Read Runyoro - rutooro Kubar 27 Bible Online

Kubar 27 - Runyoro - rutooro bible

Kubar 27

¹Nubwo bahara ba Zerofehaadi mutabani wa Hefa, mutabani wa Makiri, mutabani wa Manaase, ayarugire omu kitabu kya Manaase mutabani wa Yosefu bairiire haihi. Ganu nugo mabara ga bahara be: Mahabaha, Noha, Hogura, Mirika na Tiriza.

²Baayemerra omumaiso ga Musa na Eryeza nyakatagara n'omumaiso g'abeebembezi n'ekitebe kyona, ha mulyango ogw'Eheema ey'okutangatanganiramu baagamba bati:

³“Isiitwe akagwa omwirungu, akaba atali omu hali abo ab'omu kitebe kya Koora abaayekobere kwemera MUKAMA, baitu akaitwa ekibi kye wenka; kandi atasige mwana w'obwojo.

⁴Isiitwe ogu asemeriire kuhwerekererra kimu mu bantu ab'ekitebe kye habw'okutasiga mwana w'obwojo? Mutuhe obwikaro omu bantu ab'oruganda rwe.”

⁵Ebigambo byabo, Musa yabihikya hali MUKAMA.

⁶MUKAMA yamugarukamu ati:

⁷“Bahara ba Zerofehaadi nibagamba ekihikire; obahe ebintu eby'obugwetwa omu bantu ab'oruganda rwa ise bo, nabo obahikyeho obugwetwa bwa ise bo.

⁸Kandi ogambire Abaisirairi ngu: ‘Kakuba omusaija afa atakazaire mwana w'obwojo, ebintu bye bitwarwege muhara we.

⁹Kandi kakuba aba atasigire noobwakubaire mwana w'obwisiki, ebintu bye bitwarwege abaanyina.

¹⁰Kandi obu araabaga atanyina abaanyina, obu ebintu bye bitwarwege baisento.

¹¹Kandi ise obu araabaga ataina wanyina, ebintu bye bitwarwege ow'oruganda rwe, ow'ekitabu kye; ogu nuwe agweterwe ebintu bye. Eki kibege kiragiro eki baraahikirizaaga nkooku MUKAMA yaragiire Musa.’ ”

¹²MUKAMA yagambira Musa ati: “Temba orusozi Abarimu oru, orole ensi ei ndukwija kuha Abaisirairi.

¹³Obu oraamara kugirora, na iwe noija kufa, Arooni owanyoko nkooku yafiire,

¹⁴habwokuba ekitebe obu kyantiize empaka omwirungu lya Ziini, obu nabaragiire kwoleka omumaiso gaabo nkooku nyina obusobozi, obw'okubatungira amaizi inywembi mukagaya ekiragiro kyange.” Amaizi aga ndukugamba, nugo aga Meriba eya Kadesi, omwirungu erya Ziini.

¹⁵Musa yagambira MUKAMA ati:

¹⁶“MUKAMA Ruhanga iwe anyakulema emitima y'abantu boona, okome omuntu araayebembera ekitebe kinu.

¹⁷Araabeebemberaga kandi araabagarraga omuka; ekitebe kya MUKAMA kireke kuba nk'entaama ezitanyina muliisa.”

¹⁸MUKAMA yagambira Musa ati: “Kwata Yoswa mutabani wa Nuuni, omusaija anyakwina omwoyo, omuteho omukono gwawe;

¹⁹omwemereze omumaiso ga Eryeza nyakatagara n'ekitebe kyona, omuhe ebiragiro abantu boona nibarora.

²⁰Omuhe ha busobozi bwawe, nukwo Abaisirairi boona bamuhurre.

²¹Araayemerraga omumaiso ga Eryeza nyakatagara, ogu nuwe ow'araamukagulizaaga hali MUKAMA kandi akamucweramu naakonyerwa akabaale Ulimu; obu araaragiraga abantu, baturuke kandi bagendege, kandi obu aragarukaga akaragira, bataahe baije hamu, uwe n'ekitebe kyona.”

²²Musa yakora MUKAMA nkooku yamuragiire; yakwata Yoswa yamwemereza omu maiso ga Eryeza nyakatagara n'ekitebe kyona,

²³yamutaho emikono, yamukwasa omulimo MUKAMA nkooku yamuragiire.