Read Runyoro - rutooro Kubar 31 Bible Online

Kubar 31 - Runyoro - rutooro bible

Kubar 31

²“Abaamidyani, obahoole enzigu ha bw'Abaisirairi; obu oramara kukora eki, oraafa okurate abaanyu.”

³Musa yagambira abantu ati: “Mwekomere abasaija ab'okuramaga ha bulemu, mubahe eby'okurwanisa, bagende barwanise Abanyamidyani, bahoole enzigu bahorre MUKAMA enzigu.

⁴Ha bulemu otwekeyo abasaija rukumi abarukuruga omu buli ruganda rwa Isirairi.”

⁵Baakomwa okuruga omu nkumi n'enkumi eza Isirairi, buli ruganda abasaija rukumi, abasaija abanyakunyina eby'okurwanisa, baahika omutwaro gumu n'enkumi ibiri.

⁶Musa yabasindika, bagende barwane, buli ruganda haarugayo abasaija rukumi, baagenda na Fenehaasi mutabani wa Eryeza nyakatagara ayarolerraga ebikwato eby'Ekiikaro Ekirukwera, yagenda akwasire engwara ey'okuteera.

⁷Baaseesira Midyani, nkooku MUKAMA yaragiire Musa, baita abasaija boona.

⁸Omuli abo abaisirwe omu bulemu, bakaitirayo abakama abataano aba Midyani; nubo banu: Evi, Rekemu, Zuru, Hura na Reba, kandi Baramu mutabani wa Behora, bakamwisa empirima.

⁹Kandi abantu ba Isirairi baanyaga abakazi n'abaana baabo bali boomeezi, baanyaga ente zaabo zoona, amagana gaabo ag'entaama n'ag'emburabuzi, n'ebintu byabo byona.

¹⁰Baanyaga embuga zaabo ezikaba ziri omu biikaro ebi baikaramuga n'engonjo zaabo zoona,

¹¹baatwara eminyago n'emyandu, ey'abantu n'ey'ebisoro.

¹²Abanyagwa, eminyago n'emyandu, baabireetera Musa n'Eryeza nyakatagara, n'ekitebe kyona eky'abantu ba Isirairi, baabasanga omu rukande omu kiikaro Yeriko ekinyakuli omu kyeeya ekya haihi n'ekisaaru Yorudaani omu byeeya bya Mowabbu.

¹³Musa, Eryeza nyakatagara, n'abeebembezi boona ab'ekitebe, baaturuka baagenda kubatangirra aheeru y'orukande.

¹⁴Musa akaba abiihiriirwe abalemi b'ihe, abaduumizi b'enkumi n'enkumi n'abadumiizi b'ebikumi abaatabaarukire ha bulemu,

¹⁵Musa yabakaguza ati:

¹⁶“Mwijuke abantu ba Isirairi abaahondiire obucwangya bwa Baramu, obu bakaba bali Pehora, baasiisira MUKAMA, ekitebe ky'abantu ba MUKAMA kyaagwibwamu orufu kahwerekereza.

¹⁷Habweki hati, omu baana boona, mwite aboojo boona kandi mwite abakazi boona abaabyamireho n'abasaija baabamanya.

¹⁸Baitu abaisiki boona abatakabyamireho n'omusaija n'okumumanya, mubaleke babe bakazi banyu.

¹⁹Mumale ebiro musanju nimuraara aheeru y'orukande; weena ayaisireho omuntu ondi, kandi weena ayakwasireho omutumbi ogw'anyakwisirwe, mweyeze kandi mweze n'abaanyagwa banyu, ha kiro ekya kasatu na ha kya musanju.

²⁰Mwogye buli kijwaro, buli kintu kyona eky'oruhu, ekintu kyona ekyakozirwe omuruhu orw'engonge kandi buli kintu kyona ekyabaizirwe omu muti.”

²¹Kandi Eryeza nyakatagara yagambira abarwani, abaatabaire ha bulemu ati: “Kinu nikyo ekitairweho okuruga omu biragiro MUKAMA ebi yaragire Musa ngu:

²²ezaabbu, efeeza, omulinga, ekyoma, isasi n'ekikomo,

²³buli kintu ekitarukusiiswa omurro, okirabye omu murro kisemere. Oyongere kusemeza n'amaizi aganyakwihaho oburofu; kandi kyona ekirukusiiswa omurro, okirabye omu maizi.

²⁴Ha kiro ekya musanju, oyogye engoye zaawe oyezibwe, ebi bimazire kuhwa, otaahe omu rukande.”

²⁵MUKAMA yagambira Musa ati:

²⁶“Bara ebintu ebyanyagirwe, abantu abaanyagirwe n'ebisoro ebyanyagirwe, iwe hamu na Eryeza nyakatagara, na bakuru b'ebika ebya baisenkuru, enganda ez'ekitebe ky'abantu

²⁷baabaganize eminyago omu bicweka bibiri, ekimu bakihe emanzi abaatabaire ha kurwana, n'ekindi bakihe ekitebe kyona eky'abantu.

²⁸Oihe omugabo gwa MUKAMA ha mugabo ogw'abarwani abaatabaire ha bulemu, oiheho omuntu omu ha buli bantu ebikumi bitaano

²⁹nka ha nte, ha ndogoya, amagana ag'entaama n'ag'emburabuzi kimu kya kabiri ekya buli muntu, obihe Eryeza nyakatagara, kibe kihongwa kya MUKAMA.

³⁰Ha kicweka eky'abantu ba Isirairi, ogende noihaho omuntu omu omu, ha buli bantu amakumi ataano, ente emu emu, ha buli nte amakumi ataano, enkaina emu emu ha buli ndogoya amakumi ataano, ha buli ntaama rundi emburabuzi amakumi ataano, ogende noihaho emu, obihe Abaleevi abanyakurolerra enju ya MUKAMA.”

³¹Musa na Eryeza nyakatagara baakora nkooku MUKAMA yaragiire Musa.

³²Omwandu ogw'omunyago ogwasigaireho abaramagi ogu baatwaire, gukaba guli entaama emitwaro nkaaga na musanju n'enkumi itaano,

³³ente, emitwaro musanju n'enkumi ibiri,

³⁴enkaina emitwaro mukaaga n'orukumi,

³⁵abantu abaisiki empikirre bakahika emitwaro esatu n'enkumi ibiri.

³⁶Kandi kimu kya kabiri eky'omugabo gwaabo abaaramagire ha bulemu, zikaba ntaama; emitwaro asatu n'esatu, kasanju n'ebitaano.

³⁷Hali ezo entaama rukaaga nsanju na itaano gukaba mugabo gwa Mukama.

³⁸Ente, zikaba ziri emitwaro esatu n'akakaaga, hali ezo omusoro gwa MUKAMA gwali nsanju na ibiri.

³⁹Enkaina zikaba ziri emitwaro esatu n'ebitaano, hali ezo, omusoro gwa MUKAMA zikaba nkaaga n'emu.

⁴⁰Abantu bakaba bali omutwaro gumu n'akakaaga, hali abo, omusoro gwa MUKAMA, bakaba bali abantu asatu na babiri.

⁴¹Omugabo ogu ogw'okuhongera MUKAMA, Musa yaguha Eryeza nyakatagara, nkooku MUKAMA yamuragiire.

⁴²Ha mugabo ogwa basaija abaramagire ha bulemu, Musa akabaganizaho kimu kyakabiri kyagwo gube mugabo gw'abantu ba Isirairi.

⁴³Omugabo gw'abantu zikaba ziri entaama emitwaro asatu n'esatu kasanju n'ebitaano,

⁴⁴ente, emitwaro esatu n'akakaaga,

⁴⁵enkaina emitwaro esatu n'ebikumi bitaano,

⁴⁶kandi empikirre omutwaro gumu n'akakaaga.

⁴⁷Ha kimu kya kabiri eky'omugabo ogw'abantu aba Isirairi, Musa yaihahoga ekintu kimu ha buli makumi ataano, eki akakikora ha bantu na ha bisoro, ebi yabiha Abaleevi abaarolerraga enju ya MUKAMA; nkooku MUKAMA yaragiire Musa.

⁴⁸Nubwo abakuru b'ihe abaragiraga enkumi n'enkumi ebikumi n'ebikumi, byabaserikale nubwo baahikireho Musa

⁴⁹baamugambira bati: “Itwe abaheereza bawe tubazire abasaija abaaramagire abaturukurolerra, busaho muntu n'omu atubuzireho.

⁵⁰Habweki tuleesire ebintu ebirungi ebinyakukozirwe omu zaabbu; ebinyakujwarwa ha mikono, ha maguru, empeeta ez'emanyikirizo ezinyakujwarwa ha nkumo, empeta eza ha matu n'enkwanzi, buli muntu nkooku anyagire, tubihongiire MUKAMA kucungura obwomeezi bwaitu.”

⁵¹Musa na Eryeza nyakatagara, baihaho abantu abo ezaabbu n'ebintu ebinyakukozirwe omu zaabbu.

⁵²Zaabbu yoona ey'okuhonga, abantu ei baahongire MUKAMA, eyarugire hali abaduumizi ab'enkumi na hali abaduumizi ab'ebikumi eby'abaserikale, ekahika kiloguraamu bikumi bibiri nsanju na itaano.

⁵³Abasaija abaaramagire ha bulemu, buli omu akaba ayenyagiire omunyago.

⁵⁴Musa na Eryeza nyakatagara baayanuukura ezaabbu eyaleesirwe abaduumizi ab'enkumi n'ab'ebikumi eby'abaserikale, baagitaahya omu Heema ey'okutangatanganiramu, MUKAMA niyo aijukirehoga abantu ba Isirairi.