Read Runyoro - rutooro Kubar 12 Bible Online

Kubar 12 - Runyoro - rutooro bible

Kubar 12

¹Miryamu na Arooni bakahyemera Musa nibamutura omukazi Omukuusi ou yaswiire, nibagamba bati:

²“Mazimakwo MUKAMA akabaliza omuli Musa wenka? Kandi na itwe atatubalizeemu?” Eki Ruhanga yakihurra.

³Musa akaba ali musaija muculeezi muno okukira abantu boona abakaba bali omunsi.

⁴Nubwo naaho, MUKAMA yagambira Musa, Arooni na Miryamu ati: “Inywe abasatu muturuke, mugende omu Heema ey'okutangatanganiramu.” Nubwo abasatu abo baaturuka.

⁵MUKAMA yasirimukira omu nyomyo ey'ekicu, yayemerra ha mulyango ogw'Eheema, yayeta Arooni na Miryamu, bombi baija,

⁶MUKAMA yagamba ati: “Muhurre ebi ndukugamba: Omuli inywe obu habamu omurangi, nyowe mmweyoleka, ammanya, mbaza nawe omu kirooto.

⁷Baitu omuhereza wange Musa timmweyoleka nti; mmwesiga. Mbaza na uwe niturorangana mmugambiirra kimu; tubaza hamu muhwitura hatali kumubaliza omu nfumo;

⁸kandi andora nkoku nsisana, mara habwaki mutaratiinire kuhyemera Musa omuheereza wange?”

⁹MUKAMA yababiihirirwa muno, yarugaho yagenda; ekicu

¹⁰obu kikaba nikikyaruga ha Heema kiti, Miryamu akaba amazire kugenga, weea naasisana iju. Arooni yahinduka kurora Miryamu, ekyamahano, Miryamu akaba agengere ira.

¹¹Arooni yagambira Musa ati: “Ai bambi, Mukama wange leka kutufubira, habwokuba tukozire eky'obudoma kandi twasiisa.

¹²Miryamu leka kumusisaniza nk'omuntu anyakuruga omunda ya nyina afire, oruhu orw'omubiri gwe ruhoireho.”

¹³Musa yayesengereza MUKAMA naagamba ati: “Ai Ruhanga, nkwesengeriize mukize.”

¹⁴Baitu MUKAMA yagamba Musa ati: “Kakuba ise nuwe abaire amucweriire amacwanta ha maiso, taakukwasirwe ensoni okumara ebiro musanju? Miryamu aikale aheeru y'orukande okumara ebiro musanju, ebiro ebi obu biraahwaho, nubwo agarurwe omu rukande.”

¹⁵Habweki Miryamu yaikara aheeru y'orukande okumara ebiro musanju; kandi abantu ba Isirairi bataimukye kugenda okuhika agarwirwe omu rukande.

¹⁶Nubwo baimukya orugendo okuruga Hazerosi, baateera orukande omwirungu lya Parani.