Read Runyoro - rutooro Kubar 20 Bible Online

Kubar 20 - Runyoro - rutooro bible

Kubar 20

¹Omukwezi okw'okubanza, ekitebe kyona eky'abantu ba Isirairi bakahika omu irungu erya Zini; baikara omu kiikaro Kadesi oku Miryamu nuho yaferiire kandi nuho yaziikirwe.

²Abantu obu baabuzirwe amaizi, baayesorooza baagenda hali Musa na Arooni.

³Baakunganiza Musa bati: “Haa boojo! Kakuba naitwe twafiire, omu kasumi kali, bagenzi baitu aka baafeeriiremu omumaiso ga MUKAMA!

⁴Kiki ekyakuleeseze ekitebe kya MUKAMA omwirungu linu nukwo tuligwemu, itwe n'ente zaitu?

⁵Kiki ekyakutwihisize Misiri, kutuleeta omu kiikaro ekibi kinu, kinu tikiri kiikaro ekisobora kweza engano, emitini, emizaabbibbu, rundi ensaali; kandi busamu na maizi ag'okunywa.”

⁶Nubwo, Musa na Arooni baaruga omumaiso g'ekitebe, baagenda ha mulyango ogw'Eheema ey'okutangatanganiramu, baajumara, baayamirra MUKAMA nibagamba bati: “Ai, MUKAMA Ruhanga, ohurre etoko y'abantu banu.”

⁷MUKAMA yagambira Musa ati:

⁸“Kwata omwigo ogu, osorooze ekitebe, oli hamu na Arooni mugenzi wawe; muragire omwandara babaroleriire gurugwemu amaizi; nukwo banywe, n'ente zaabo zinywe.”

⁹Musa omwigo yagwiha omumaiso ga MUKAMA nkooku yamuragiire.

¹⁰Musa na Arooni baasoroza ekitebe, baakireeta omumaiso g'omwandara, Musa yabagambira ati: “Hati mutege amatu, inywe abeemi; omu mwandara gunu tubaihiremu amaizi murole?”

¹¹Musa yaimukya omukono gwe akwasire omwigo yateera omwandara kabiri; gwarugwamu amaizi maingi muno, abantu baanywa n'ente zaabo zaanywa.

¹²MUKAMA yajunana Musa ati: “Habwokuba tonyesigire, kwoleka obusobozi bwange omumaiso g'abantu ba Isirairi, habweki ekitebe kinu, torukwija kukitaahya omunsi ei naraganiize kubaha.”

¹³Ago nugo maizi aga Meriba, nambere abantu ba Isirairi baakunganiririize MUKAMA, kandi nambere yayeyolekiire nkooku ali muhikiriire.

¹⁴Musa yatweka abakwenda baaruga Kadesi bagenda hali omukama w'Edomu, bamugambire bati: “Mugenzi wawe Isirairi naagamba ati: Noomanya obulemeezi bwona obwatugweriire:

¹⁵baisenkuruitwe nkooku baagenzire Misiri, naitwe nkooku twaikaire Misiri omwanya mukooto; Abanyamisiri nkooku baatubonaboneseze hamu na baisiitwe;

¹⁶obu twateeriire MUKAMA enduuru, akagihurra, yatuma malaika, yatwiha Misiri; hati tuli hanu, omunsi erukwetwa Kadesi, nurwo orubuga orunyakuli ha mutaano gwawe.

¹⁷Hati nitukusaba otwikirize turabe omunsi yawe. Titurukwija kusiisa orugonjo rwawe, rundi kunywa amaizi ha maziba gawe, nitwija kugenda tuterekeriire, tukwasire omuhanda omukooto gwonka, titwakubuke ha mukono ogw'obulyo rundi ogw'emoso okuhika obu turakamara kuraba ha mutaano gwawe.”

¹⁸Baitu Edomu yamugarukamu ati: “Otaraba hanu, obu oraahambiriza, ninyija kuturuka n'empirima nkurwanise.”

¹⁹Abaisirairi baamugarukamu bati: “Leka tutwarwe oruguudo, nyowe n'ente obuturaanywaho amaizi gawe, ndaagasasura; ekindukukusaba kiri kimu kyonka, leka ndabeho nindubata, nikyo kyonka.”

²⁰Baitu uwe yagarukamu ati: “Otarabaho.”

²¹Nubwo Edomu yaija kurwanisa Abaisirairi kuraba omunsi ye; Abaisirairi baatoma omuhanda gundi, nukwo haleme kubaho empaka.

²²Ekitebe kyona eky'abantu ba Isirairi, baaruga Kadesi baahika ha rusozi Hora, ha mutaano gw'ensi Edomu,

²³MUKAMA yagambira Musa na Arooni ati:

²⁴“Arooni naija kufa akurate abaabo; tarukwija kutaaha omunsi ei nahaire abantu ba Isirairi, habwokuba, obu mukaba muli ha maizi aga Meriba, mukanga kuhurra eki naragiire.

²⁵Genda oleete Arooni n'omutabani n'Eryeza ha rusozi runu Hora;

²⁶Arooni omujuulemu ebyokujwara bye obijweke omutabani Eryeza; uwe afeere oku akurate abaabu.”

²⁷Musa yakora MUKAMA nkooku yamuragiire; baatemba ha rusozi Hora, ekitebe kibaroleriire.

²⁸Musa yajuuramu Arooni ebyokujwara bye, yabijweka omutabani Eryeza; ha rusozi oru, Arooni nuho yagwire. Nubwo Musa na Eryeza baasirimuka orusozi.

²⁹Ekitebe kyona obu kyarozire Arooni nkooku afiire, eka ya Isirairi yoona yamulirirra okumara ebiro makumi asatu.