Read Runyoro - rutooro Kubar 18 Bible Online

Kubar 18 - Runyoro - rutooro bible

Kubar 18

¹MUKAMA nukwo kugambira Arooni ati: “Iwe na batabani bawe na boona ab'eka ya sso ninywe muraajunaanwaga obubi bwona oburukuhika ha kiikaro ekirukwera kandi iwe na batabani bawe, ninywe muraajunaanwaga omulimo gwanyu ogw'obunyakatagara.

²Oleete na bagenzi bawe ab'oruganda rwa Leevi, ab'oruganda rwasso, baikale na iwe bakukorre emirimo, iwe na batabani bawe obu muraabaga muli omumaiso ag'Esanduuko ey'Endagaano.

³Bakuheerezeege kandi bakolege emirimo yoona ey'omu Heema; kyonka batalirra haihi ebikwato eby'Ekiikaro Ekirukwera rundi kwirra haihi itambiro, bbo na iwe inywena mutaliija kufa.

⁴Baikale na iwe, kandi barolerre Eheema ey'okutangatanganiramu;

⁵bakole emirimo yoona ey'ekiikaro n'ey'itambiro, nukwo abantu ba Isirairi baleke kugaruka kubiihirwa.

⁶Bagenzi bawe Abaleevi, mbaihire omu bantu ba Isirairi mbabahaire, kisembo kyanyu kandi kisembo ekinyakuhairwe MUKAMA, kukoraga omulimo ogw'Eheema ey'okutangatanganiramu.

⁷Iwe na batabani bawe, mukolege emirimo yoona ey'obunyakatagara bwanyu erukukwata ha itambiro na ha byona ebinyakuli omunda y'enyigamo; ninywe muheerezeege. Obunyakatagara mbubahaire kiri kisembo, kandi omuntu weena atasemeriire anyakubwetaahyamu, aitwege.”

⁸Hanyuma MUKAMA yagambira Arooni ati: “Byona ebirukusaaga ha bihongwa ebinyakumpongerwa, ebintu byona ebirukwera eby'abantu ba Isirairi, ebi byona mugabo gwawe, kandi gwa batabani bawe ogu baraheebwaga ebiro byona.

⁹Ebintu ebirukwera muno ebitayokebwege ha itambiro, ogu guraabaga mugabo gwanyu. Buli kihongwa kyabo kyona: eky'ebyokulya, eky'okuganyiza ekibi n'eky'okwihisaaho omusango, ebi bandeetera biraabaga bintu birukwera hali iwe na ha batabani bawe.

¹⁰Omu Kiikaro Ekirukwera nuho obiriirege; buli musaija naikirizibwa kubirya, kintu ekirukwera hali iwe.

¹¹Ekihongwa eky'ekisembo, ebihongwa byona eby'okwimukyaimukya eby'abantu ba Isirairi, ebi na byo byawe; byona mbikuhaire n'abatabani bawe, na bahara bawe, babiheebwege ebiro byona; omuntu atarukuzira anyakuli omunju yawe abiryehoga.

¹²Amagita goona aganyakukirra kimu oburungi, eviini yoona erukukirra kimu oburungi, engano erukukirra kimu oburungi, ebijuma eby'omuganuro ebi baha MUKAMA, mbikuhaire.

¹³Ebijuma eby'omuganuro ebinyakwengere ebya buli kintu ekinyakuli omunsi yabo eki baleetera MUKAMA, kibege kyawe; omuntu weena atarukuzira anyakuli omu nju yawe akiryehoga.

¹⁴Ekintu kyona Abaisirairi eki bahonga, kibege kyawe.

¹⁵Ekizigaijo kyona, eki bahongera MUKAMA, eky'omuntu rundi eky'ebisoro, kibege kyawe, kyonka ekizigaijo eky'omuntu okicungulege.

¹⁶Kandi omuhendo gwabyo ogw'okubicungura bihikize okwezi kumu, obicunguze ebicweeka bitaano eby'efeeza ezirukwingana sente ez'Ekiikaro Ekirukwera.

¹⁷Baitu omuzigaijo ogw'ente rundi ogw'entaama, rundi ogw'embuzi emburabuzi otaligucungura; ebi nibyeera. Esagama yabyo ogimiisirege itambiro, ebisajwa byayo obyokye, kibe kihongwa eky'okwokya n'omurro, ekinyakurugwamu ekisorrokoko ekinyakuboyera Ruhanga;

¹⁸baitu enyama yabyo ebege yawe nk'ekisoro ekinyakwimukyaimukibwa oku kiba kyawe, n'ekirumbu eky'obulyo nkooku kiba kyawe.

¹⁹Ebihongwa byona ebirukwera abantu ba Isirairi ebi bahongera MUKAMA, mbikuhaire, mbihaire batabani baawe na bahara baawe mubiheebwege ebiro byona; egi niyo ndagaano etalicweka, endagaano ey'abantu na Ruhanga ey'ebiro n'ebiro, hali iwe na ha baana bawe.”

²⁰MUKAMA yagaruka yagamba Arooni ati: “Toligira nsi ei olibagana omunsi yabo kandi tolibatungamu na mugabo gwona, ninyowe mugabo gwawe kandi bugwetwa bwawe omu bantu ba Isirairi.

²¹“Omu Isirairi, Abaleevi mbahaire ekicweka ekya ikumi eky'ebintu ebiheebwayo, nubwo bugwetwa bwabo, niyo mpeera ey'omulimo ogu bakora omu Heema ey'okutangatanganiramu.

²²Kandi okuruga hati, abantu ba Isirairi batalyongera okwirra haihi Eheema ey'okutangatanganiramu, bataliikara kusangwa n'ekibi bakafa.

²³Abantu Abaleevi boonka, nubo bakolege omulimo ogw'Eheema ey'okutangatanganiramu, nubo baraakaguzibwaga kyona ekinyakukorwamu. Eki kibe kiragiro eky'ebiro byona. Kandi omu bantu ba Isirairi, Abaleevi tibaligiramu mugabo gw'ensi.

²⁴Habwokuba ekicweka ekya ikumi eky'ebintu abantu eki bahongera MUKAMA, nikyo mbahaire, gube mugabo gwabo; nikyo ngambiire nti tibaligira bugwetwa omu bantu ba Isirairi.”

²⁵MUKAMA akagambira Musa ati:

²⁶“Ekindi, ogambire Abaleevi ngu: ‘Obu murabaga nimwihaho abantu ba Isirairi ekicweka ekya ikumi ekimbahaire, kuba mugabo gwanyu, mwihehoga ekihongwa eky'okuhongera MUKAMA, nikyo kicweka kimu kya ikumi ky'omugabo gwanyu.

²⁷Ekihongwa kyanyu kibabalirwege kwingana nk'engano yoona enyakuhwirwe, rundi obwingi bw'eviini yoona enyakujungirwe.

²⁸Kandi, muleeterege MUKAMA ebihongwa ebi murukwiha ha bicweka byanyu eby'ikumi ebi mwihaho abantu ba Isirairi, nuho mwihe ekihongwa kya MUKAMA eky'okuha Arooni nyakatagara.

²⁹Ha bisembo byona ebi muraatungaga, muhongerege MUKAMA ekihongwa ekinyakusemeriire, hali ebi ebirukukirra kimu oburungi, nuho mwihe ebirukwera.’

³⁰Habweki, ogambire Abaleevi ngu: ‘Obu muraamaraga kuhonga ekirukukira oburungi ha bihongwa byanyu, ekiraasigarahoga kiiriibwege Abaleevi, nk'ebyokulya ebinyakuhwirwe rundi eviini enyakujungirwe.

³¹Ekihongwa eki, nimwikirizibwa kukiriira hoona hamurukwenda, inywe n'abantu ab'eka yanyu boona; habwokuba egi niyo mpeera yanyu ey'omulimo ogu mukora omu Heema ey'okutangatanganiramu.

³²Obu muliihaho ekirukukira oburungi mukakihonga, muliba mutakozire ekibi. Mutalizaanisa ebintu ebirukwera eby'abantu ba Isirairi, bitaliija kubarugiramu okufa.’ ”