Read Runyoro - rutooro Kubar 22 Bible Online

Kubar 22 - Runyoro - rutooro bible

Kubar 22

¹Nubwo abantu ba Isirairi baimukya, baagenda, baateera orukande omu kyeya kya Mowabbu, omu kiikaro Yeriko, nseeri ya Yorudaani.

²Baraki mutabani wa Zipora, aketegereza byona Isirairi ebi yakozire Abamooli.

³Mowabbu nukwo kutiina muno Abaisirairi, abantu abo habwokuba bakaba bali baingi.

⁴Yagambira abakuru ba Abamidyani ati: “Abantu banu abaingi bati, nibaija kusiisira kimu ebintu byona ebituheriire, nkooku ente zisiisa obunyansi obw'omu kisaka.” Nubwo Baraki mutabani wa Zipora, ow'akaba ali mukama wa Mowabbu omukasumi ako,

⁵yatuma abakwenda hali Baramu mutabani wa Behora, ow'akaba ali Pesora, haihi n'ekisaru Efuraate omunsi y'Abaamahu, bamwete, bamugambire bati: “Haizire abantu barugire Misiri, baingi muno, banyaakire ensi yoona, bandi haihi muno.

⁶Otabandaara, oije obankyenere; habwokuba baingi muno bampinguraine; rundi obu, nubwo ndaasobora kubasingura, mbabinge baruge omunsi yange; habwokuba mmanyire, weena ou osabira omugisa, aheebwa omugisa, kandi weena ou okyeena, omukyeeno gumukwata.”

⁷Nubwo, abakuru ba Mowabbu n'abakuru ba Midyani baagenda, baatwara omukimba ogw'okubaragurra, baahikaho Baramu, baamugambira Baraki ebi yabatumire.

⁸Baramu yagambira abakwenda abo ati: “Kiro kinu, muraale hanu, ndaija mbagambire MUKAMA eki araaba angambiire;” Nubwo abalemi ba Mowabbu baaraara omba Baramu.

⁹Ruhanga yaija yakaguza Baramu ati: “Abasaija abanyakuli owawe nibaha?”

¹⁰Baramu yagarukamu Ruhanga ati: “Baraki mutabani wa Zipora omukama wa Mowabbu, nuwe abatumire hali nyowe naagamba ati:

¹¹‘Haizire abantu barugire Misiri, banyaakire ensi yoona; otabandaara oije obankyenere; rundi obu nubwo ndaasobora kubarwanisa, mbabinge omunsi yange.’ ”

¹²Ruhanga yagarukamu Baramu ati: “Abakwenda abo otagenda nabo, otagyayo, abantu ababarukukwetera kukyeena, otabakyeena, habwokuba bakaheebwa omugisa.”

¹³Nubwo Baramu yaimuka nyenkya kara, yagambira abakwenda ba Baraki ati: “Mwegarukire owanyu habwokuba MUKAMA antangire kugenda na inywe.”

¹⁴Abalemi ba Mowabbu nukwo kukwata omuhanda, bakagaruka hali Baraki, baamugambira bati: “Baramu ayangire kwija.”

¹⁵Baramu yayongera yatuma ababiito abakwenda abaingi kandi ab'ekitiinisa okukira ab'okubanza.

¹⁶Baahikaho Baramu bamugambira bati: “Oleke kwanga kwija owange;

¹⁷ninyija kukutamu ekitiinisa kingi, kandi kyona eki oraandagira ndaakikukorra; nkwesengeriize, ija onkyenere abantu banu.”

¹⁸Baitu Baramu yagarukamu abaheereza ba Baraki ati: “Baraki noobu akumpa efeeza n'ezaabbu yoona enyakuli omunju ye, tinsobora kucwa kiragiro kya MUKAMA Ruhanga wange, omu kintu ekitoito rundi ekikooto.

¹⁹Mbeesengeriize, hati na inywe muraale hanu, ngaruke mmanye MUKAMA eki arangamba.”

²⁰Omu bwire bw'ekiro, Ruhanga yaija hali Baramu yamugambira ati: “Abantu banu obu baraaba bakutabaliire, imuka ogende nabo; baitu eki ndaakuragira nikyo okole.”

²¹Kandi Baramu yazinduka nyenkya, yatandiiika enkaina ye, yagenda n'abalemi ba Mowabbu.

²²Baitu Ruhanga yakwatwa ekiniga, habwa Baramu kugenda; obu akaba atembere enkaina ye naagenda, asendekereziibwe abahereeza be babiri, malaika wa MUKAMA yayemerra omu muhanda kumutanga.

²³Enkaina yarora malaika wa MUKAMA ayemeriire omu ruguudo akwasire empirima; yaruga omu ruguudo yatoma omu kisaka; Baramu yagiteera agigarre omu ruguudo.

²⁴Nubwo malaika wa MUKAMA yayemeriire omu kahanda akanyakufunzire, akakaba kali hagati y'engonjo ez'emizaabbibbu ezinyakuzitiirwe ha mbaju zombi.

²⁵Enkaina obu yaboine malaika wa MUKAMA, yayekuusa ekisiika, ekigere kya Baramu yakimigirizaaho: Baramu nukwo kugaruka kugiteera.

²⁶Nubwo malaika wa MUKAMA yagenda omumaiso, yayemerra omu kiikaro ekifunzire nambere omuntu akaba atarukusobora kwehindurra ha mukono ogw'obulyo rundi ogw'emoso.

²⁷Enkaina obu yaboine malaika wa MUKAMA yagwa hansi, na Baramu agiroho; Baramu ekiniga kyayenda kumuhuulikya yagiteera n'omwigo gwe.

²⁸Nubwo MUKAMA yayesamya akanwa k'enkaina, yakaguza Baramu eti: “Nkukozire ki, eki onteeriire emirundi esatu enu?”

²⁹Baramu yagarukamu ati: “Habwokuba nonkorra ebintu eby'obudoma. Haa! Kakuba mbaire nyina empirima, nakubaire nkwisire ira.”

³⁰Enkaina yagarukamu Baramu eti: “Tininyowe ndogoya yawe ei otaaha nootemba obwomeezi bwawe bwona nokuhika kiro kinu? Okuruga ira lyona, ndakukozire nti?” Baramu yagarukamu ati: “Nangwa.”

³¹Nubwo MUKAMA yaigura Baramu amaiso, yarora malaika ayemeriire omu muhanda, akwasire empirima; yainama, yajuumara hansi.

³²Malaika yakaguza Baramu ati: “Kiki ekikutiize kasatu enkaina yawe? Ninyowe nyizire kukutanga, habwokuba omuhanda orukugendamu, nigukutwara omu bubi,

³³enkaina endozire yanyehugura kasatu. Kakuba etanyehugwiire, iwe naakubaire nkwisire, baitu yo ngireka.”

³⁴Nubwo Baramu yagambira malaika wa MUKAMA ati: “Nkozire kubi, habwokuba mbaire ntamanyire nkooku ali iwe anyakwemeriire omu muhanda kuntanga. Baitu omuhanda ndukugendamu, obu guraaba nigukubiihiza, ka nkubuutuke.”

³⁵Malaika wa MUKAMA yagambira Baramu ati “Genda n'abasaija abo; baitu ekigambo eki ndaakwikiriza kyonka nikyo ogambe.” Baramu nukwo kwongera orugendo rwe, ali hamu n'ababiito ba Baraki.

³⁶Baraki obu yahuliire Baramu nkooku aizire, yagenda kumutangirra omu Aranoni rubuga Ara, orubuga oruli ha kisaaru ha mutaano gwa Mowabbu.

³⁷Baraki yakaguza Baramu ati: “Ntakutumeho ninkweta? Kiki ekyakutangire kumpikaho?”

³⁸Baramu yagarukamu Baraki ati: “Kandi, kankuhikireho, hati nkugambire kyona eki ndukwenda? Ekigambo MUKAMA eki araanyikiriza kubaza, nikyo ndaabaza.”

³⁹Nubwo Baramu yagenda na Baraki, baahika Kiryasi-huzosi.

⁴⁰Baraki yatamba enimi n'entaama, yatambura Baramu n'ababiito abakaba bali na uwe.

⁴¹Nyenkya obu bwakiire, Baraki yatwara Baramu omu biikaro eby'ekitiinisa ebya Bamosi-Bbaali; oku nuho yaroliire abantu abakaba bali haihi muno.