Read Runyoro - rutooro Kubar 13 Bible Online

Kubar 13 - Runyoro - rutooro bible

Kubar 13

¹MUKAMA akagambira Musa ati:

²“Tuma abasaija batate ensi ya Kanaani ei ndiha abantu ba Isirairi, omu buli ruganda orwa baisenkurubo, oihemu omusaija omu.”

³Habweki, Musa yabatuma ali omwirungu erya Parani nkooku MUKAMA yamuragiire, boona abaatumirwe bakaba bali bakuru b'abantu ba Isirairi.

⁴Ganu nugo mabara gaabo: Samuha mutabani wa Zakara, akaruga omu ruganda rwa Rubbeni;

⁵Safati mutabani wa Holi akaruga omu ruganda rwa Simyoni;

⁶Kalebu mutabani wa Yefane akaruga omu ruganda rwa Yuda;

⁷Igali mutabani wa Yosefu, akaruga omu ruganda rwa Isakara.

⁸Hoseha mutabani wa Nuuni, akaruga omu ruganda rwa Efuraimu;

⁹Paliti mutabani wa Rafu, akaruga omu ruganda rwa Benyamiini,

¹⁰Gadyeri mutabani wa Sodi akaruga omu ruganda rwa Zebburuni,

¹¹omu ruganda rwa Yosefu, nurwo orwa Manaase, hakarugamu Gaadi mutabani wa Susi;

¹²Amyeri mutabani wa Gamali akaruga omu ruganda rwa Daani,

¹³omu ruganda rw'Aseeri, hakarugamu Sesuru mutabani wa Mikairi,

¹⁴omu ruganda rwa Nafutali, hakarugamu Nahabi mutabani wa Vofisi.

¹⁵Omu ruganda rwa Gaadi, hakarugamu Gaweera mutabani wa Maki.

¹⁶Ago nugo amabara g'abasaija Musa aba yatumire kutata ensi. Kandi Hoseha mutabani wa Nuuni, Musa akamuruka ibara Yoswa.

¹⁷Musa akabatuma batate ensi ya Kanaani, yabagambira ati: “Mugende omunsi ey'ekyeeya enyakuli obuseeri kandi mugende omunsi ey'ensozi;

¹⁸murole ensi omulingo ogu erumu, rundi abantu abarukwikaramu obu baraaba bali b'amaani,

¹⁹rundi baceke, ensi ei barumu obu eraaba eri nungi rundi mbi, embuga ezi barukwikaramu, ziri nsiisira rundi bigo,

²⁰itaka ly'orweezo rundi libi, ensi obu eraaba erumu emiti rundi teriyo. Muleke kutiina, muleeteho ebimu ha bijuma eby'ensi egi.” Omu kasumi ako ebijuma nubwo bikaba nibitandika kwenga.

²¹Nubwo baagenda baatata ensi okugiiha ha irungu Ziini okuhika Rehobu nambere bataahirirra Hamasi.

²²Baagenda omunsi ey'ekyeeya baahika Hebburoni; kandi baahika Ahimani Sesai na Talimai nambere baijukuru b'Anaki baikaraga. Orubuga Heburooni rukaba rwombekiirwe emyaka musanju. Zowani orwa Misiri rutakombekerwe.

²³Baahika omu kihanga eky'Esikooli, oku baacwaayo itaagi limu eriroho ekikonjonjo eky'ebijuma, baalireetera ha muti oguhimbirwe abantu babiri, kandi baija n'amakomamahanga n'emitini.

²⁴Ekiikaro eki kyayetwaga ekihanga Esikooli, habwokuba abaana ba Isirairi bakacwaayo itaagi erinyakuroho ebijuma.

²⁵Obu baamazire ebiro makumi ana nibatata ensi, baagaruka.

²⁶Baija hali Musa, Arooni n'ekitebe kyona eky'abantu ba Isirairi omwirungu erya Parani omu kiikaro Kadesi, baamanyisa Musa, Arooni n'ekitebe kyoona ebintu ebibaarozire, baabooleka ebijuma eby'ensi egi.

²⁷Kandi baagambira Musa bati: “Ensi ei watutumiremu tukagihikamu nungi kandi y'orweezo ijwire amata n'obwoki, binu nibyo ebijuma eby'ensi egi.

²⁸Kyonka abantu abarukwikaramu b'amaani embuga zaabo nkooto muno kandi igumire, ekindi tukarorayo baijukuru ba Anaki.

²⁹Abamaleki nibaikara omunsi ezinyakuli hansi ey'ensozi, Abahiiti, Abayebusi n'Abamooli, nibaikara omunsi ey'ensozi; kandi Abanyakanaani nibaikara omunsi eziri haihi n'Enyanja ey'Ebitoogo kandi ezinyakuheeriire ekisaaru Yorudaani.”

³⁰Baitu Kalebu yaculeeza abantu ali omumaiso ga Musa nagamba ati: “Tugende bwango tugitaahe, habwokuba nitusobora kurungi kusingura abantu abo.”

³¹Kandi abasaija abaagenzire na uwe baagamba bati: “Titurukusobora kugenda tukarwanisa abantu bali, habwokuba b'amaani kutukira.”

³²Habweki, ensi ei baatasire, baagiranga kubi hali Isirairi baagamba bati: “Ensi ei twagenzire niturabamu kugitata, nsi erukuhwerekereza abaikazi baamwo n'abantu bamwo boona aba twarozire oku, bantu b'ekyeemo kikooto.

³³Kandi oku, nuho twaboine Abanefiri abaijukuru ba Anaki ab'abasaija ebikaaka, Abanefiri itwe hali bo, twayeroraga tuli batoito muno nk'obusenene kandi nukwo twabasisaniraga.”