwagirye ekiro kimu rundi bibiri, rundi ebiro bitaano rundi makumi abiri, baitu nimwija kugirya

²⁰okumara okwezi kwona okuhika obu erakabatama, habwokuba mwehakaine MUKAMA arukwikara na inywe, mwarra omumaiso ge nimugamba muti: “Kiki ekyatwihire omunsi Misiri?”’”

²¹Musa yagamba ati: “Abantu ndukwikaramu, omuhendo gw'abaserikale nibahika emitwaro nkaaga, iwe ogambire ngu: ‘Ndaabaha enyama balye okwezi kwona,’

²²kubamara oraabaitira amagana g'embuzi n'ag'ente rundi orasorooza encu zoona ez'omunyanja?”

²³MUKAMA yakaguza Musa ati: “Omukono gwa MUKAMA gugufuhaire? Hati eki ngambire, obu kiraaba kiri kyamazima rundi ky'ebisuba oraakirora.”

²⁴Musa yagenda yagambira abantu byona MUKAMA ebi agambire, kandi yasorooza abasaija nsanju ab'omu bakuru b'abantu, yabeemereza bayehinguliriza Eheema.

²⁵Nubwo MUKAMA yasirimuka omu kicu yababaliza. Yakeehyaho Musa omwoyo ogwaikaraga na uwe yaguha abakuru abo nsaanju, obu batungire omwoyo baranga ebirukugenda kubaho, kandi batongere kuranga obundi.

²⁶Abasaija babiri, omu ibara lye, Eridaadi, n'ondi Medaadi, bakaba batali omukitebe, bakaba basigaire omu rukande, bakaba bali omu abo abaahandiikirwe baitu bakaba batagiire omu Heema, nabo batunga omwoyo, baarangirra omu rukande.

²⁷Omusigazi yairuka yagambira Musa ati: “Eridaadi na Medaadi nibarangirra omu rukande.”

²⁸Kandi Yoswa mutabani wa Nuuni omuheereza wa Musa, omu hali abasaija abaakomerwemu, yagamba ati: “Mukama wange Musa batange.”

²⁹Baitu Musa yagarukamu ati: “Nongirra ihali? Ha! Kakuba abantu ba MUKAMA boona babaire barangi, MUKAMA akabaha omwoyo gwe.”

³⁰Nubwo Musa n'abakuru b'abantu ba Isirairi baagarukire omu rukande.

³¹Nubwo aho naaho MUKAMA yatweka omuyaga ogwaihire entiikalya ha nyanja, gwazireeta nihurrukira omu mwanya gw'ebigere bisatu kuruga ha itaka, zaagwa omu rukande zarwehinguliriza mairo na mairo.

³²Nyamusana egi yoona, ekiro kyona n'ekiro ekyahondiireho, abantu baasorooza entiikalya; ogu ayakizire kusorooza nke, akasorooza kiloguraamu rukumi; baazanikaga okwehinguliriiza orukande.

³³Enyama obu ekaba ekyali omu kanwa, MUKAMA yabiihiriirwa muno abantu, yabaisa ebidanda by'amaani.

³⁴Habweki ekiikaro eki kyayetwa Kiburosi-hatava, habwokuba oku, abantu ab'omukoijo nuho baaziikirwe.

³⁵Abantu baaruga Kiburosi-hatava, baagenda Elize-rosi, nuho baikara.