Read Runyoro - rutooro Kubar 28 Bible Online

Kubar 28 - Runyoro - rutooro bible

Kubar 28

¹MUKAMA akagambira Musa ati:

²“Ragira abantu ba Isirairi obagambire ngu: ‘Ekihongwa kyange, ebyokulya byange eby'ebihongwa eby'okwokya ebirugwamu ekisorrokoko ekinyakunsemereza, mutehoga omutima kubimpongera omu kasumi kaabyo akanyakusemeriire.’

³Kandi obagambire ngu: Kinu nikyo kihongwa eky'okwokya eki muraahongeraga MUKAMA: Ebyana by'entaama ebihaya bibiri eby'omwaka gumu, ebitaina kamogo, ebi mubihongege buli kiro, kibe kihongwa eky'oruteekerro.

⁴Ekyana ky'entaama ekimu, mukihongege nyenkya, ekindi mukihongege orwebagyo.

⁵Kandi muhongege kiloguraamu emu ey'ensaano enyakutabwire na kiloguraamu emu ey'amagita aganyakuhonzirwe, kibe kihongwa eky'ebyokulya.

⁶Eki nikyo kihongwa eky'okwokya eky'oruteekerro, ekyaragiirwe ha rusozi Sinai, kirugwemu ekisorrokoko ekirukuboya, nikyo kihongwa eky'okwokya eky'okuhongera MUKAMA.

⁷Ekihongwa kyakyo eky'ekyokunywa, kibege lita emu erukugenda hamu na buli kyana ky'entaama; omukiikaro ekirukwera, nuho museesege ekihongwa eky'ekyokunywa eky'amaani eky'okuhongera MUKAMA.

⁸Ekyana ky'entaama ekindi, mukihongege orwebagyo; nkooku muhongerege nyenkya ekihongwa eky'ebyokulya, hamu n'ekihongwa kyakyo eky'ekyokunywa, kibe kihongwa eky'okwokya, ekirukurugwamu ekisorrokoko ekirukuboyera MUKAMA.”

⁹“Ha kiro ekya Sabbato, muhongege ebyana by'entaama ebihaya bibiri eby'omwaka gumu, ebitaina kamogo, na kiloguraamu ibiri ez'ensaano enyakuniinuukire kurungi, enyakutabwire n'amagita, kibe kihongwa eky'ebyokulya hamu n'ekihongwa kyakyo eky'ekyokunywa:

¹⁰eki nikyo kiraabaga kihongwa eky'okwokya ekiraahongwaga buli Sabbato, otabaliireho ekihongwa eky'okwokya ekya butoosa, hamu n'ekihongwa kyakyo eky'okunywa.”

¹¹“Ameezi ganyu obu garaabaga nigaboneka, muhongerege MUKAMA ekihongwa eky'okwokya: ekihongwa eki, nizo enimi ento ibiri, entaama empaya emu, ebyana by'entaama ebihaya musanju ebitaina kamogo;

¹²na kiloguraamu isatu ez'ensaano enyakuniinuukire kurungi, etabwire n'amagita, erukuhongwa hamu na buli nimi, na kiloguraamu ibiri z'ensaano enyakuniinuukire kurungi, etabwire n'amagita, erukuhongwa hamu n'empaya y'entaama kibe kihongwa eky'ebyokulya;

¹³Kiloguraamu emu ey'ensaano enyakuniinuukire kurungi, etabwirwe n'amagita, erukuhongwa hamu na buli kyana ky'entama, kibe kihongwa eky'ebyokulya; kibe kihongwa eky'okwokya ekirukurugwamu ekisorrokoko ekirukuboya, ekihongwa eky'okwokeza MUKAMA.

¹⁴Ebihongwa eby'ebyokunywa, bibege lita ibiri ezirukuhongwa hamu n'enimi, lita emu n'ekicweka ezirukuhongwa hamu n'empaya y'entaama, na lita emu ezirukuhongwa hamu n'ekyana ky'entaama; eki nikyo kibege kihongwa eky'okwokya ekya buli kwezi, okumara omwaka gwona.

¹⁵Kandi muhongerege MUKAMA empaya y'emburabuzi ebe kihongwa eky'okuganyiza ebibi; eki kyongerwege ha kihongwa eky'okwokya ekya butoosa, na ha kihongwa kyakyo eky'ekyokunywa.”

¹⁶“Ekiro ekya ikumi na bbina eky'okwezi okw'okubanza, kiraabaga ky'okwijuka okuhingurwaho kwa MUKAMA.

¹⁷Kandi ekiro ekya ikumi na bitaano eky'okwezi oku, kiraabaga kiro eky'obugenyi, mumale ebiro musanju nimulya omugaati ogutarumu kitumbisa.

¹⁸Ha kiro eky'okubanza, mwesoroozeege muramye: mutalikora omulimo ogw'amaani,

¹⁹baitu muhongere MUKAMA ekihongwa eky'okwokya: ekihongwa eki, nizo enimi ento ibiri, empaya y'entaama emu, n'ebyana by'entaama musanju eby'omwaka gumu; mutalikisura mukahonga ebinyakwina akamogo;

²⁰kandi muhonge n'ebihongwa byabyo eby'ebyokulya eby'ensaano enyakuniinuukire kurungi, etabwirwe n'amagita; kiloguraamu isatu, mubihonge hamu n'enimi, kiloguraamu ibiri muzihonge hamu n'empaya y'entaama;

²¹na kiloguraamu emu, mugihonge hamu na buli kimu, ha byana by'entaama omusanju;

²²kandi muhonge empaya y'emburabuzi ey'ekihongwa eky'okuganyiza ebibi, nukwo mwereherre.

²³Ebi mubihonge, mubyongere ha kihongwa eky'okwokya ekya nyenkya, ekya butoosa.

²⁴Omu mulingo nugwo gumu, muhongere MUKAMA ebyokulya eby'ekihongwa eky'okwokya okumara ebiro musanju, ekihongwa ekirukurugwamu ekisorrokoko ekirukuboyera MUKAMA; eki mukyongere ha kihongwa eky'okwokya ekya butoosa, na ha kihongwa kyakyo eky'okunywa.

²⁵Ha kiro ekya musanju, musorrokanege muramye; mutalikora omulimo ogw'amaani.”

²⁶Ha kiro eky'okubanza eky'obugenyi bw'amagesa, obu muraabaga nimuhongera MUKAMA ekihongwa eky'ebyokulya ebya magesa musorrokanege muramye; mutalikora omulimo ogw'amaani.

²⁷Baitu muhongere MUKAMA ekihongwa eky'okwokya, ekirukurugwamu ekisorrokoko ekirukumuboyera: nizo enimi ento ibiri, entaama empaya emu, ebyana by'entaama musanju eby'omwaka gumu:

²⁸kandi n'ekihongwa kyabyo eky'ebyokulya eby'ensaano enyakuniinuukire kurungi, etabwire n'amagita agarukuhikya kiloguraamu isatu, ezirukuhongwa hamu na buli nimi, na kiloguraamu isatu ezirukuhongwa hamu n'empaya y'entaama,

²⁹na kiloguraamu emu, erukuhongwa hamu na buli kimu, ha byana by'entaama omusanju;

³⁰hamu n'empaya y'emburabuzi ey'okwereherra.

³¹Ebi mubyongere ha kihongwa eky'okwokya ekya butoosa, na ha kihongwa kyakyo eky'ebyokulya, mubihonge n'ekihongwa kyabyo eky'ekyokunywa. Mutalikisura, mukahonga ebinyakwina akamogo.