Read Runyoro - rutooro Kubar 24 Bible Online

Kubar 24 - Runyoro - rutooro bible

Kubar 24

¹Baramu obu yarozire nkooku kisemeriize MUKAMA okusabira Isirairi omugisa, atagende kuraguza nkooku yakoraga obundi, baitu amaiso akagahanga irungu.

²Yaimukya amaiso, yarora Abaisirairi nibateera enkande, buli ruganda owarwo rwonka. Mwoyo wa MUKAMA yamwijaho,

³nukwo kugamba ati: “Binu nibyo bigambo bya Baramu mutabani wa Behora,

⁴nibyo bigambo omuntu anyakuhurra Ruhanga ebi agamba, anyakuba agwire hansi akarora Omusobozi wa byona ebi ayoleka akaikara ateesweekere amaiso.

⁵Haa! Yakobbo, Eheema zawe ka ikasemera, Iwe Isirairi, ensiisira zawe ka nungi!

⁶Nizisisana nk'emisiri enyakuli haihi n'ekisaaru, nizisisana nk'enkakarutanga MUKAMA ezi yabyaire, nizisisana emiti emikogoto enyakuli haihi n'amaizi.

⁷Oburobo bwe buraarugwamuga amaizi ensigo ze ziraabaga omu maizi amaingi, mukama we aliba w'ekitiinisa okukira Agagi, obukama bwe bulinyumizibwa.

⁸MUKAMA anyakwina amaani nk'ag'enimi y'embogo, nuwe yamwihire omunsi Misiri, alihwerekereza amahanga aganyakumurwanisa, abahendahende amagufa, abarase emyambi.

⁹Akabundaara yabyamira kimu hansi nk'enimi y'entale, yabyamira kimu nk'ebuguma y'entale, kandi n'oha alimurwanisa?”

¹⁰Baraki yabiihirirwa muno Baramu yateera omu ngaro; yamugambira ati: “Eki nakwetiire nukwo kukyena abanyanzigwa bange, kandi iwe omu kiikaro ky'okubakyeena, wakabasabira omugisa kasatu koona.

¹¹Habweki nu, hati garuka owanyu. Nkagamba nti: ‘Ndaakutamuga ekitiinisa, baitu MUKAMA, ekitiinisa eki, akikwimire.’ ”

¹²Baramu yagarukamu Baraki ati: “Abakwenda bawe aba wantumireho, ntabagambire nti:

¹³‘Baraki noobu akumpa enju ye, hamu n'efeeza n'ezaabbu yoona ebinyakwijwiremu nabwo tinsobora kucwa ekigambo kya Ruhanga, nkakora ekirungi rundi ekibi nkooku ndukwegondeza nyenka?’ MUKAMA eki arukugamba, nanyowe nikyo ndukugamba.

¹⁴Hati nu, kangaruke owaitu; ija nkugambire abantu banu eki balikorra abantu bawe omu biro eby'omumaiso.”

¹⁵Yagamba ati: Binu nibyo ebigambo bya Baramu mutabani wa Behora, nibyo bigambo by'omuntu anyakwigukire amaiso,

¹⁶nibyo ebigambo by'ogu anyakuhurra ebigambo bya Ruhanga anyakwetegereza amagezi googu anyakuli haiguru Muno, anyakuba agwire hansi akarora Omusobozi wa byona ebi ayoleka akaikara ateesweekere maiso.

¹⁷Omuntu ogu mmurora, baitu tindukumurora hati bunubunu; mmutunurra, baitu atandi haihi; enyunyuuzi eriruga omu ruganda rwa Yakobbo, kandi omwigo gw'obukama guliruga omu ruganda rwa Isirairi, gubberengule obuso bw'Abamowabbu, gwatangule batabani ba Seesi boona.

¹⁸Orubuga Edomu rulisahurwa Seyiri nayo ey'abazigu be esahurwe, Isirairi obu aliba naakora eby'obumanzi.

¹⁹Oruganda rwa Yakobbo nurwo rulirema, embuga ezikaba zisigaireho ihwerekerezibwe.

²⁰Hanyuma yarolerra Amaleki yagamba ati: “Amaleki, niryo likaba liri ihanga ery'okubanza, baitu hanyuma lirihwerekerezibwa.”

²¹Kandi yarolerra Omukaini yagamba ati: “Ekiikaro kyawe eki orumu kigumire, kandi ekiju kyawe kikombekwa omu mwandara;

²²baitu nabwo Omukaini alihwerekerezibwa. Asura, omu bunyagwa, alikumazaamu mwanya ki?”

²³Yagamba ati: “Ha, n'oha alibaho, Ruhanga obu aliba naakora eki?

²⁴Emeeri ziriruga Kitimu, ziije zibonabonese Asura n'Eberi; kandi na uwe alihwerekerra.”

²⁵Nubwo, Baramu yaimuka yagaruka owaabu, Baraki na uwe, yatoma ogw'owabu.