Read Runyoro - rutooro Kubar 15 Bible Online

Kubar 15 - Runyoro - rutooro bible

Kubar 15

¹MUKAMA akagambira Musa ati:

²“Gambira Abaisirairi ngu: Obu mulihika omunsi ei murukugenda kwikaramu, ei ndukwija kubaha,

³mukagonza kuhongera MUKAMA ekihongwa ekikuruga omu igana ly'ente, ery'entaama rundi ery'embuzi kuba kihongwa eky'okwokya rundi kuba kyonzira kuhikiriza omuntu eki yaraganiize rundi kuba kihongwa eki ayegondiize rundi eky'obugenyi bwanyu obunyakumanyirwe kirugwemu ekisorrokoko ekirukuboyera MUKAMA,

⁴Ogu arukuleeta ekihongwa kye, ahongerege MUKAMA ekihongwa eky'ebyokulya, niyo kiloguraamu emu ey'ensaano enyakuniinuukire kurungi, enyakutabwirwe n'amagita ag'omuti oliva agarukuhikya lita emu,

⁵ateho na lita emu ey'eviini nikyo kibe kihongwa eky'eky'okunywa.

⁶Ekisoro ekirukuhongwa obu eraaba eri mpaya y'entaama, ekihongwa eky'ebyokulya kibe kiloguraamu ibiri ez'ensaano enyakuniinuukire kurungi, etabwirwe na lita emu n'ekicweka ey'amagita.

⁷Kandi alihayo ekihongwa eky'ekyokunywa eky'eviini, erukuboyera MUKAMA erukuhikya lita emu n'ekicweka.

⁸Obu otegeka kuhongera MUKAMA enimi niyo ebe kihongwa eky'okwokya, rundi kuba kyonzira, okuhikiriza eki waraganiize rundi okusaba obusinge hali MUKAMA,

⁹obu, omuntu ogu, enimi agihongege hamu n'ekihongwa eky'ebyokulya ekirukuhikya kiloguraamu isatu z'ensaano enyakuniinukire kurungi, etabwirwe na lita ibiri ez'amagita.

¹⁰Kandi ahonge ekihongwa eky'ekyokunywa ekirukuhikya lita ibiri ez'eviini erukuboyera MUKAMA.

¹¹“Eki nukwo kikorwege kiti ha buli nimi, ha buli mpaya y'entaama, habuli kyana eky'entaama ekihaya rundi eky'emburabuzi.

¹²Nukwo okolege oti buli kimu ha bintu ebi orukuhonga noosigikira ha muhendo gwabyo.

¹³Abantu enzaarwa boona, obu baraabaga nibahonga ekihongwa ekyokwokya ekirukuboyera MUKAMA nukwo bakolege bati.

¹⁴Omunyaihanga arukwikara na inywe, rundi omuntu weena anyakwikaire na inywe ebiro byanyu byona, kakuba na uwe agonza kuhonga ekihongwa eky'okwokya kikarugwamu ekisorrokoko ekirukuboyera MUKAMA, nawe akole nka inywe okumurukukora.

¹⁵Akasumi koona, ebiragiro eby'okuhonga nibyo bimu hali inywe n'abanyamahanga abanyakwikara na inywe, habwokuba, inywe nabo, hali Ruhanga nimusisana.

¹⁶Ebiragiro n'ebigambo, ebirukulema inywe nibyo ebirukulema n'abanyamahanga abarukwikara na inywe.”

¹⁷MUKAMA yagambira Musa ati:

¹⁸“Gambira abantu ba Isirairi ngu: Obu mulihika omunsi ei ndukwija kubatwaramu,

¹⁹obu muraalyaaga ebyokulya eby'ensi egi, muhongerege MUKAMA ekihongwa.

²⁰Obu muliba nimucumba emigaati erukuruga omu nsaano ey'omuganuro, omugaati ogw'okubanza, gubege gwa MUKAMA, nkooku mumuha omugabo, mumazire kuhuura.

²¹Ha migaati ei murabanzaaga kucumba muraahaga MUKAMA ekihongwa, obusumi bwanyu bwona.

²²“Baitu kakuba musobya, mutarukuhikiriza ebiragiro binu byona, MUKAMA ebi yagambiire Musa,

²³ebi byona MUKAMA ebi yabaragiire naatuma Musa, okuruga ha kiro eki yateeriireho ebiragiro n'okweyongerayo omu biro byanyu byona,

²⁴kakuba mulemwa kuhikiriza ebiragiro mutagenderiire kandi ekitebe eki kitakimanyire, ekitebe kyona kiheyoga enimi ento emu, ebe kihongwa eky'okwokya; kirugwemu ekisorrokoko ekirukuboyera MUKAMA, kiheebweyo n'ekihongwa eky'ebyokulya, n'ekihongwa eky'ekyokunywa. Nkooku ekiragiro kirukugamba, bongereho embuzi empaya emu.

²⁵Nyakatagara akole omukoro ogw'okweeza ekitebe ky'abantu, abantu baganyirwe ensobi zaabo, habwokuba ensobi egi ekakorwa etagenderiirwe, kandi nabo nikyo baheriireyo ekihongwa eky'ebyokulya kubaganyiza ebibi.

²⁶Ekitebe eky'abantu aba Isirairi baraaganyirwaga ensobi yabo, n'omunyaihanga arukwikara nabo, na uwe araaganyirwaga, habwokuba ensobi egi ekakorwa abantu boona.

²⁷“Kakuba omuntu omu asiisa atagenderiire, aheyo embuzi eruusi enyakuhikize omwaka gumu ebe kihongwa eky'okuganyiza ebibi.

²⁸Nyakatagara asabe MUKAMA aganyire omuntu ogu, anyakusobeze.

²⁹Omuntu weena anyakusiisa atagenderiire, ekiragiro kiri kimu, nikikwata abantu boona, abe nzaarwa rundi munyaihanga omwikazi.

³⁰Omuntu weena anyakusiisa agenderiire, abe nzaarwa rundi munyaihanga, agaya Ruhanga, ogu asendwege aruge omubantu b'owabu,

³¹habwokuba aba agayire MUKAMA eki yagambire, kandi acwire ekiragiro kye. Omuntu ogu asenderwe kimu; omusango guba gumusingire.”

³²Abaana ba Isirairi obu bakaba bakyaali omwirungu, bakasanga omuntu naasenya enku ha kiro kya Sabbato,

³³abo abaamusangire naasenya, baamuleetera Musa na Arooni, n'ekitebe kyona.

³⁴Baamuta omu nkomo habwokuba bakaba batamanyire kurungi eki baraamukora.

³⁵MUKAMA yagambira Musa ati: “Omusaija ogu asemeriire aitwe; ekitebe kyoona kimuteere amabaale aheeru y'orukande.”

³⁶Ekitebe kyoona eky'abantu baamutwara aheeru y'orukande, boona baamuteera amabaale, okuhika afiire nkooku MUKAMA yaragiire Musa.

³⁷MUKAMA yagambira Musa ati: “Gambira abantu ba Isirairi

³⁸kandi obateererre bate ebitutu ha byebu by'ebyokujwara byabo, bbo n'abaijukuru baabo boona, kandi buli kitutu ekya buli kyebu, bateho akayondo aka kaneke,

³⁹akasumi koona aka muraaroraga ekitutu, mwijukege ebiragiro bya MUKAMA, byona mubikwate obu nubwo mutalindugaho mukatwalirizibwa engonzi n'okwegomba kwanyu.

⁴⁰Habweki, mwijukege kandi mukwatege ebiragiro byange byona, nukwo mube abarukwera hali Ruhanga wanyu.

⁴¹Ninyowe MUKAMA Ruhanga wanyu, ayabaihire omunsi Misiri, mbe Ruhanga wanyu: Ninyowe MUKAMA Ruhanga wanyu.”