Read Runyoro - rutooro Kubar 30 Bible Online

Kubar 30 - Runyoro - rutooro bible

Kubar 30

¹Musa yagambira bakuru b'enganda za Isirairi ati: “Kinu nikyo MUKAMA aragiire.

²Kakuba omuntu akora ekiragaano na Ruhanga, rundi kakuba amurahira, ayebohe naataho omusimbo, atalihinduka, ahikirize byona ebi yagambire.

³Rundi kakuba omukazi akora ekiragaano na MUKAMA, akeeboha naataho omusimbo akyali omuka ya ise, kandi akyali muto,

⁴ise akahurra muhara we nkooku arukuragaana, akarora n'omusimbo ogu arukutaho kweboha, akaburwa ekigambo eki amugambiire; byona ebi yaraganiize MUKAMA n'ebi yayecweriire kimuhikiriire kubihikiriza.

⁵Baitu ise asoborra muhara we nkooku atarukusiima biragaano ebi ha kiro kyonyini eki abihuliriireho, muhara we ebi aragaine rundi ebi arahiire, biriba bitakyaina makuru, MUKAMA na uwe, omwisiki ogu alimuganyira, habwokuba ise nuwe yamutangire.

⁶Kandi kakuba aswerwa amazire kukora ebiragaano bye, rundi abalize ebigambo ebi atarateekeriize muno, yayeboha omu mulingo ogu,

⁷iba, eki akakimanya baitu akalemwa kugira eki amugambiire ha kiro eki yakimanyiireho; ebiragaano by'omukazi ogu n'ebi yarahiire ebi yayeboheseze, naasemerra kubihikiriza.

⁸Baitu iba kakuba amusoborra nkooku atarukusiima ha kiro kyonyini eki yakimanyireho, obu, ekiragaano kya mukazi we n'ebigambo ebi yabalize atabiteekeriize muno ebi yayeboheseze, buli abicekeze; MUKAMA na uwe, omukazi ogu alimuganyira.

⁹Baitu ekiragaano kyona eky'omukazi enfaakati rundi eky'omukazi ayayahukaine na iba, kyona eki yayeboheseze kirimwikaraho.

¹⁰Baitu omukazi ogu kakuba aragaana rundi arahira amazire kutaaha omunju ya iba,

¹¹eki iba akakimanya baitu atagizire eki agambireho mukazi we rundi kumutanga, obu ebi yaragaine n'ebigambo yabalize ebi yayeboheseze birimwikaraho, kirimuhikirra kubihikiriza.

¹²Baitu iba omukazi ogu, ebiragano bya mukazi we n'ebigambo byona ebi yagambire, kakuba abidibya ha kiro eki yabihuliriireho, kyona omukazi eki yaraganiize rundi eki yarahiire kiriba kihoire; iba aliba amazire kubicekya, MUKAMA na uwe aliganyira omukazi ogu.

¹³Buli kiragaano rundi endahiro yoona enyakuboha omukazi, iba nuwe anyina obusobozi obw'okugigumya rundi kugidibya.

¹⁴Baitu iba kakuba atagira eki amugambireho ha kiro ekirukukurataho, buli ebiragaano bya mukazi we yabigumya, byona ebi yaragaine n'ebigambo byona ebi yagambire, aba abigumize, habwokuba atagire eki yagambiire mukazi we ha kiro eki yabimanyiireho.

¹⁵Baitu kakuba abidibya hahingwireho akasumi kakootoho amazire kubihurra, buli yayetaho omusango ogwakubaire gwa mukazi we.”

¹⁶Binu nibyo biragiro MUKAMA ebi yaragiire Musa ebirukubazaho omusaija na mukazi we, ebirukubazaho ise omwisiki, kandi ebirukubazaaho omwisiki omuto anyakuli ha zigati ya ise.