Read Runyoro - rutooro Kubar 16 Bible Online

Kubar 16 - Runyoro - rutooro bible

Kubar 16

¹ Koora mutabani wa Izahara, mwijukuru wa Kohati ow'oruganda rwa Leevi, hamu na Dasani, na Abiraamu batabani ba Eryabbu, na Oni mutabani wa Paasa, ab'oruganda rwa Rubbeni bakeemera Musa.

²Bayetabwaho abasaija abarukuhika bibiri n'ataano, bayetabwaho abeebembezi abaakomerwe ekitebe, abamanyirwe kurungi,

³baayemerra omumaiso ga Musa. Baahakaniza Musa na Arooni, nibagamba bati: “Ebi mukozire nibimara, habwokuba ekitebe kyona, abantu boona nibeera, kandi MUKAMA ali nabo, hati, habwaki mwenyumiriza muno ha kitebe eky'abantu ba MUKAMA?”

⁴Musa obu yahuliire ekigambo eki, yagwa ajuumaire;

⁵yagambira Koora na bataahi be ati: “Nyenkya MUKAMA araayoleka abe abarukwera kandi arabairiza haihi; abo abaaraakoma nubo arayeiriza haihi.

⁶Mukole muti, mukwate ebiswa, Koora n'ekitebe kye kyona,

⁷mubiteho omurro, mubiteho obubbaani, mubitwale omumaiso ga MUKAMA nyenkya, omuntu Ruhanga ou araakoma buli nuwe arukwera. Inywe batabani ba Leevi, mwekulize muno!” Musa yakaguza Koora ati:

⁸“Inywe batabani ba Leevi, hati muhurre,

⁹nimukyeta kintu ky'okuzaana, Ruhanga owa Isirairi kubasoroora omu kitebe ekya Isirairi kubaleeta mukamwirra haihi, kukora omulimo omunju ya MUKAMA n'okwemerra omumaiso g'ekitebe mukabaheereza.

¹⁰Kandi n'okubaleeta mwamwirra haihi, inywe hamu na bagenzi banyu batabani ba Leevi? Kandi nimwenda n'obunyakatagara?

¹¹Iwe n'ekitebe kyawe kyona mwesoroize hamu, nukwo muhakanize MUKAMA. Kandi Arooni ou murukuhyemera nuwe oha?”

¹²Musa yatuma abantu beete Dasani na Abiraamu batabani ba Leevi; baagarukamu bati: “Titurukwijayo,

¹³iwe kutuleeta okatwiha omunsi enyakwijwire amata n'obwoki, kutwitira omwirungu linu, na iwe wenka kwefoora mulemi waitu, eki kintu kitoito?

¹⁴Ensi enyakurumu amata n'obwoki, togitulesiremu kandi totuhaire Misiri n'engonjo tukabyetungira titurukwijayo. Abantu banu nogira tibarukurora?”

¹⁵Musa yabiihirwa muno yagambira MUKAMA ati: “Ekihongwa kyabo otakiikiriza, tinkabaihahoga nkaina n'emu, kandi tinkakoraga kubi muntu n'omu.”

¹⁶Musa yagambira Koora ati: “Nyenkya, iwe n'ekitebe kyawe kyona, muzooke omumaiso ga MUKAMA, iwe, bbo, na Arooni.

¹⁷Buli omu, abe n'ekiswa kye, ateho obubbaani, akireete omumaiso ga MUKAMA, ebiswa bibiri na ataano, kandi iwe na Arooni, buli omu n'ekiswa kye.”

¹⁸Habweki boona baakwata ebiswa byabo, baabitaho omurro, baataho emyamirro, baayemerra ha mulyango ogw'Eheema ey'okutangatanganiramu, bali hamu na Musa na Arooni.

¹⁹Nubwo Koora yasoroize abantu ha mulyango ogw'Eheema ey'okutangatanganiramu, ekitiinisa kya MUKAMA kyazooka, kyarorwa ekitebe kyona.

²⁰MUKAMA yagambira Musa na Arooni ati:

²¹“Inywe mwebaganize, ha kitebe kinu, nukwo nkimaleho omu kasumi kake.”

²²Musa na Arooni, baagwa bajuumaire, baagamba bati: “Ai Ruhanga, Ruhanga ow'emyoyo y'abantu boona, omuntu nuwe asiisire, orabiihirirwa ekitebe kyona?”

²³MUKAMA yagambira Musa ati:

²⁴“Gambira ekitebe ky'abantu ngu: Mwirreyo, muruge ha Heema ya Koora, Dasani n'Abiraamu.”

²⁵Nubwo Musa ahondiirwe abeebembezi ba Isirairi, baimuka baagenda nambere Dasani na Abiraamu ha bakaba bali.

²⁶Musa yagambira ekitebe ky'abantu ati: “Mbeesengeriize, mugende muruge haihi n'Eheema ez'abantu banu ababi, mutakwataho naakamu ha bintu byabo, na inywe timwikara kuhwaho habw'ekibi kyabo.”

²⁷Habweki, abantu bairrayo, baaruga ha Heema ya Koora, Dasani na Abiraamu; nubwo Dasani na Abiraamu baaturukire, baayemerra, buli muntu omu mulyango ogw'Eheema, bali hamu na bakazi baabo, batabani baabo, n'abaana baabo abato.

²⁸Musa yagamba ati: “Hanu nuho muraamanyira MUKAMA nkooku yantumire kukora emirimo enu yoona, tihali habw'okwegonza kwange nyenka.

²⁹Kakuba abantu banu baitwa orufu orunyakwita abantu boona, rundi bakagwerwa akabi koona boona buli MUKAMA tantumire.

³⁰Baitu MUKAMA kakuba ataho ebintu ebihyaka, itaka likeesama, likamira n'ebyabo byona, bakasirimuka Nyabuyonga bali boomeezi, obu muraamanya abantu banu nkooku bagayire MUKAMA.”

³¹Obu akaba naakyamara kugamba ebigambo ebi, itaka eri bakaba beemeriireho, lyabaganukamu habiri,

³²ensi yayesama, yabamira n'oruzaaro rwabu,

³³abantu boona aba Koora, n'ebintu byabo byoona, baasirimuka Nyabuyonga bakyaali boomezi, baaruga omukitebe eky'abantu, ensi yagaruka yateerana, baahwerekerra.

³⁴Abaisirairi boona abakaba bali aho babeehinguliriize, bairuka nibarra, habwokuba bakatekereza bati: “Ensi tiikara kutumira.”

³⁵Kandi omurro gwaruga hali MUKAMA, gwahwerekereza abasaija bali bibiri na ataano abakaba nibahonga obubbaani.

³⁶Nubwo MUKAMA yagambiire Musa ati:

³⁷“Gambira Eryeza mutabani wa Arooni nyakatagara, aihe ekiswa omumanda agarukwaka, hanyuma arahize omurro. Habwokuba ebiswa nibyeera,

³⁸ebiswa eby'abasaija abo abaasiisire kandi baahwerekerra, biheeswemu esahaani ez'okusweeka itambiro, habwokuba ebiswa bakabihongera MUKAMA, nahabweki, nibyeera. Nikyo biraabeeraga akakurorraho ha abantu ba Isirairi.”

³⁹Nubwo Eryeza nyakatagara yakwata ebiswa eby'omuheerre, abo abaayokiibwe omurro ebi baahongere, byaheeswamu ekisweeko eky'okusweeka itambiro,

⁴⁰kibe kintu eky'okwijukya Abaisirairi, nukwo omuntu weena atali nyakatagara, ow'omu baijukuru ba Arooni, tasemeriire kwirra haihi kucumika emyamirro omumaiso ga MUKAMA nka Koora, kandi nk'ekitebe kye nkooku MUKAMA yagambiire Eryeza naatuma Musa.

⁴¹Ha kiro ekyakurasireho, ha bwire obwa nyenkya, ekitebe kyona eky'abantu ba Isirairi, baahyemera Musa na Arooni nibagamba bati: “Oisire abantu ba MUKAMA.”

⁴²Ekitebe ky'abantu obu kyayesoroolizeho Musa kumurwanisa n'okurwanisa Arooni, bbo baahindukira Eheema ey'okutangatanganiramu, ekyarugiremu, Eheema yasweekererwa ekicu, ekitiinisa kya MUKAMA kyarorwa,

⁴³Musa na Arooni baija omumaiso ag'Eheema ey'okutangatanganiramu,

⁴⁴MUKAMA yagambira Musa ati:

⁴⁵“Ruga hagati omu kitebe ky'abantu, nukwo nkimaleho omu kaanya kake”, Musa na Arooni baagwa hansi bajuumaire.

⁴⁶Musa yagambira Arooni ati: “Kwata ekiswa kyawe, okiteho omurro ogwa ha itambiro, kandi oguteho obubbaani, okiirukye bwango, okitwarre ekitebe ky'abantu, obasabire, habwokuba MUKAMA akwasirwe ekiniga, orufu rwatandika.”

⁴⁷Nubwo Arooni yakwata ekiswa nkooku Musa yagambire, yairuka yataaha hagati y'abantu; yasanga orufu rubagwiremu ira; yata obubbaani ha ruswa; yasabira abantu.

⁴⁸Yayemerra hagati y'abantu abakaba bafiire n'abakaba bakyayomiire; kagingo yaculeera.

⁴⁹Abantu abaisirwe kagingo, bakahika omutwaro gumu nkumi ina n'orusanju, otabaliiremu abaafiire habw'ensobi ya Koora.

⁵⁰Kagingo obu yaculiire, Arooni yagaruka nambere Musa akaba ali ha mulyango ogw'Eheema ey'okutangatanganiramu.