Read Runyoro - rutooro Kubar 3 Bible Online

Kubar 3 - Runyoro - rutooro bible

Kubar 3

¹Banu nubo baana ba Musa na Arooni, omu kasumi MUKAMA aka yabaliizeemu na Musa ha rusozi Sinai.

²Ganu nugo mabara ga batabani ba Arooni: Nadabu nuwe omuzigaijo, hakurataho Abihu, Eryeza na Itamara;

³abo nubo batabani ba Arooni; banyakatagara abaaseesirweho amagita, aba yasoroire bakole omulimo ogw'obunyakatagara;

⁴baitu Nadabu n'Abihu bakafeera omumaiso ga MUKAMA omwirungu lya Sinai habw'okuhereza omurro oguteeziibwe; bakaba bataina baana. Habweki, Eryeza na Itamara bakaba bali banyakatagara ise bo Arooni akyali mwomeezi.

⁵MUKAMA akagambira Musa ati:

⁶“Iriza haihi oruganda rwa Leevi, obate omumaiso ga Arooni nyakatagara, nukwo bamuheereze.

⁷Bamukorre emirimo, kandi bagikorre ekitebe kyona omumaiso ag'Eheema ey'okutangatanganiramu, nkooku baheereza omu Heema ey'endagaano;

⁸barolerre ebikwato byona eby'Eheema ey'okutangatanganiramu, obu baraabaga nibaheereza omunju ya Ruhanga, bateho omutima okukora emirimo ey'abantu ba Isirairi.

⁹Abaleevi obakwase Arooni n'abatabani, bamuheerirwe kimu okuruga omu bantu ba Isirairi.

¹⁰Okome Arooni n'abatabani bakole omulimo gwabo ogw'obunyakatagara, baitu omuntu ondi kakuba airra haihi n'itambiro ogu aitwege.”

¹¹MUKAMA yamugambira ati:

¹²“Hati Abaleevi mbaihire omu bantu ba Isirairi, bagaruke omu kiikaro ekya buli muzigaijo omu bantu ba Isirairi. Abaleevi bantu bange.

¹³Habwokuba emizigaijo yoona, yange; hakiro eki naitiireho emizigaijo yoona omunsi Misiri, nkeesororra emizigaijo yoona ey'omu Isirairi, babe bange, emizigaijo ey'ebisoro n'ey'abantu, ikale eri yange. Ninyowe MUKAMA.”

¹⁴MUKAMA akagambira Musa omwirungu lya Sinai ati: “Bara batabani ba Leevi, omu bitabu bya baisenkurubo kandi buli ka y'omuntu;

¹⁵obale omwana omwojo weena anyakuhikize okwezi kumu n'okweyongerayo.”

¹⁶Musa yababara nkooku MUKAMA yagambire.

¹⁷Ganu nugo gakaba gali mabara g'abaana ba Leevi: Geresooni, Kohati na Merali.

¹⁸Ganu nugo mabara ga batabani ba Geresooni omu maka gaabo: Libini na Semei.

¹⁹Ganu nugo mabara ga batabani ba Kohati omu bika byabo: Amiramu, Izari, Hebruni na Uziyeri.

²⁰Ganu nugo mabara ga batabani ba Merali omu bika byabo: Mahiri na Musi, ebi nibyo bika eby'Abaleevi omu bitabu bya baisenkurubo.

²¹Ekika ky'Abalibini n'ekika ky'Abasimei, ebika ebi bikaba biri by'aba Geresooni.

²²Okusigikira obu baabazire okwihirra ha kubara abaana boona ab'omwezi gumu n'okweyongerayo haiguru, omuhendo gwabo gukahika kasanju n'ebitaano.

²³Ekika kya Geresooni kyateeraga orukande enyuma ey'Eheema ey'endagaano ha bukiizi obwa Burugaizooba.

²⁴Eriasafu mutabani wa Lairi nuwe akaba ali mukuru w'ekika ky'aba Geresooni.

²⁵Omulimo Abageresooni ogu baakoraga omu Eheema ey'okutangatanganiramu gwabaga gw'okurolerra Eheema enyakurumu Esanduuko y'Endagaano, Eheema yonka n'ekisweeko kyayo, orutimbe orw'okukinga omulyango ogw'Eheema ey'okutangatanganiramu,

²⁶engoye ez'okutimba omu zigati, orutimbe orw'okukinga irembo ly'ezigati enyakwehinguliriize enju ya Ruhanga n'itambiro, obuhuuzo obw'ezigati, omulimo gwona ogurukukwata hali ebi.

²⁷Omu kika ekya Kohati, nuho haarugire ebika binu: Abaamuraamu, Abaizara, Abahebburooni naba Uziyeri. Ebi nibyo bika ebya Kohati.

²⁸Omuhendo ogw'abasaija okurugirra ha b'okwezi kumu n'okukiraho, ab'okukoraga emirimo ey'ekiikaro ekirukwera, obu baahandiikirwe, bakahika kanaana n'orukaaga.

²⁹Ebika bya batabani ba Kohati baraateeraga orukande ha rubaju orw'obulyo orw'enju ya Ruhanga.

³⁰Erizafani nuwe mukuru w'ebika bya baisenkurubo ab'ekitabu kya Kohati.

³¹Bakakwasibwa omulimo ogw'okurolerra Esanduuko ey'Endagaano, emeza, ekikondo ky'etaara, amatambiro, ebintu ebinyakukwatirwa omu Kiikaro Ekirukwera, banyakatagara ebi baheererezaamu, n'orukingyo, omulimo gwona ogurukukwataho ebintu ebi.

³²Eryeza mutabani wa Arooni nyakatagara, nuwe abe mwebembezi omukuru ow'Abaleevi, kandi muroleerezi w'abo abaakwasiibwe kurolerra Ekiikaro Ekirukwera.

³³Omu kika ekya Merali, nuho haarugire ebika binu: Abamaholi n'Abamusiti; ebi nibyo bika bya Merali.

³⁴Omuhendo ogw'abasaija okurugirra ha b'okwezi kumu n'okukiraho, bakahika kakaaga n'ebibiri.

³⁵Mukuru ow'ekika ekya baisenkurubo ab'ekitabu kya Merali, nuwe Zulyeri mutabani wa Abihairi; baraateeraga orukande ha bukiizi obw'emoso obw'enju ya Ruhanga.

³⁶Batabani ba Merali bakwasibwa okurolerra orukanga rw'enju ya Ruhanga: emigamba, enyomyo, obucuba n'ebintu ebindi ebirukukozesebwa, omulimo gwona ogurukukwatana n'ebintu ebi,

³⁷otaireho enyomyo ez'ezigati yoona kugyehinguliriza, hamu n'obucuba bwazo, enkondo zaayo n'obuguha bwayo.

³⁸Abo abaraateeraga orukande omumaiso ag'enju ya Ruhanga niyo Eheema ey'okutangatanganiramu oroleriire Bugwaizooba, nubo Musa, Arooni n'abatabani, abaakoraga emirimo omu kiikaro ekirukwera, kyona ekyayetaagwaga kukolerwa abaana ba Isirairi; omuntu weena atasemeriire ayairraga ha kiikaro, ogu yaitwaga.

³⁹Omuhendo gwona ogw'abaana b'Abaleevi abarukuhikya okwezi kumu n'okweyongerayo Musa aba yabazire omu nganda zaabo nkooku MUKAMA yaragiire, bakahika emitwaro ebiri n'enkumi ibiri.

⁴⁰MUKAMA akagambira Musa ati: “Bara emizigaijo yoona ey'aboojo ey'abantu ba Isirairi okurugirra ha b'okwezi kumu n'okweyongerayo, obale omuhendo n'amabara gaabo.

⁴¹Omu kiikaro eky'emizigaijo yoona ey'abantu ba Isirairi onyihiremu Abaleevi, omu kiikaro eky'emizigaijo yoona ey'ente ez'abantu ba Isirairi, onyihiremu ey'ez'Abaleevi.”

⁴²Nubwo Musa yabara emizigaijo yoona ey'abantu ba Isirairi, nkooku MUKAMA yamuragiire.

⁴³Emizigaijo yoona ey'abaana aboojo, okurugirra ha ab'okwezi kumu n'okweyongerayo, omuhendo gwabo n'amabara gaabo bakahika emitwaro ebiri nkumi ibiri bibiri nsanju na basatu.

⁴⁴MUKAMA akagambira Musa ati:

⁴⁵“Omu mizigaijo yoona ey'abantu aba Isirairi, onyihiremu Abaleevi, kandi omu kiikaro eky'emizigaijo ey'ente ez'abantu ba Isirairi, onyihiremu ey'ez'Abaleevi; Abaleevi babe bantu bange: Ninyowe MUKAMA.

⁴⁶Kandi habw'okucungura abaana emizigaijo bibiri nsanju na basatu abantu ba Isirairi, ei barukukiza Abaleevi,

⁴⁷ha buli mwana omwiheho ebicweeka bya feeza bitaano, nimubalirirra ha sente ezinyakuragirwa ey'Ekiikaro Ekirukwera.

⁴⁸Sente ez'omuhendo gw'abaana abakizireho, kucungurwa muzihe Arooni n'abatabani.”

⁴⁹Abo abaakizireho abaacungwirwe Abaleevi, Musa yabaihaho sente ez'okubacungura;

⁵⁰emizigaijo ey'abantu aba Isirairi, yabaihaho sente ezirukuhika bicweeka byafeeza rukumi mu bisatu nkaaga na itaano ogubaliriirwe ha sente ez'Ekiikaro Ekirukwera;

⁵¹sente ezi Musa yaziha Arooni n'abatabani, MUKAMA nkooku yagambire, kandi nkooku yamuragiire.