Read Runyoro - rutooro Kubar 32 Bible Online

Kubar 32 - Runyoro - rutooro bible

Kubar 32

¹Abaana ba Rubbeni n'aba Gaadi, bakaba baina ente nyingi muno; baarora ensi eya Yazere n'ensi eya Giryadi, ensi egi, ekaba eri nsi nungi ey'okwikarwamu ente.

²Nukwo kwija hali Musa, hali Eryeza nyakatagara, na hali abeebembezi ab'ekitebe, baabagambira bati:

³“Atarosi, Diboni, Yazere, Nimura, Hesiboni, Eryaale, Sebamu, Nebo na Behoni,

⁴ensi MUKAMA ei yasinguliire Abaisirairi abantu boona nibarora,

⁵ensi egi, mugituhe itwe abairu banyu, tugyetungire, mutatwambura obuseeri bwa Yorudaani.”

⁶Baitu Musa yabakaguza ati: “Bagenzi banyu, baraaramaga bonka, inywe muli aho mwikaliire?

⁷Musobora muta kuterebura abantu ba Isirairi mukabatanga kutaaha omunsi MUKAMA ei yabahaire?

⁸Baisenkuru inywe nabo, obu nabatumire kurora ensi, ninyema Kadesibaraneya, nukwo baakozire bati.

⁹Habwokuba, obu baahikire ha kihanga eky'Eskoli, barozire ensi, bakaterebura abantu ba Isirairi, baleke kugenda omunsi MUKAMA ei akaba naija kubaha.

¹⁰Ha kiro eki, MUKAMA akabiihirwa muno, nukwo kurahira naagamba ati:

¹¹‘Mazimakwo, ha bantu abaarugire omunsi Misiri, okurugirra ha w'emyaka abiri ey'obukuru n'okweyongerayo, busaho n'omu alirora ensi ei narahiire okuha Abburahamu, Isaaka na Yakobbo, habwokuba, batankuraatire n'omutima gumu;

¹²busaho n'omu, okwihaho Kalebbu mutabani wa Yefuneha Omukenezi na Yoswa mutabani wa Nuuni, habwokuba abo, nubo baahondiire MUKAMA n'omutima gumu.’

¹³Kandi MUKAMA akabihiirirwa muno Abaisirairi, yabeenjeeza omwirungu okumara emyaka amakumi ana, okuhika boona abaamubiihiize obu baahoireho.

¹⁴Hati, ninywe mugarukire omu kiikaro kya baisenkuru inywe, oruzaaro orw'abantu ababi, kandi muleetere Ruhanga okubiihirirwa Abaisirairi okukiraho!

¹⁵Habwokuba obu muraamurugaho, mukanga kumuhondera, Abaisirairi naija kugaruka kubaleka omwirungu; obu, niinywe muraaba mubahwerekeriize boona.”

¹⁶Nubwo bamwirra haihi baamugambira bati: “Nitwija kuzitira hamu engo ez'okutamu amagana gaitu ag'entaama, twombeke n'embuga abaana baitu ezi baraaraaramuga

¹⁷baitu nitwija kukwata eby'okurwanisa, twetekaniize okwebembera Abaisirairi okuhika obutulikabataahya omu kiikaro kyabo; nukwo abaana baitu baikale omu mbuga ezigumire, abasi b'ensi egi baleke kubakoraho akabi.

¹⁸Tituligaruka owaitu okuhika Abaisirairi boona, buli omu amazire kutunga obugwetwa bwabo.

¹⁹Habwokuba, ha rubaju orumu orw'ekisaru Yorudaani, n'obuseeri bwakyo nokweyongerayo, itwe titulitungayo nsi hamu nabo; habwokuba eyaitu tugitungire ha rubaju runu orwa Yorudaani, ha bukiizi obwa Bugwaizooba.”

²⁰Musa yagamba ati: “Obu mulikora eki, mukakwata eby'okurwanisa mukaramaga,

²¹weena omuli inywe anyakwina ebyokurwanisa, alyambuka Yorudaani, okuhika MUKAMA obu alikabinga abanyanzigwa be,

²²nukwo aleme ensi enu, obu nubwo muligaruka mutakyaina ibanja hali MUKAMA naha Abaisirairi; kandi ensi enu eriba yanyu MUKAMA eyabahaire.”

²³“Baitu obu mutalikora eki, mulibiihiza MUKAMA; kandi ekibi kyanyu, kiribaranga.

²⁴Mwombeke embuga, abaana banyu ezi baliikaramu, muzitire n'engo ez'okuraazaamu entaama zanyu; kandi muhikirize eki mwaraganiize.”

²⁵Batabani ba Gaadi n'aba Rubbeni baagambira Musa bati: “Itwe abairu bawe nitwija kukora nkooku oturagiire.

²⁶Abaana baitu, bakazi baitu, amagana gaitu, ag'entaama n'ag'emburabuzi, ente zaitu zoona, ebi byona biraikaraga omunsi Giryadi;

²⁷baitu itwe abairu bawe, weena anyakunyina eby'okurwanisa, nitwija kugenda ha bulemu nkooku oturagiire.”

²⁸Hanyuma, yaha Eryeza nyakatagara na Yoswa mutabani wa Nuuni n'abeebembezi ab'amaju aga baisenkuru ab'enganda za Isirairi, ebiragiro ebirukubakwataho.

²⁹Musa yabagambira ati: “Batabani ba Gaadi naba Rubbeni, weena anyakwetekaniize kugenda ha bulemu, kakuba bambuka Yorudaani hamu na inywe, ensi ekasingurwa, obu nubwo mulibaha ensi eya Giryadi, bagyetungire.

³⁰Baitu obu batalyambuka baina ebyokurwanisa, omugabo baligutunga omuli inywe, omunsi ya Kanaani.”

³¹Batabani ba Gaadi n'aba Rubbeni baagarukamu bati: “MUKAMA nkooku atugambiire itwe abairu bawe, nukwo turaakora.

³²Nitwija kwambuka twine ebyokurwanisa, tutaahe omunsi Kanaani, kandi obugwetwa bwaitu, twikale nabwo obuseeri bwa Yorudaani.”

³³Abaana ba Gaadi n'aba Rubbeni, n'ekicweka eky'oruganda rwa Manaase, mutabani wa Yosefu, Musa akabaha obukama bwa Sihoni omukama w'Abamooli, n'obwa Ogi omukama wa Basani, ensi yoona n'embuga zaayo, n'amahanga gaazo, embuga ez'ensi egi, okugimarrayo kimu.

³⁴Batabani ba Gaadi, baayombeka Diboni, Ataroosi, Alihora,

³⁵Atiroosisofani, Yazeri, Yogibeha,

³⁶Besi-mura, na Besi-harani, baayombekayo embuga ezigumire, baazitira engo ez'entaama zaabo.

³⁷Aba Rubbeni baayombeka Hesiboni, Eryale, Kiryasaimu,

³⁸Neebo, Baalimeyoni (amabara g'ensi egi, gakahindurwa) na Siboma; embuga ezi baayombekere, baaziruka amabara agandi.

³⁹Kandi batabani ba Makiri mutabani wa Manaase, akagenda Giryadi yagihamba, yagibingamu Abamooli abakaba bagirumu.

⁴⁰Musa, Giryadi yagiha Makiri mutabani wa Manaase, yagiikaramu.

⁴¹Kandi Yairi mutabani wa Manaase, akagenda yahamba ebyaro eby'ensi ezi, yabiruka ibara Havosiyairi.

⁴²Nooba uwe, akagenda yahamba Kenasi n'ebyaro byayo, yagiruka Nooba, ibara lye.