Read Runyoro - rutooro Kubar 21 Bible Online

Kubar 21 - Runyoro - rutooro bible

Kubar 21

¹Omukama ow'Aradi, Omunyakanaani, ayaikaraga omunsi ez'obukiizi bw'obulyo obwa Kanaani, obu yahuliire ngu Abaisirairi nibaija, baleesirwe omuhanda gw'Asarimu, yagenda kubarwanisa abamu yabanyaga.

²Abaisirairi bahaya omumaiso ga MUKAMA nibagamba bati: “Mazima kwo, obu olitusinguza abantu banu, nubwo tulihwerekereza embuga zaabo.”

³MUKAMA yahurra eki baagambire, baasingura Abakanaani, kandi baahwerekereza embuga zaabo; nikyo ekiikaro eki kyayetiirwe Horuma (amakuru gaalyo kuhwerekerra). Horuma nikiruga mu Kigambo ky'Oruhebburaayo ekirukumanyisa “kuhwerekereza”.

⁴Abaisirairi baimukya baaruga ha rusozi Hora, baakwata omuhanda ogunyakutwara ha Nyanja ey'Ebitoogo, baagenda nibeehinguliriza ensi Edomu, obu bakaba bali omu muhanda, okugumiisiriza kwabahwamu,

⁵baahyemera Ruhanga na Musa nibagamba bati: “Habwaki mwatwihire Misiri kwija kugwa hanu omwirungu? Habwokuba tiharoho byokulya kandi tiharoho maizi, tutamirwe ebyokulya binu ebitarukugasa.”

⁶Nubwo Ruhanga abantu yabasindikamu enjoka ez'obusegwe, zaabatema, abantu ba Isirairi baingi baafa.

⁷Abantu baizira Musa baagamba bati: “Tusiisire, habwokuba tuhyemiire MUKAMA na iwe twakuhyemera, omwesengereze atujune enjoka zinu.” Nubwo Musa yasabira abantu.

⁸MUKAMA yagambira Musa ati: “Heesa enjoka ey'omulinga ogihanike ha muti, buli muntu araatemwaga enjoka obu araaramiraga enjoka ey'omulinga egi, araakiraga.”

⁹Nubwo Musa yaheesa enjoka ey'omulinga, yagihanika ha muti, omuntu weena obu yatemwaga enjoka, akararamira enjoka egi yakiraga.

¹⁰Abantu ba Isirairi baimukya, baateera enkande omu kiikaro Obosi.

¹¹Kandi baimukya baaruga Obosi baateera orukande omu kiikaro Iye-abalimu omwirungu, ekiikaro ekiroleriire Mowabbu okutwara Burugaizooba.

¹²Okuruga aho, baimukya kandi baateera orukande omu kihanga ekya Zeredi,

¹³obu baarugire aho, baateera orukande ha rubaju orundi orw'orusozi Aranoni orunyakuli omwirungu orunyakweyongera okuruga ha mutaano ogw'ensi ey'Abamooli, habwokuba orusozi Aromoni nugwo omutaano gw'ensi Mowabbu, ruli hagati ya Mowabbu n'Abamooli.

¹⁴Nikyo kyahandikirwe omu kitabu ky'Amalemu ga MUKAMA nikigamba kiti: “Orubuga Wahebu orw'ekicweka ky'ensi Sufa n'ebihanga eby'Aranoni,

¹⁵entetebuko ez'ebihanga ebirrayo okuhika ha rubuga Ara, orunyakwigamiire omutaano gw'ensi Mowabbu.”

¹⁶Obu baarugire aho, bairrayo okuhika Beera; niryo iziba MUKAMA eri yagambiire Musa ati: “Sorooza hamu abantu, mbahe amaizi.”

¹⁷Nubwo Abaisirairi baazina ekizina kinu: “Iwe iziba tuhe amaizi! Boojo mulizinire ekizina

¹⁸Iziba eryalimirwe abalemi, lyahamibwa abantu ab'ekitiinisa, abalemi eri baalimisize omwigo gw'obukama, ab'ekitiinisa eri baahamize n'emiguma yabo.” Obu baarugire omwirungu, bairrayo okuhika Matana,

¹⁹obu baarugire Matana baahika Nahalyeri,

²⁰kandi obu baarugire Nahalyeri, baahika Bamosi, obu baarugire Bamosi, baahika omu kihanga ekinyakuli omu kicweka ky'ensi Mowabbu hansi y'orusozi Pisiga, h'oyemerra, hansi okarora irungu.

²¹Nubwo Abaisirairi baatuma abakwenda hali Sihoni omukama w'Abamooli, nibagamba bati:

²²“Otwikirize turabe omunsi yawe; titwakubuke ha rubaju omu misiri rundi omungonjo ez'emizaabbibbu: titwanywe maizi ag'iziba, turaakwata ikuute lyonka okuhika obu turakahingura tukaruga omunsi yawe.”

²³Baitu Sihoni ataikirize Abaisirairi kuraba omunsi ye. Yasorooza abasaija be, yaturuka yagenda omwirungu kurwanisa Abaisirairi yahika omu kiikaro Yahaza, yabarwanisa.

²⁴Abaisirairi baamwisa empirima, ensi ye baagirya okuruga Aranoni okuhika Wahebu n'okuhikira kimu h'Abamooni, habwokuba Yazeri nugwo gukaba guli mutaano gw'Abamooni.

²⁵Abaisirairi baalya embuga ezi zoona, baaziikaramu, baaikara omu rubuga orukuru Hesiboni n'omu mbuga zarwo entoito.

²⁶Habwokuba Hesiboni nurwo rukaba ruli rubuga orukuru orwa Sihoni omukama w'Abamooli, ayarwanisize omukama ow'okubanza ow'Abamowabbu, yamwihaho ensi ye yoona okuhikira kimu Aranoni.

²⁷Nikyo abazini abanyakucwererra ebigambo bagambira bati: “Mwije ha rubuga Hesiboni, turwombeke, orubuga rwa Sihoni turugarreho.

²⁸Habwokuba omurro gukamatuka omu Hesiboni, endimi zaagwo zaamekukira omu rubuga rwa Sihoni, gwahwerekereza Ara orubuga rwa Mowabbu, gwamaraho n'emitwe enyakuraihire ey'orusozi Aranoni.

²⁹Ka muraakibona inywe abantu ba Mowabbu, inywe abantu ba Kimosi ekyanyu kihoire! Aleetiire abatabani kuhambaara, kandi abahara abaleetiire kunyagwa kubatwarra omukama w'Abamooli.

³⁰Habweki oruzaaro rwe ruhoireho okuruga Hesiboni okugarukira Diboni, ensi tukagihwerekereza, okuhika omurro obu gwayeyanjaire gwahika Medeba.”

³¹Abaisirairi nukwo baikaire bati omunsi y'Abamooli.

³²Musa yatuma abantu kutata orubuga Yazeri; embuga zarwo entoito baazihamba, baabingamu Abamooli abakaba bazirumu.

³³Hanyuma baahinduka baakwata omuhanda ogurukutwara Basani. Ogi omukama wa Basani yaturuka kubarwanisa, uwe n'abantu be boona baatandika kurwanira omu kiikaro Edereyi.

³⁴MUKAMA yagambira Musa ati: “Otamutiina, ninyija kumukusinguza n'abantu be boona kandi osingule ensi ye; noija kumukora nkooku wakozire Sihoni omukama w'Abamooli, ayaikaraga Hesiboni.”

³⁵Nubwo baamwita n'abatabani, n'abantu be boona okuhika omunsi obu hatarasigaireho n'omu ali mwomeezi, ensi ye baagirya.