Read Runyoro - rutooro Kubar 17 Bible Online

Kubar 17 - Runyoro - rutooro bible

Kubar 17

¹MUKAMA akagambira Musa ati:

²“Gambira abantu ba Isirairi kandi obaragire bakuhe emiigo yabo, omu buli nju ya baisenkurubo harugemu omwigo gumu, abeebembezi baabo boona obaihemu emiigo ikumi n'ebiri nkamaju ga baise bo oku gali ikumi n'abiri. Ha mwigo ogwa buli muntu ohandiikeho ibara lye.

³Ha mwigo ogwa Leevi ohandiikeho ibara erya Arooni. Habeho omwigo gumu ogurukumanyisa buli nju ya baise bo.

⁴Hanyuma emiigo egi, ogite omu Heema ey'okutangatanganiramu omumaiso ag'esanduuko nambere tutangatanganira.

⁵Omwigo gw'omuntu ou ndakoma, nigwija kurokera. Nukwo ndaaculeeza nti Abaisirairi balekere aho kubahyemera.”

⁶Musa yagambira abantu ba Isirairi; abeebembezi baabo boona baamuha emiigo yabo, omwigo gumu gumu ogurukumanyisa buli mwebembezi, emiigo ikumi n'ebiri erukwingana n'amaju ga baise bo ikumi n'abiri; omwigo ogwa Arooni nagwo gukaba guli omu miigo ey'abandi.

⁷Musa emiigo yagita omu Heema ey'okutanganiramu, omumaiso ga MUKAMA.

⁸Nyenkya obu bwakiire Musa yataaha omu Heema enyakurumu Esanduuko ey'Endagaano yasanga omwigo gwa Arooni ogw'enju ya Leevi gurokiire, gwakize, gwanire n'ebijuma n'okwenga byengere.

⁹Nubwo Musa yaturukya emiigo yoona, yagiiha omumaiso ge, yagitwarra abantu boona aba Isirairi; baayerorra bonka, buli muntu yakwata omwigo gwe.

¹⁰MUKAMA yagambira Musa ati: “Omwigo gwa Arooni gugarre omumaiso g'Eesanduuko y'Endagaano nuho gwikale, nugwo gunanule abeemi nkooku osobora kubatanga, balekere aho kubahyemera, kakuba batalekera aho, buli okufa kubahikireho.”

¹¹Musa nukwo yakozire; MUKAMA nkooku yamuragiire.

¹²Abantu ba Isirairi baagambira Musa bati: “Itwe tufiire! Itwena tuhwerekeriire tuhoireho n'enkerembe.

¹³Weena arairra haihi, nangwa akairra haihi enju ya MUKAMA, ogu w'okufa. Obu itweena tuli bokuhwerekerra?”