Read Runyoro - rutooro Kubar 23 Bible Online

Kubar 23 - Runyoro - rutooro bible

Kubar 23

¹Baramu yagambira Baraki ati: “Nyombekera hanu amatambiro musanju, ondeetere enimi musanju n'empaya z'entaama musanju.”

²Baraki yakora nkooku Baramu yamuragiire; Baraki na Baramu, ha buliitambiro baahongeraho enimi emu n'empaya emu.

³Baramu yagambira Baraki ati: “Yemerra haihi n'ekihongwa kyawe, nyowe ka ngende; MUKAMA asobora kwija kuntaangaana; kyona eki arandagira ndaakikugambira.” Yagenda ahonaaho.

⁴Ruhanga yaitirana Baramu; Baramu yagambira Ruhanga ati: “Nyombekere amatambiro musanju, ha buli itambiro nahongeraho enimi emu n'empaya y'entaama emu.”

⁵MUKAMA yagambira Baramu ekigambo, kandi yamuragira ati: “Ogarukeyo hali Baraki, omugambire eki nkugambiire.”

⁶Baramu yagaruka hali Baraki, yamusanga ayemeriire haihi n'ekihongwa kye, ali hamu n'abalemi aba Mowabbu boona.

⁷Baramu yatandika orubazo rwe ati: “Baraki omukama owa Mowabbu anyihire Aramu omu nsozi eza Burugaizooba ‘yandeeta’: ‘Ija onkyenere Yakobbo, ija osimuze Isirairi!’

⁸Nsobora nta kukyena Ruhanga ou atarakyeenere? Nsobora nta kukondereza MUKAMA ou atarakonderiize?

⁹Habwokuba nimmurora nyemeriire ha mutwe gw'ensozi, mmutaireho eriiso ndi omubusozi, eri ihanga mali erirukwikara lyonka, eritarukwebarra omu mahanga agandi!

¹⁰Nooha asobora kubara ihe lya Yakobbo Nooha asobora kumanya omuhendo ogw'ekitebe kya Isirairi? Nyikiriza nfe nk'abantu abarungi oku bafa, empero yange esisane n'eye!”

¹¹Baraki yakaguza Baramu ati: “Kandi obu, onkoliire biha binu? Eki nakuleetiire nukwo kukyeena abanyanzigwa bange, baitu tobakyenere, kandi obasabiire omugisa.”

¹²Baramu yamukaguza ati: “Tikimpikiriire kugamba ebigambo MUKAMA ebi andagira?”

¹³Baraki yagarukamu Baramu ati: “Ija tugende handi, nambere oraayema kubarora; noija kurora abanyakuli haihi muno; abo nabo, toobarole boona; oku nuho oyeme, obankyeenere.”

¹⁴Yamutwara omubwerre bw'irungu lya Zofimu, ha mutwe gw'orusozi Piisiga, yayombekayo amatambiro musanju, ha buli itambiro, yahongeraho enimi n'empaya y'entaama.

¹⁵Baramu yagambira Baraki ati: “Yemerra haihi n'ekihongwa kyawe, nyowe ka mbanze ngende nseeri hali ndole MUKAMA.”

¹⁶MUKAMA yarora Baramu kandi yamugambira ekigambo eki araagamba, yamuragira ati: “Garuka hali Baraki omugambire nkooku nkugambiire.”

¹⁷Baramu yahikaho Baraki, yamusanga ayemeriire haihi n'ekihongwa kye, ali hamu n'abalimi aba Mowabbu. Baraki yakaguza Baramu ati: “MUKAMA agambire ki?”

¹⁸Baramu yatandika orubazo rwe ati: “Imuka iwe Baraki, hurra, ntegera okutu, iwe mutabani wa Zipora.

¹⁹Ruhanga taba muntu ngu asobora kubiiha ebisuba kandi tali mwana w'omuntu ngu araahinduka. Eki yagambire taakikole? Rundi eki yabalize taakihikirize?

²⁰Akandagira kusaba omugisa omugisa ogu ahaire tinsobora kugutanga.”

²¹“Yakobbo tamuzoiremu bubi, Isirairi tamusangiremu itima. MUKAMA Ruhanga wabu ali nabo, kandi nuwe yabakomere.

²²Ruhanga nuwe yabaihire omunsi Misiri; anyakwina amaani k'embogo.

²³Habwokuba Yakobbo taroga, kandi Isirairi taraguza; hati akasumi kahikire okubaza ha birungi, MUKAMA ebi yakoliire Yakobbo na Isirairi.

²⁴Murole ihanga erirukwimuka nk'ebuguma y'entale, kandi erirukwehimba nk'enimi y'entale; tebyama etakataagwire ekisoro kandi etakanywire esagama y'ekintu ekiisire.”

²⁵Baraki yagambira Baramu ati: “Hati nu, otakyeena kandi otaha omugisa.”

²⁶Baramu yagarukamu Baraki ati: “Tinkugambiirege? Kyona MUKAMA eki agamba, eki nikyo nkora.”

²⁷Baraki yagamba Baramu ati: “Hati ka nkutwale omu kiikaro ekindi rundi ekikiraasemeza Ruhanga, nukwo akwikirize kubankyenera nooyema omu kiikaro eki.”

²⁸Nubwo Baraki yatwara Baramu ha mutwe gw'orusozi Pehora orunyakuroleriire irungu.

²⁹Baramu yagambira Baraki ati: “Nyombekera hanu amatambiro musanju, ondeetere enimi musanju, n'empaya z'entaama musanju.”

³⁰Baraki yakora nkooku Baramu yamuragiire, ha buli itambiro yahongeraho enimi n'empaya y'entaama.