Read Runyoro - rutooro Kubar 2 Bible Online

Kubar 2 - Runyoro - rutooro bible

Kubar 2

¹MUKAMA akagambira Musa na Arooni ati:

²“Abantu ba Isirairi bateerege enkande, buli muntu omu kicweka kye kyonyini, nibahondera ebendera ey'ebitabu ebyabaisenkurubo, ha buli rubaju, bateerege enkande baroleriire Eheema ey'okutangatanganiramu.

³Abo abaraateeraga orukande ha rubaju orwa Burugaizooba, nubo ab'ebendera ey'orukande rwa Yuda nibahonderana omu bitebe by'enganda zaabo, omwebembezi w'abantu ba Yuda, nuwe Nahasoni mutabani wa Aminadabbu,

⁴ihe rye obu lyabazirwe, likahikya abaserikale emitwaro musanju mu nkumi ina n'orukaaga.

⁵Abaraateeraga orukande enyuma ye, nubo ab'oruganda rwa Isakara, omwebembezi w'abantu ba Isakara nuwe Nasanairi mutabani wa Zuhara,

⁶ihe lye obu lyabazirwe likahikya abantu emitwaro etaano mu nkumi ina n'ebikumi bbina.

⁷Hongereho ab'oruganda rwa Zabburuni, omwebembezi w'abantu ba Zabburuni, uwe Eryabu mutabani wa Heroni,

⁸ihe rye obu lyabazirwe, likahikya abantu emitwaro etaano mu kasanju n'ebikumi bbina.”

⁹Omuhendo gwona ogw'orukande rwa Yuda omu bitabu byabo, niguhika abantu emitwaro ikumi na munaana, mu kakaaga n'ebbina. Abaana ba Isirairi obu baraabaga nibaimukya kugenda, abo nubo babanzege.

¹⁰Ha bukiizi obw'obulyo, nuho habege ebendera ey'orukande orwa Rubbeni omu bitabu byabo, omwebembezi w'abantu ba Rubbeni nuwe Erizura mutabani wa Sedura,

¹¹ihe rye ryona obu lyabazirwe, likahikya abantu emitwaro ena, mu kakaaga n'ebitaanu.

¹²Abarateeraga orukande enyuma ye, nubo ab'oruganda rwa Simyoni, omwebembezi w'abantu be nuwe Serumyeri mutabani wa Serisadayo,

¹³ihe rye ryona obu lyabazirwe likahikya abantu emitwaro etaano, mu kenda n'ebisatu.

¹⁴Hakurateho ab'oruganda rwa Gaadi, omwebembezi w'abantu be nuwe Eryasafu mutabani wa Lehweri,

¹⁵ihe rye obu lyabazirwe likahikya abaserikale emitwaro ena mu nkumi itaano rukaaga n'ataano.

¹⁶Omuhendo gwona ogw'omu rukande orwa Rubbeni nkooku baahandikirwe omu mahe gaabo, bakahika mitwaro ikumi n'etaano, rukumi bbina n'ataano. Abaana ba Isirairi obu baraabaga nibaimukya kugenda, abo nubo baraabaga ba kabiri.

¹⁷“Nubwo haimukyege Eheema ey'okutangatanganiramu, oruganda orw'Abaleevi ruli hagati y'enkande ezindi nkooku bateera enkande, nukwo baraimukyaga kugenda, buli ruganda niruhondera ebendera yarwo.”

¹⁸“Ha rubaju orwa Burugaizooba, habeyoga ebendera ey'oruganda rw'Efuraimu, nkooku bategekerwe omu mahe gaabo, omwebembezi ow'abantu be, nuwe Erisama mutabani wa Amihudi,

¹⁹ihe rye obu lyabazirwe, likahikya abaserikale emitwaro ena n'ebitaano.

²⁰Abaraateeraga orukande enyuma ye nubo ab'oruganda rwa Manaase, omwebembezi ow'abantu be nuwe Gamalyeri mutabani wa Pedazura,

²¹ihe rye obu lyabazirwe likahikya abaserikale emitwaro esatu nkumi ibiri, n'ebibiri.

²²Hakurateho oruganda rwa Benyamiini omwebembezi w'abantu be nuwe Abidaani mutabani wa Gidyoni.

²³Ihe rye obu lyabazirwe, likahikya abaserikale emitwaro esatu nkumi itaano, ne'bbina.

²⁴Omuhendo gwona ogw'abantu ab'omu rukande orwa Efuraimu nkooku baahandiikirwe omu mahe gaabo bakahika mitwaro ikumi kanaana n'ekikumi. Abaana ba Isirairi obu baraabaga nibaimukya kugenda, abo nubo babege ba kasatu.”

²⁵“Ha bukiizi obw'emoso, harabayoga ebendera ey'orukande orwa Daani nkooku baategekerwe omu mahe gaabo, omwebembezi ow'abantu be nuwe Ahyezeri mutabani wa Amisadai,

²⁶ihe rye obu lyabazirwe likahikya abaserikale emitwaro,

²⁷mukaaga, omu nkumi ibiri n'orusanju. Hakurateho oruganda rwa Aseera, omwebembezi w'abantu be nuwe Pagyeri mutabani wa Ocurani,

²⁸ihe rye obu lyabazirwe likahikya abaserikale emitwaaro ena rukumi n'ebitaano.

²⁹Hakurataho oruganda rwa Nafutaali, omwebembezi w'abantu be nuwe Ahira mutabani wa Enani,

³⁰ihe rye obu lyabazirwe likahikya emitwaaro etaano nkumi isatu n'ebbina.

³¹Omuhendo gwona ogw'abantu ab'orukande orwa Daani, gukahika, emitwaro ikumi n'etaano kasanju, n'orukaaga. Abaana ba Isirairi obu baraabaga nibaimukya kugenda, abo nubo bamalirrege nibahondera ebendera ez'ebitabu byabo.”

³²Ogu nugwo omuhendo ogw'abantu ba Isirairi, nkooku baabazirwe omu bitabu ebya baisenkurubo; boona abaabazirwe omu nkande zoona nkooku bakaba bategekerwe omu mahe gaabo, bakahika emitwaro nkaaga, nkumi isatu, mu bitaano n'ataano.

³³Baitu Abaleevi batabalirwe omu baana ba Isirairi nkooku MUKAMA akaba aragiire Musa.

³⁴Abaana ba Isirairi nukwo bakozire bati. Baateeraga enkande zaabo, bahikiriza byona, MUKAMA nkooku yaragiire Musa nibahondera ebendera zaabo, kandi obu baabaga nibaimukya kugenda nabwo nukwo bahonderanaga bati, buli bantu omu ruganda rwabu, nibahondera ebitabu bya baisenkurubo nkooku biri.