Read Runyoro - rutooro Kubar 14 Bible Online

Kubar 14 - Runyoro - rutooro bible

Kubar 14

¹Nubwo ekitebe kyona kyatoka muno; kandi abantu barra omu bwire bw'ekiro eki.

²Abantu boona Abaisirairi baahyemera Musa na Arooni; ekitebe kyona kyabagamba kiti: “Kakuba twaferiire omunsi Misiri, rundi hanu omwirungu!

³MUKAMA akatuleetera ki omunsi enu kwitwa abanyanzigwa? Bakazi baitu n'abaana baitu nibaija kwitwa, tikyakubaire kirungi kugaruka Misiri?”

⁴Kandi baagambirangana bati: “Twekomere omwebembezi, tugaruke Misiri.”

⁵Nubwo Musa na Arooni baagwire hansi bajuumaire omumaiso g'ekitebe ky'abantu boona aba Isirairi abakaba besoroize.

⁶Yoswa mutabani wa Nuuni na Kalebu mutabani wa Yefanaha abakaba bali omuli abo abaatasire ensi, baatemura engoye zaabo,

⁷baagambira ekitebe kyona eky'abantu ba Isirairi bati: “Ensi ei twarabangainemu kutata, nsi ehinguraine oburungi.

⁸MUKAMA obwaratugirra embabazi, ensi egi enyakwijwire amata n'obwoki naija kugitutaahya agituhe.

⁹Kimu kyonka, muleke kumwemera kandi muleke kutiina abantu ab'ensi egi, nitwija kubabinga hataroho bulemezi, tibakyaina arukubalinda, MUKAMA ali hamu na itwe, muleke kutiina.”

¹⁰Baitu ekitebe ky'abantu kyagambirangana kubateera amabaale. Nubwo abantu boona aba Isirairi baarozire ekitiinisa kya MUKAMA ha Heema ey'okutangatanganiramu.

¹¹Kandi MUKAMA yakaguza Musa ati: “Abantu banu baraahikya nkaha kungaya? Kandi baraahikya nkaha kutaanyikiriza? Kandi kunu mboolekere ebikorwa byoona?

¹²Kanyije mbaletere orufu mbamaleho, iwe nkwihemu ihanga ery'amaani kandi ery'obusobozi okukira bo.”

¹³Baitu Musa yagambira MUKAMA ati: “Eki, Abanyamisiri balikihurra, habwokuba abantu banu okabaiha Misiri n'obusobozi,

¹⁴kandi nibaija kugambira enzaarwa z'ensi enu. Bamazire kuhurra iwe MUKAMA nkooku oikara n'abantu banu, habwokuba ororangana nabo, ekicu kyawe kibeemera haiguru, kandi iwe obeebembera nyamusana oli omu nyomyo ey'ekicu, omu bwire bw'ekiro oba omu nyomyo ey'omurro.

¹⁵Hati, kakuba oita ihanga linu nk'arukwita omuntu omu, amahanga agaahuliire nkooku orukurangaanwa, nubwo galigamba gati:

¹⁶‘Habwokuba MUKAMA akaba atarukusobora kutaahya ihanga eri omunsi enu ei yagumize kubaha, nikyo yabaitiire omwirungu.’

¹⁷Hati nkwesengeriize, otwoleke obusobozi bwawe obw'amaani nkooku wanihiize noogamba ngu:

¹⁸‘MUKAMA tabiihirwa bwango, aikara aine engonzi ezitahwaho, aganyira obubi n'ensobi, baitu taleka kufubira omuntu wena anyakwina omusango afubira abaana habwebibi bya baise bo na baisenkurubo okuhika habwijukuru bw'enyakasatu nenyakana.’

¹⁹Nkoku oli w'embabazi nyingi muno, nkwesengeriize, ganyira abantu banu nkooku wakabaganyiire bakaba kuruga Misiri okuhika na hati.”

²⁰Nubwo MUKAMA yagambiire Musa ati: “Mbaganyiire nkooku ogambire;

²¹baitu mazimakwo nkooku ndi mwomeezi kandi ensi yoona ijwire ekitiinisa kyange,

²²ha bantu abarozire ekitiinisa kyange ebyamahano ebi nakoliire Misiri n'omwirungu, bakagaruka baandeenga emirundi n'emirundi, baayanga kuhurra eki ndukugamba,

²³busaho n'omu alirora ensi ei narahiire kuha baisenkurubo kandi busaho n'omu ha bantu abangayire aligirora.

²⁴Baitu Kalebu omuheereza wange, hab'okuba n'omwoyo ogutarukusisana n'ogwabo kandi anyesigira kimu, ndimutaahya omunsi, egi ensi ei yagenziremu, kandi n'abaijukuru be baligitunga.

²⁵Hati, Abamaleki n'Abanyakanaani habwokuba nibaikara omunsi ey'ekihanga nyenkya mukubuke mwimukye kugenda omwirungu, mukwate omuhanda ogunyakutwara ha nyanja ey'Ebitoogo.”

²⁶Kandi MUKAMA yakaguza Musa na Arooni ati:

²⁷“Ekitebe ky'abantu kinu ekibi, kirihikya nkaha kuntontorromera? Mpuliire okutontorroma kw'abantu ba Isirairi oku barukuntontorromera.

²⁸Bagambire ngu: ‘MUKAMA naagamba ati: Ndahiire ebimpuliire nimugamba, ndaabibakorra,

²⁹emitumbi yanyu erigwa mwirungu, ney'abantu boona abamwabazire abantontorromiire, ha boojo ab'emyaka amakumi abiri ey'obukuru n'okweyongerayo eriijura omwirungu linu,

³⁰tiharoho n'omu alitaaha omunsi ei narahiire nti: Nuho ndibaikaza. Kalebu mutabani wa Yafenaha na Yoswa mutabani wa Nuuni bonka, nubo baligitaaha.

³¹Baitu abaana banyu abato aba mugambire ngu nibaija kwitwa, nubo nditaahyamu kandi nubo balimanya ensi egi inywe mugayire.

³²Baitu inywe emitumbi yanyu erigarangatana omwirungu.

³³Kandi omwirungu eri, abaana banyu baliba baliisa okumara emyaka amakumi ana, kandi balibona enaku habw'obutaikiriza bwanyu, okuhika inywena obu mulikahwerekererra omwirungu.

³⁴Nkooku mwamazire ebiro amakumi ana nimutata ensi, nukwo mulimara emyaka makumi ana, nimufubirwa habw'ebibi byanyu omwaka gumu habw'ekiro kimu, kandi mulimanya nkooku ntasemeriirwe.’

³⁵Nyowe MUKAMA ninyowe ngambire; mazimakwo, kinu nikyo ndikora ekitebe kinu ekibi, abantu abeesoroize okundwanisa; omwirungu linu, nuho balihwerekererra.”

³⁶Abantu Musa aba yatumire okutata ensi, abaagarukire nibagitebya kubi, baaleeterra ekitebe kumuhyemera,

³⁷abasaija boona, MUKAMA akabaisa ebidanda.

³⁸Baitu Yoswa mutabani wa Nuuni na Kalebu mutabani wa Yefaneha nubo baasigara bali boomeezi hali abasaija abaagenzire kutata ensi.

³⁹Musa ebigambo ebi, yabigambira abantu ba Isirairi boona, abantu balirirra kimu.

⁴⁰Baimuka omu rukyakya, baatemba eruguru y'ensi ey'ensozi, baagamba bati: “Dora, itwe tuli hanu, twetekaniize kugenda omu kiikaro MUKAMA eki yaraganiize, kandi nitwikiriza nkooku twasisire.”

⁴¹Baitu Musa yakaguza ati: “Hati, habwaki mwongera, kwanga kukora MUKAMA ebi yaragiire, eki nimugira kiribarugiramu oburungi?

⁴²Mutagendayo, mutaikara kwitwa abanyanzigwa banyu, habwokuba, MUKAMA tali hamu na inywe.

⁴³Omumaiso ganyu oku, haliyo Abamaleki n'Abanyakanaani, nimwija kwitwa empirima; habwokuba, mugarukire enyuma, mwaleka kuhondera MUKAMA, MUKAMA taabe hamu na inywe.”

⁴⁴Nobwakubaire Musa akaba atarugire omu rukande hamu n'Esanduko y'Endaagano, baitu bakeyongera kwirrayo eruguru y'ensi ey'ensozi.

⁴⁵Nubwo Abamaleki n'Abanyakanaani abaikaraga omunsi ey'ensozi baasirimukire, baabahambya baabahikya Horuma.