Read Runyoro - rutooro Kubar 19 Bible Online

Kubar 19 - Runyoro - rutooro bible

Kubar 19

¹MUKAMA akagambira Musa na Arooni ati:

²“Kinu nikyo kiragiro MUKAMA eki ataireho: Gambira Abaisirairi, bakuleetere enyana kagaaju etanyina bulemu, etanyina kamogo kandi etakateebwaga kikoligo omu bikya byayo.

³Ogikwase Eryeza nyakatagara, enyana egi etwarwe aheeru y'orukande, bagiite naarora.

⁴Kandi Eryeza nyakatagara aibike orukumo omu sagama yayo nke, agimiise emirundi musanju omumaiso ag'Eheema ey'okutangatanganiramu.

⁵Enyana egi bagyokeze omumaiso ge; oruhu rwayo, enyama, esagama n'obusa bwayo, byona byokebwe.

⁶Nyakatagara akwate ekyasi eky'omuti kasiya, omweza, omwihura n'ehuuzo ezirukugaajuka, abinage hagati omu nyama y'enyana erukuhya.

⁷Hanyuma nyakatagara ayogye ebyokujwara nawe ayoge nukwo agaruke omu nkambi, nyakatagara ogu araabaga nazirwa okuhika omu kairirizi.

⁸Omuntu ogu anyakwokeze enyana, ayogye engoye ze kandi na uwe ayoge, araabaga nazirwa okuhika omu kairirizi.

⁹Kandi omuntu atarukuzira, ayoole iju ery'enyana egi, aliseese omu kiikaro eky'ecumi aheeru y'orukande; lirindirwe ekitebe eky'abantu ba Isirairi kulihyangira omu maizi ag'okweeza abantu gabaiheho ebibi.

¹⁰Kandi omuntu ogu arukuyoora iju ery'enyana, ayogye engoye ze, araabaga nazirwa okuhika omu kairirizi. Kinu nikyo kiragiro eky'ebiro byona ekinyakuteerirweeho abantu ba Isirairi n'omunyaihanga arukwikara nabo.

¹¹Omuntu ogu arukukwata ha mutumbi ogw'omuntu araazirwaga okumara ebiro musanju;

¹²ayoge ha kiro ekya kasatu na ha kiro ekya musanju, nukwo aleke kuzirwa; baitu kakuba ateesemeza ha kiro ekya kasatu na ha kya musanju, aliikara nazirwa.

¹³Weena anyakukwata ha mutumbi gw'omuntu weena anyakufiire, akalema kwesemeza wenka, asiisa enju ya MUKAMA, omuntu ogu asendwege aihwe omu Isirairi; habwokuba atamiisirwe maizi aganyakwihaho ebibi, araikaraga nazirwa.

¹⁴“Omuntu obu araafeeraga omu Heema, ekiragiro nikyo kinu: buli omu arukutaaha omu Heema kandi buli omu anyakusangirwemu, arazirwaga okumara ebiro musanju.

¹⁵Kandi buli kintu kyona ekinyakukwatirwamu ekitafundikiire, kirazirwaga.

¹⁶Omuntu weena anyakuli omu bwerre arukukwata ha muntu anyakwisirwe ekintu eky'okurwanisa rundi anyakweferiire, igufa ly'omuntu ayafiire rundi ekituuro, araazirwaga okumara ebiro musanju.

¹⁷Abantu abo abarukuzirwa, bayoole iju ery'ekihongwa ekyokiibwe okuganyiza ekibi omu kintu nambere liri, balihyangise amaizi ag'ekisaaru ekirukugera.

¹⁸Nubwo omuntu atarukuzirwa akwate omweza, n'omwihura abiibike omu maizi agamiisire Eheema n'ebintu byona eby'omunju, abantu boona abakaba barumu, n'ogu ayakwasire ha igufa, omuntu ayaisirwe, ayayefeeriire rundi ekituuro.

¹⁹Kandi omuntu ogu atarukuzirwa omurundi ogu, ha kiro kya kasatu n'ekya musanju, agamiisire oli arukuzirwa, nukwo amwezeege ati ha kiro ekya musanju; anyakweziibwe, ayogye ebyokujwara bye na uwe wenka ayoge, omu kairirizi araaba atakyazirwa.

²⁰“Baitu omuntu arukuzirwa kakuba ateesemeza, ogu asendwege aihwe hagati y'ekitebe, habwokuba asiisire Ekiikaro Ekirukwera ekya MUKAMA; tamiisirwe amaizi aganyakwihaho abantu oburofu, aikara nazirwa.

²¹Ekiragiro kinu ky'ebiro byona hali bo. Omuntu ogu arukumiisa amaizi agarukwihaho oburofu ayogye engoye ze; kandi ogu arukukwataho amaizi aganyakwogyaaho obubi, araabaga nazirwa okuhika omu kairirizi.

²²Omuntu arukuzirwa, kyona eki arukukwataho buli nikizirwa; kandi weena arukukikwataho nawe nazirwa okuhika omu kairirizi.”